1 Ar ang le zazak á de zlad’a, d’oze ang he hurung á de zlad’a ablaud’a avok Alona d’i. Kayam Alona mi sä nakulo, angî ka hî yam andagad’a. Kayam ndata, ang zul zla d’a ded’a ablaud’a d’i. 2 Kayam adï d’a ded’a ti mba nata djib’er ra ablaud’a; hina mi na, ang hum dela hi sama lilid’a ni kur zla d’a de d’a ablaud’a mi. 3 Le ang hle vunang mAlona ni, ang le lilinga á ndak vun vama ang hle vunang kama d’i. Kayam Alona nga mi we hohowa suma lilid’a d’i. Kayam ndata, ang ndak vun vama ang hle vunang kama. 4 Ang hle vunang mAlona d’uo ni hotei, kal la ang hle vunang d’o ba, ang nga ndak vun vama ang hle vunang kama d’uo d’a. 5 Ang ar lovota mi vunang á b’lak tang ngi, ar ang davok ma sunda hAlonina ala: An le ni ir vitä d’i. Ni kayam me ba, Alona hurum mi zal yam zla manga mi b’lak sun nda ang lat kabonga woi ge? 6 Zla d’a de d’a ablaud’a, ti ni d’igi zla d’a hawa yak ka tcholï ata adï d’a de d’a ablaud’id’a na mi. Kayam ndata, ang le mandara Alona.
Suma te yam suma a kal ir zlad’a woina
7 Le ang we a nga djop vun suma houd’a kur ambasa, d’oze a nga ka sariya d’a ata yat tuo d’a, le azi ar zla d’a gagazid’a woyo ni, ang le atchap pi. Kayam sama a tinim ngolina, nga mi gol ma ad’um kä na, suma ding suma a tinizi ngola kalazi azina a nga d’ei. 8 Djivi d’a yam ambasid’a ni yam suma pet, amulâ pî mi fe djivi mamba ni kur asinena mi.
Ndjondjoîd’a zlat nga d’i
9 Sama nga mi le yam beged’a heîna, ti nga d’i ndagam mbi, sama mi le yam ndjondjoîd’ina, nga mi fe á ndagam mbuo mi. Hina pet pî, ni sun nda hawa yaka! 10 Ata yima ahlena a zul heîna, suma a tazina a zul mi. Ni djiviya me ba, salazina mi fat ke? Mi golozi ni ki iram hawana d’uo zu? 11 Sama le sunda le mi te ngiyeû d’oze mi te ngola pî, nga mi bur sena djivid’a halas. Wani hopma hi sama ndjondjoînina nga mi aram á bur sena d’i.
12 An we vama tcho ma kalâ yam andagad’a ka hî. Ni ndjondjoî d’a salatna nga mi togot yam vama mba mi mba kam avinid’a. 13 Ndjondjoî ndata ti dap pei ata abo ma mbut ma tchona. Gorom ma mi vud’uma nga mi fe va abom tu d’uo ko. 14 D’igi mi ndeï woi kur asum na, mi hulongî gandila d’igi mi mbeï na, nga mi hle vama mam kau ki tama abom tu d’uo mi. 15 Wana ni vama tcho ma kalâ d’ei: Mba mi i ni abom hawa d’igi mi mbeï na, mba mi fe ni djiviya me yam sun nda mam kau tam kat hawa hina yaka ge? 16 Kak mam mba yam andagad’a ka hid’a pet ni kur nduvunda ki tchina ki hur ma zala ki ndaka mi.
17 Vama an wuma ba wana: Vama djivi ma yam sanina, ni d’ala mi te, mi tche, mi le furîd’a yam sun mam mba lara ge d’a mi lat ki kaud’a yam andagad’a ka hî kur bur ma Alona mi humzi yam andagad’a ka hina d’a. Wana ni wurak mamba. 18 Alona mi he ndjondjoîd’a ngola mi suma dingâ, mi arazi lovota á te kat mi. A tat mbiyod’u, a le furîd’a yam kau mazid’a. Ndata ni he d’a hawad’a hAlonid’a. 19 Mba mi djib’er ngola yam kak mam mba yam andagad’a ka hid’a d’i, kayam Alona mi hulongôm humba ki furî d’a kurum krovod’a.
© Azumeina Bible © Alliance Biblique du Tchad, 1999.
