Ester nga d’i hal lovota á kal gen amulâ
1 Kid’a bur ma hindina ndaka, Ester ti tchuk baru mat ma amula atad’u, ti kal krovo avok amulâ kur azì mam ma amula avun gong mamba. Amulâ mi nga kaka kur aziyam ma amula yam zlam mam mba ngagad’a yam avun agrek ma kala. 2 Ata yima amulâ mi wamula Ester ti nga tchola krovo hur azinina, tam lum djivid’a kad’u, mi mad’at yam totogo d’a lor ra nga abomba. Ester ti hut go, ti dot vunad’u. 3 Amulâ mi djobot ala: Amula Ester, ni me ge? Ndak min ni me ge? Le nabo leu manda pî, an mba ni haksiya.
4 Ester ti hulong dum ala: Amulâ, le ang mina ni, ang mbeï ki Haman ini ata te ma lü ma an langzina.
5 Ata yi máma amulâ mi dazi ala: Agi igi atogo zak, agi mbeyegï ki Haman d’igi Ester ti min na. Amulâ ki Haman djak a i ata te ma lü ma Ester ti luma.
6 Ata yima azi nga tche süm guguzlud’ina, amulâ mi de mi Ester ala: Ndak halî me ge? An mba ni haksiya. Ndak min ni me ge? Le nabo leu manda pî, an mba ni haksiya.
7 Ester ti dum ala: Vama an halama ki vama an minima ba wana: 8 Le an lang tang djivid’a á hulongôn humba yam vama an halama ki vama an minima ni, ar ang mbeï ki Haman ata te ma lü ma an mba ni luma. Ndjivin an mba ni vang ad’ud’a.
Haman mi min aguna á gap Mardose akulo
9 Kid’a Haman mi nde woi ata yima te ma luna kur bur mámid’a, mi nga mi le furîd’a ki hur ma hapma. Wani ata yima mi we Mardose mi nga kaka kä avun azina hamulîna bei mi tchol akulo, bei mi hut tam mbei avorom ba mi d’a, hurum zal kam ngola. 10 Hina pet pî, mi ve tam mi i avo hatamu, mi ge sunda, mi yï buniyôma kamamba Zeres. 11 Haman nga mi dazi zlad’a yam ndjondjoî mam mba kal papad’a, yam ablaud’a hi gromid’a, yam ahle suma amulâ mi tinim ki ngolina, yam tin nda mi tinim yam amulei mama kazungeî mama peta mi. 12 Haman mi dazi kua ala: Ni an tu go ba, amula Ester ti yan ata te ma lü ma ti luma kamulâ, ti yan nga avin kua kamulâ d’ei. 13 Hina pet pî, ata yima an nga ni we Mardose ma Juif-fâ mi nga kaka kä avun azina hamulîna, an golozi ni va iran ndi.
14 Ata yi máma amamba Zeres ki buniyôma pet a dum ala: Ang min aguna fiyagam mba akulod’a metred’a dok mbà yam vahl. Ndjivin yorogo ang djop amulâ kayambala ang gap Mardose akulo kua d’a. Hina wani, ang mba i ata yima te ma luna kamulâ ki furîd’a. Zla ndata le Haman tam djivid’a, mi min aguna mi.
© Azumeina Bible © Alliance Biblique du Tchad, 1999.
