A ndjar lalamba akulo ata aguwata
1 Ma didina mi de mi Moise ala: 2 Ang i de mi Aron ala: Ata yima ang ndjar lalam mba kid’iziyad’a akulo yam aguwatna, ar ti b’o woi avok aguwad’u.
3 Aron mi le d’igi Ma didina mi he vuna mi Moise na, mi ndjar lalamba akulo ata aguwatna á b’o yina woi avok aguwad’u. 4 Aguwat máma a lumî ki lor ra a bed’eta, ei asem kä dei i ata abom ma gahl ma tetengâ. A lumî d’igi Ma didina mi tagam mi Moise na.
A tin suma hi Levi-na irazi vazid’a
5 Ma didina mi de mi Moise ala: 6 Ang yo suma hi Levi-na woi aduk Israel-lâ, ang tinizi irazi vaziya. 7 Ang tinizi irazi vazi ni hina: Ang yamazi mbiyo ma a zlup ki yam tchod’ina kaziya, a wel tumus sa atazid’a woi pet, a mbus baru mazina woyo, a mbut tazi woi yed’et. 8 A vamuhl ma azongâ zlapa ki he d’a hawa d’a afut ta adiged’i d’a a tib’eget ki mbulîd’a. Ang tanga vamuhl ma azong ma dingâ kua ngad’a yam vama ngat buzu ma zlup yam tchod’a. 9 Ang mba ki suma hi Levi-na avun zlub’u d’a ngaf tad’a. Ang tok ablaud’a hi Israel-lîd’a pet, 10 ang mba ki suma hi Levi-na avogon an Ma didina; Israel-lâ a tin abozi kazi mi. 11 Aron mi tagazi akulo avogon an Ma didina d’igi he d’a hawad’a hi Israel-lîd’a na, mi tinizi irazi vazi kur sun manda. 12 Suma hi Levi-na a tin abozi yam amuzlei suma mbà ndazina. Ang he tu vama ngat buzu ma zlup yam tchod’a, ang he tu vama ngat buzu na ngala mi an Ma didina á zlup yam tcho mazid’a. 13 Ang tchol suma hi Levi-na akulo avok Aron azi ki groma, ang tagazi akulo avogon an Ma didina. 14 Ni hina ba, ang wal suma hi Levi-na woi ki Israel-lâ; suma hi Levi-na a arî mana. 15 Bugol ahle ndazina, suma hi Levi-na a kal kur zlub’u d’a ngaf tad’a á le sunda.
Ni hina ba, ang tinizi irazi vaziya, ang tagazi akulo avogon an Ma didina mi. 16 Kayam a tinizi irazi vazi mi an aduk Israel-lâ ki zla tazi pet, an yozi ni balum gro Israel suma a vut avo’â pet mi. 17 Gro Israel suma a vut avo’â pet aduk suma d’oze d’uwarâ ni mana, kayam bur ma an tchi gro suma a vut avo’â hi Ezipte-nina woi kur ambas mazid’ina, an tin gro Israel suma a vut avo’â irazi vazi mi anu. 18 An yo suma hi Levi-na balum gro suma a vut avo’â hi Israel-lîna. 19 An ni he suma hi Levi-na ki zla tazi pet mi Aron azi ki groma aduk Israel-lâ, kayam azi le sunda kur zlub’u d’a ngaf tad’a mi Israel-lâ tala a zlubuzi yam tcho mazid’a d’a. Hina wani, tugud’ei d’a tchod’a mba d’i tum Israel-lâ ata yima azi mba hud’ï go ata yima a tinim iram vamina d’i.
20 Moise azi ki Aron kablaud’a hi Israel-lîd’a pet, a le ki suma hi Levi-na d’igi Ma didina mi he vuna kazi mi Moise na. 21 Suma hi Levi-na a mbut tazi yed’et, a mbus baru mazina woyo. Aron mi tagazi akulo avok Ma didina, mi zlubuzi yam tcho mazid’a á tinizi irazi vazi mi. 22 Bugol ahle ndazina, suma hi Levi-na a nde le sun mazid’a kur zlub’u d’a ngaf tad’a ad’u vun ma hed’a hi Aron azi ki gromina d’igi Ma didina mi he vuna kazi na.
23 Ma didina mi de mi Moise ala: 24 Wana ni zlad’a yam suma hi Levi-nid’a: Suma hi Levi-na pet suma bizazi ndak dok mbà yam vahl hloze kal dok mbà yam vahlâ, a kal kur zlub’u d’a ngaf tad’a á le sunda. 25 Sama bizam ndak dok vahlâ, mba mi ar sun mamba, mi le sunda d’uo d’a. 26 Mba mi ndjun b’oziyoma kur zlub’u d’a ngaf tad’a á ngom ahle suma a mba humzi á ngombina. Wani mi le sunda d’i. Ang le hina ki suma hi Levi-na yam sun nda ngad’a kazid’a.
© Azumeina Bible © Alliance Biblique du Tchad, 1999.
