D’ogol ma yam sama yakina
(Gol Mar 4.1-9Luc 8.4-8)1 Kur bur máma, Jesus mi nde woi hur azina, mi kak kä avun apod’a. 2 Ablau suma a togï gevem ngola gak mi djak mi kak kur alumba, ablau suma a kak kä avun apod’a. 3 Mi dazi zlad’a ngola ki d’ogolâ teteng ala:
Gola! Sama yak andjafâ mi nde wa abua á yaka. 4 Kid’a mi nga mi yaka, ma dingâ mi nde kur lovota; aluweina a mba, a kobomu. 5 Ma dingâ mi nde ata yima alaka, ata yima andagad’a nga kua ngol luo na. Atogo hina zak mi deyâ, kayam me mi nga kandagad’a i kä ngola ad’um mbi. 6 Wani kid’a afata ti deîd’a, ti lugud’omu, mi so woyo, kayam sideyem mi i nga kä ngol li. 7 Ma dingâ mi nde aduk aweid’a, ti d’uf akulo, ti hebem ped’et. 8 Ma dingâ mi nde ata yima andaga d’a djivid’a, mi le irâ, ma dingâ kis, ma dingâ dok karagaya, ma dingâ dok hindi mi. 9 Sama nga ki humba á humbina, ar mi huma.
Jesus mi de zlad’a ki d’ogolâ ni yam me ge?
(Gol Mar 4.10-12Luc 8.9-10)10 Suma hata a mba gen Jesus, a djobom ala: Ni kayam me ba, ang dazi zlad’a ki d’ogolâ ge? 11 Mi hulong dazi ala: Alona mi hagi wad’ud’a á we zla d’a mudurid’a yam leu d’a akulod’id’a, wani mi hazizi nga mi azi d’i. 12 Kayam sama mi nga ki va aboma, Alona mba mi hum kam kua, mba mi kak kur duzîd’a mi. Wani sama nga ki va abom mbuo na, vama nga abom nde na pî, Alona mba mi hlumzi woi abomu. 13 Ni kayam ndata ba, an nga ni dazi zlad’a ki d’ogolâ wana, kayam azi nga gola, wani a nga we d’i; azi nga huma, wani a nga humut ad’ut ti, a nga wad’ud’a d’uo mi. 14 Azi le hina ná ndak vun zla d’a ma djok vun Alona Isai mi dat kazi ala:
Agi mba humugi ko, wani agi mba humut ad’ut ti,
agi mba gologi ko, wani agi mba wat ad’ut tuo d’a.
15 Kayam sum ndazina, huruzi ni b’ala,
a tos humazi woi á humba,
a duk irazi woyo,
kayam a we ki irazi d’i,
a hum ki humazi d’uo mi
tala a wad’ud’a kuruzi
a mbut huruzi mbut ba,
an ni sud’uziya d’a.
16 Wani agi lagi furîd’a, kayam iragi d’i we, humagi d’i hum mi. 17 Gagazi, an nga ni dagiya, suma djok vun Alona azi kablau suma d’ingêrâ a min á wahle suma agi wazina, wani azi wazi nga d’i; azi min á hum vama agi humuma mi, wani azi humum nga d’uo mi.
Jesus mi väd’u d’ogol ma yam ma yakina
(Gol Mar 4.13-20Luc 8.11-15)18 Jesus mi had’azi kua ala: Kayam ndata, agi humugi ad’u d’ogolâ hi sama yakina. 19 Ata yima sana mi hum zla d’a yam leud’a hAlonid’a wani mi wat ad’ut tuo na, Ma tchona mi mba, mi hle zla d’a a zarat kurumba woyo. Wana nawu ma nde kur lovotina.
20 Ma mi nde ata yima alakina ni sama hum zlad’a, mi vat ki furîd’a atogo za’â. 21 Wani sideyem mi i nga kä ngol li, mi ve tam ndjö. Wani ata yima ndaka d’oze djop vuna nga mi le suma yam zlad’a hAlonid’ina, atogo hina zak, mi ar zlad’a hAlonid’a woyo.
22 Ma mi nde aduk aweid’ina ni sama hum zlad’a, wani djib’era hi duniyad’id’a ki d’od’oka hi beged’id’a a hep zla d’a a yagat kurumba akulo ped’et bei le irâ.
23 Ma mi nde ata andaga d’a djivid’ina ni sama hum zlad’a, mi wat ad’ud’u, mi tchuk grona, ma dingâ mi le irâ kis, ma dingâ mi le irâ dok karagaya, ma dingâ mi le irâ dok hindi mi na.
D’ogol ma yam asu ma tchonina
24 Jesus mi dazi zla d’a d’ogol la dinga kua ala: Leu d’a akulod’a ti hle tat ni d’igi sama yak awu ma djivina kur asinema na. 25 Wani ata yima suma a bur senina, mam ma djangûna mi mba, mi yak barumba aduk awu ma djivina, mi ge tam mi iya. 26 Ata yima awuna mi deî mi vik wirîna, barumba ti wul akulo mi. 27 Azungeîna hi sa mámina a mba, a dum ala: Salamina, ang zarî awu ma djivina kur asineng nguo zu? Barumba ti mbut ni lara aduk ke? 28 Mi hulong dazi ala: Ma djangûna mi lahle ndazina ni mamu. Azungeî mama a djobom ala: Ang min ala ami i pad’at tei zu? 29 Mi hulong dazi ala: Hawa! Kayam le agi pad’at teyo ni, dam agi mba pad’agi awuna woi ki sed’ed’u. 30 Agi arazi a wul djak, gak bur ma feta. Kur bur ma feta, an mba ni de mi suma feta ala: Agi i djagi barumba woi adjewe, agi djinigiziya, agi togot ngalat teyo, wani agi togogi awuna kur avir mana.
D’ogol ma yam ir mutarîna
(Gol Mar 4.30-32Luc 13.18-19)31 Jesus mi dazi zla d’a d’ogola kua ala: Leu d’a akulod’a ti hle tat ni d’igi ir mutar ma sana mi hlum mi gum kä kur asinema na. 32 Iram mbi gugureid’a kal ir ahlena pet, wani ata yima mi wul ngolina, mi mbut d’igi aguna na, gak aluweina a mba kak ata abomu, a min aziyazi kua mi.
D’ogol ma yam angufina
(Gol Luc 13.20-21)33 Jesus mi dazi zla d’a d’ogol la dinga ala: Leu d’a akulod’a ti hle tat ni d’igi anguf fa atchad’a ti yot ti gizeyêt kafut ta a ngat kangota hindid’a na, gak ti tchub’urot akulo pet.
Ni nana ba, Jesus mi de zlad’a ki d’ogolâ ge?
(Gol Mar 4.33-34)34 Jesus mi de zla ndata mablau suma pet ni ki d’ogolâ. Mi dazi nga zlad’a hawa bei d’ogolâ d’i. 35 Ahle ndazina a le hina á ndak vun zla d’a ma djok vun Alona mi dat ala:
An mba ni mal vunan ndei á de zlad’a ki d’ogolâ,
an mba ni de vama nga ngeid’a kä adjeu dei
kad’u tinda handagad’ina woyo d’a.
Jesus mi väd’u d’ogol ma yam barumbina
36 Bugola, Jesus mi ar ablau suma, mi kal avo. Mam suma hata a mba gevem a dum ala: Ang vami ad’u zla d’a d’ogola hi barum mba hur asinenid’a.
37 Mi hulong dazi ala: Sama yak awu ma djivina ni an Gor Sana. 38 Asinena ni duniyad’a; andjaf ma djivina ni gro suma a mba te leud’ina; barumba ni Ma tchona groma. 39 Ma djangû ma yagatna ni diable; yima duta ni dabid’a hi duniyad’id’a; suma duta ni malaikana.
40 D’igi a tok barumba a nga ngalat tei na, fat ta dabid’a hi duniyad’id’a, a mba le ni na mi. 41 An Gor Sana mba ni sun malaika mana á yo suma a nga tchuk suma kur tchod’ina ki suma a nga le tchod’ina pet woi abu kur leu manda. 42 A mba tchuguzi kur gring ma akud’a. Sä kua sum ndazina a mba tchiya, a mba mut siyazi mi. 43 Ata yi máma, suma d’ingêrâ a mba wile kur leud’a hAbuzid’a d’igi afata na. Sama nga ki humba á humbina, ar mi huma.
D’ogol ma yam ndjondjoî d’a a ngeyet kä d’ina
44 Jesus mi had’azi kua ala: Leu d’a akulod’a ti hle tat ni d’igi vama djivi ma nga ngeid’a kä kur asinenina na. Sana mi wumu, mi hulong mi ngeyem kä, kayam mi nga mi le furîd’a kamu. Mi iya, mi gus ahligiyem mbei pet, mi i gus asine máma.
D’ogol ma yam vama djif ma guzum kal teglesîna
45 Jesus mi had’azi kua ala: Leud’a hAlonid’a ti hle tat ni d’igi ma mbut abom ma nga mi hal vama djif ma a guzum ngolina na. 46 Ata yima mi fe vama djif ma guzum kal teglesîna, mi iya, mi gus ahligiyem mbei pet, mi guzumu.
D’ogol ma yam abeinina
47 Jesus mi had’azi kua ala: Leu d’a akulod’a ti hle tat ni d’igi abei ma a tchugum kä kur alumina na, mi tok andjaf kulufâ pet. 48 Ata yima mi oîna, azi tanam akulo avun gongôd’id’a, a kak kä, a tok ma djivina kur kolina, wani a tchuk ma tchona woyo. 49 Fat ta dabid’a hi duniyad’id’a ni na mi. Malaikana a mba mba á wal ir suma tchona ki suma d’ingêrâ. 50 A mba tchuk suma tchona kur gring ma akud’a; ata yi máma a mba tchiya, a mba mut siyazi mi.
Ndjondjoî d’a awilid’a ki d’a adjeud’a
51 Jesus mi djop mam suma hata ala: Agi wagi ad’u ahle ndazina pet tchu?
A hulong dum ala: Â. 52 Mi dazi ala: Kayam ndata, sama hat gat ma lara pî ma mbut tam ma hata yam leu d’a akulod’ina, mi hle tamî d’igi samazì ma nga mi yoï ahle mam suma awilina ki suma adjeuna woi ata yazi ma ngeid’ina na.
Suma Nazarat-na a he nga gagazid’a yam Jesus d’i
(Gol Mar 6.1-6Luc 4.16-30)53 Ata yima Jesus mi dap zla mam mba d’ogolâ ded’a dapma, mi tchol ata yi máma, mi iya. 54 Kid’a mi mbaza avo hatamba, nga mi had’azi kur gong mazi d’a toka. A le atchap. Kayam ndata, a dala: Sa máma mi fe ned’a á lahle suma atchapma ni lara na ge? 55 Ni ma tchet aguna goroma d’uo zu? A yi asum ala Marie d’uo zu? Jacques azi ki Josef ki Simon ki Jude a ni b’oziyoma d’uo zu? 56 B’oziyom suma aropma pet a nga ka hî adigei mi d’uo zu? Sa máma mi fahle ndazina ni lara hina pet ke? 57 Kayam ndata, a fe lovota á hum gagazid’a kam mbi.
Wani Jesus mi dazi ala: Suma a nga he ngola mi ma djok vun Alona ata yina pet, wani yam ambazam mba vuta aduk simiyêm a nga hum ngola d’i. 58 Mi le nga ahle suma atchapma kua ngol li, kayam azi he nga gagazid’a kam mbi.
© Azumeina Bible © Alliance Biblique du Tchad, 1999.
