Israel-lâ a mba hulongî gen Ma didina
1 Moise mi de kua ala: Wani ahlena pet suma an tinigizi avorogi wana, nala, vun ma b’ed’a ki vun ma ged’a a mba ndaga, wani fata Ma didina mba mi ndjoyôgi woi yam ambasa handjaf suma dingâ vivrenga, agi mba djib’eregi yam ahle ndazina. 2 Ata yi máma le agi ki grogina gagi yagi kä avok Ma didina Alo magina ki hur ma tuna ki tagi pet d’igi vun ma he ma an hagizi ini na na ni, 3 ata yi máma Ma didina mba mi wagi hohowogiya, mba mi yogï woi kur magomba, mba mi togogï kur ambas sa lara d’a mam mba mi ndjoyôgi woi kura. 4 Le a igi navun dabid’a handagad’id’a pî, Ma didina Alo magina mba mi halagi kua, mba mi togogi ata yima tuna. 5 Ma didina Alo magina mba mi mbagi yam ambasa habuyogi ngolod’a; agi mba hlad’u. Ma didina mba mi lagi djivid’a, mba mi zulugi kal abuyogi ngolo mi. 6 Ma didina mba mi mbud’ugi agi kandjavagi hurugi yed’et, kayambala agi lagi kam ki hurugi ma tuna ki tagi pet mi d’a. Hina wani, agi mba kagagi ki iragi avoromu.
7 Vun ma ge ma an b’irigizi wana pet, Ma didina mba mi hulongôm yam magi suma djangûna, yam suma a mba noyôgina, yam suma a mba djobogi vunagina mi. 8 Wani agi mba gagi yagi kä avok Ma didina Alo magina kua, agi mba tid’igi yam vun ma hed’a pet ma an hagizi inina. 9-10 Le agi gagi yagi kä avok Ma didina Alo magina, le agi ngomogi vun mam ma hed’a ki gat mam mba teteng nga a b’irit kur mbaktumba hi gat ndatid’a, le agi hulongôgi gen Ma didina Alo magina ki hurugi tu ki tagi pet mi ni, Ma didina Alo magina mba mi b’e vunam kagi kur sun nda lara ge pet ta agi mba lagizi kabogid’a. Grogina a mba zula, d’uwar magina mba mi zula, asine magina mba mi wul awuna mi, kayam Ma didina mba mi fe djivid’a atagi kua d’igi mi fat ata abuyogi ngolo na mi.
Zlad’a hAlonid’a ti nga go ki sed’egiya
11 Moise mi de kua ala: Vun ma he ma an hagizi inina ni vama ad’eng á kal kagi d’i, mi nga dei ki sed’egi d’uo mi. 12 Mi sä nakulo ba, agi mba dagi ala: Ni nge ba, mba mi djak akulo, mba mi veizï ei mba humum á lei sunda kam nge d’i. 13 Mi sä nabo alum ma ngolâ abo hî ba, agi mba dagi ala: Ni nge ba, mba mi djak alum ma ngolâ, mba mi veizï ei mba humum á lei sunda kam ge d’uo mi. 14 Wani zla ndata ti nga ni go ki sed’egiya, ti nga avunagiya, ti nga kurugi mi kayambala agi lagi sunda kad’u d’a.
Agi managi arid’a
15 Moise mi de kua ala: Gola! An tinigi ini arid’a ki djivid’a irazi vazi avorogi wana, matna ki tchod’a irazi vazi avorogi wan mi. 16 An hagi ini vuna kayambala agi lagi yam Ma didina Alo magina, agi tid’igi kur lovot ta mam tagizid’a, agi ngomogi vun mam ma hed’a ki gat mamba ki vun mam ma he ma tetengâ tala agi kagagi ki arid’a, agi zulugiya, Ma didina mi b’e vunam kagi kur ambas sa agi nga kalagi kur á hlat wanda d’a. 17 Wani le agi walagi woi ki Ma didina, le agi gagi nga yagi kä avorom mbi, le sa mi lobogi agi igi á kud’or alo ma dingâ á lum sunda ni, 18 an nga ni dagi ini, agi mba dabagi woi ki iragi fafat, agi mba kagagi tatâ yam ambas sa agi nga djagagi alum ma Jurdê-na á hlat wanda d’i.
19 An nga ni dagi ini, akulod’a kandagad’a ni glangâs mana, an tinigi arid’a ki matna irazi vazi avorogi wana, b’e vuna ki ge vuna irazi vazi avorogi wan mi. Agi managi arid’a kayambala agi kandjavagi kagagi ki arid’a d’a. 20 Agi lagi yam Ma didina Alo magina, agi gagi yagi kä avoromu, agi kagagi ni suma d’engzengâ avoromu, agi zlabagi tu ki sed’emu. Hina wani, agi mba kagagi ki arid’a, agi mba tagi ngola tatâ yam andaga d’a mam hle vunam kat á hat mabuyogi ngolo Abraham, Isak ki Jakob-pa.
© Azumeina Bible © Alliance Biblique du Tchad, 1999.
