1 David mi dala: Yima kä wana mba mi arî gong nga kud’ora hi Ma didina Alonid’a, mi mba arî yima ngal ahle suma ngat buzu suma ngala hi Israel-lîna mi.
David mi min ahlena á min gong nga kud’orid’a
2 David mi he vuna ala a togï angoyogei suma a nga kaka yam ambas sa Israel-lina, mi he sunda mi suma tchet ahinad’a ala a tchet ahinad’a á min gong nga kud’ora hAlonid’a mi. 3 David mi min kaweina ablaud’a á min pondena yam vun gongîyona zlapa ki kawei ma vunam gundina, mi tok kawei ma hleuna ablaud’a mi ndak á ndumba d’i, 4 zlapa kagu sedrena ablaud’a mi ndak á ndumba d’uo mi, kayam suma Sidon-na ki suma Tir-râ a mbam kagu sedrena ablaud’a. 5 David mi dala: Gorona Salomon mi ni gogorâ tua, mi ne nga d’uo tua mi, wani gong nga a mba minit mi Ma didinid’a, simiyêt mba mi nde yina ki subura yam andagad’a pet. Ni kayam ndata ba, an min minim ahlena kad’u. Ni hina ba, David mi min ahlena ngola avok mat mama.
David mi he sun nda min gong nga kud’orid’a mi Salomon
6 David mi yi goroma Salomon, mi hum vuna á min gong nga kud’ora mi Ma didina Alona hi Israel-lîna, 7 mi dum ala: Gorona, an tan djib’er ala an min gonga ki simiyê Ma didina Alo mana. 8 Wani Ma didina mi dan ala: Ang tchi suma ngola heî, ang dur ayîna ngola mi. Ni ang ba, mba min gonga ki simiyên ndi, kayam ang vo buzuna woi yam andagad’a avoron ngola heî. 9 Wani ang mba vut gorâ, mba mi ka’î sama halasâ. An mba ni hum tuk tad’a, an mba ni pad’am mbei abo mam suma djangû suma a nguyum pet, a mba yum ala Salomon. Kur atchogoi mamba, an mba ni he lovota mi Israel-lâ a mba kak ki halasa bei va mi lazi ba. 10 Ni mam ba, mba mi min gonga akulo ki simiyênu, mam mba mi arî gorona, an mba ni arî abum mi. An mba ni hum ad’enga á tamula aduk Israel-lâ gak didin.
11 Ki tchetchemba, gorona, ar Ma didina mi kak ki sed’engû, mi lang djivid’a. Ar ang min gonga mi Ma didina Alo mangâ d’igi mi hlan vunam kang na. 12 Ar Ma didina mi hang ned’a ki d’alâ á te yam Israel-lâ á ngom gata hi Ma didina Alo mangîd’a. 13 Le ang ngom gat mamba ki vun ma he ma mi hum mi Israel-lâ avun Moise-sâ ni, mam mba mi lang djivid’a. Ang so tangû, ang ve tang ad’enga, ang le mandar ri, ar vunadigang ngi pat tuo mi.
14 Wana nahle suma an minizi ata ad’eng manda á min gonga mi Ma didina, nala, lora tonna 3000 ki kawei ma hapma tonna 30.000 zlapa ki kawei ma hleuna ki kawei ma wurana ablaud’a a ndak nga á ndumba d’i. An min aguna kahinad’a mi. Ang mba tchuk kazi kua mi. 15 Ang nga ki suma sunda ablaud’a, suma tchet ahinad’a suma a we á le sunda kahinad’a kaguna heîna ki suma d’al suma le sun nda lara ge petna mi. 16 Lora, kawei ma hapma, kawei ma hleuna ki kawei ma wurana, a ndak á ndumba d’i. Ang tchola, ang le sunda ki sed’eziya! Ar Ma didina mi kak ki sed’eng mi!
17 Bugola, David mi he vuna mi nglo suma avok Israel-lâ pet ala a mbeï ndjun goroma Salomon. 18 Mi dazi ala: Ma didina Alo magina mi nga ki sed’egi d’uo zu? Ni mam ba, mi hagi tuk tad’a ata yina pet tuo zu? Kayam ni mam ba, mi han suma a nga kaka yam ambasa adjeuna abonu. A ge yazi kä avok Ma didina, avok sum mama mi. 19 Ki tchetchemba, agi hagi tagi ki hur ma tuna á hal Ma didina Alo magina, agi tchologi akulo, agi minigi gong nga kud’ora hi Ma didina Alonid’a, agi mbagi ki zanduk ma vun ma djinda hi Ma didinina mi nga kuana kahle suma a tinizi irazi vazi mAlonina kur gong nga a mba minit ki simiyê Ma didina ndata.
© Azumeina Bible © Alliance Biblique du Tchad, 1999.
