Elifas mi dala: Sama Alona gad’ama mi le furîd’a
1 Elifas ma Teman-na mi de mi Job ala:
2 Le ami malami vunami á dang zlad’a ni,
ang hurung mba zal zu?
Wani ni nge ba, mba mi kak hina mudjuk ke?
3 Gola! Ang hat suma ablaud’a,
ang had’enga mi suma a mbut amangeîd’a kekeb’ena.
4 Zla mang nga ded’a ti tchol suma a puk kä na akulo,
ang d’op suma guguvazi mi guna aduk mi.
5 Ki tchetchemba, ndaka mba kang ang wana,
ang mbut amangeîd’a wana!
Ki tchetchemba, ti dongû,
ang nde tchatata!
6 Le mandara Alo mang ang nga lum mandarama ni vama ndjunungâ d’uo zu?
Tin hur mangâ ni d’engzeng mang nga avok Alonid’a d’uo zu?
7 Ang djib’era, na ni sama bei zlad’a kama mi ba woi yam tu zu?
Na ni suma d’ingêrâ a dap wa woi yazi tu mi zu?
8 An wala suma a nga zum sun nda ata yat tuo d’ina,
ki suma a nga zar ndakina a nga dud’uzi vud’uziya.
9 Alona mba mi tchazi woi ki fo mamba,
mba mi ngalazi woi ki simetna hayî mam ma bibiliunina.
10 Alona mba mi sengêzi oî mazi d’a d’igi azlona na d’a,
mba mi kuzuzi siyazi ma d’igi sï gro azlona na na woi mi.
11 Azlona nga mi mit tei kayam mi nga mi fe vama ve d’uo d’a,
azlod’a grotna a nga b’rau woi yayak.
*
12 Zlad’a mba kan gumunu,
human humut hina nde nde.
13 Kur djib’er manda vana nde tam mbei iran kur andjeged’a
ata yima suma a bur sena sisi’â.
14 Mandarâ mi lanu, an nga ni zlaga,
asogon ki zla tam pet mi nde zlaka mi.
15 Muzuka ti kal avoron d’igi simetna na,
tumuzun ti yo akulo hoyoi mi.
16 Sana nga tchola, an wum nga woi tetet ti,
vana nga tchola d’igi sana na avoronu,
an hum dela gureid’a kä hina lalam, ti dala:
17 Sana mi ndak á mbut d’ingêr avok Alona zu?
Sana mi ndak á mbut yed’et avok Ma luma zu?
18 Le Alona mi tin nga hurum yam azungeî mama d’uo,
le mi fe tchod’a ata malaika mama mi ni,
19 mba mi fe tchod’a ata suma a nga kaka kur azì ma andagad’ina kal luo zu?
Azi ni sumala a tcholï naduk andaga d’a gugud’upa
suma a nga hazlazi woi d’igi ndjuvul ma gureina na na!
20 Yorogo dei gak tcha fladege a nga b’lagazi woyo,
a nga bo woi ki irazi fafat,
sa nga mi djib’er kazi d’uo d’a.
21 Alona nga mi kazi ziyoziya,
a nga bo bei wad’ud’a ba.
© Azumeina Bible © Alliance Biblique du Tchad, 1999.
