Vun ma hle ma yam halasa ki duzîd’ina
1 Ma didin ma ad’engêm kal petna mi dan ala:
2 An nga ki hur ma hat ma ngolâ yam Siyon,
an hurun nga mi hat ngola kat heî mi.
3 Kayam ndata, an dala:
An mba ni hulong kur Jerusalem,
an mba ni kak kur Siyon kua.
A mba yi Jerusalem ala
Azì ma ngol ma d’engzengâ,
a mba yi Siyon ala
Yima nding mana,
a mba yi yima ndingâ ala
Yima a tinim iram vama mi.
4 An nga ni dala:
Momorogei suma andjofâ ki suma arop
suma a nga tit ki dungûruna abo djeng mazid’ina,
a mba kak kä ir palum mba Jerusalem-mba.
5 Gro andjofâ ki gro aropma
a mba mba ablaud’a, a mba lü
ir palumba hazì ma ngolîd’a.
6 An Ma didin ma ad’engêm kal petna nga ni dala:
Le ahle suma a mba le ndazina
ni vama ndandalâ ir andjaf Israel suma a mba arâ ni,
ni vama ndandalâ iran an mi zu?
7 An Ma didin ma ad’engên kal petna nga ni dagiya:
an mba ni sut man suma a izi magomba
abo ma yorogona kabo ma fladegenina.
8 An mba ni hulongôziya,
a mba kak kur Jerusalem,
a mba mbut sum mana,
an mba ni arî Alo mazina,
an mba ni te kazi ki d’engzenga ki gagazid’a mi.
9 Ma didin ma ad’engêm kal petna mi dala:
Agi vagi tagi ad’enga!
Ki tchetchemba, agi humugi zlad’a hi vun man ma hle
ma suma djok vuna a dum zlam mbei adjeu
ata yima a gäd’u gong man nda kud’ora
kä á mindina.
10 Kavok ndata, sa nga mi wurak sama sun ndi,
sa nga mi ve beged’a
yam sunda hi d’uwarîd’a d’uo mi.
Sa nga mi ndabu mi hulongî avo d’uo
abo suma djangûna,
kayam an ar suma pet a dur taziya.
11 Ki tchetchemba,
an Ma didin ma ad’engên kal petna nga ni dagiya:
An mba ni le ki suma a ar wana
d’igi an le ki suma adjeuna na d’uo d’a.
12 An mba ni mba ki b’leng nga halasa yam andagad’a,
guguzlud’a mba d’i vud’a,
andagad’a mba d’i wul awuna,
akulod’a mba d’i salona ngola,
an mba ni le djivi ndata mi man suma a mba arâ.
13 Agi suma kur leu d’a Juda-d’ina
ki suma kur leu d’a Israel-lina,
adjeu agi mbud’ugi ni d’igi suma a gazi vunina na
aduk andjaf suma,
wani ki tchetchemba, an nga ni sud’ugiya,
agi mba mbud’ugi ni suma a b’e vuna kazina.
Agi vagi tagi ad’enga,
ar agi lagi mandar ri!
14 Ma didin ma ad’engêm kal petna mi dala:
Kid’a an nga hurun á lagi ndaka
ata yima abuyogi ngolo a zalan huruna,
an hulong nga bugol yam vama an nga hurun kama d’i.
15 Wani ki tchetchemba, an nga wa hurun
á lagi agi suma Jerusalem-ma
ki suma Juda-na djivid’a.
Ar agi lagi mandar ri!
16 Wana nahle suma agi lagizina:
Ar sama lara pî mi de ni zla d’a gagazid’a mi ndrama,
ar agi kagi ni sariya d’a d’ingêr ra irata
á mba ki b’leng nga halasa,
17 ar sa mi ve ndram kurum á lum tcho d’i,
ar sa mi gun tam ir gurzula d’uo mi,
kayam ni sun nda an Ma didina
ni golot ni vama ndjendjed’id’a.
D’el tad’a mba d’i mbut ni furîd’a
18 Ma didin ma ad’engêm kal petna mi dan ala: 19 An nga ni dagiya: D’el ta d’a agi d’elegi tagi bei te tena kur til ma fid’ina kur til ma vahlâ, kur til ma kid’iziyana ki ma dogonid’a, ti mba d’i mbut ni bur ma furîd’a ki bur ma aîd’a yam suma Juda-na.
Wani agi halagi ni gagazid’a ki b’leng nga halasa.
20 Ma didin ma ad’engêm kal petna mi dala:
Andjaf suma ki suma a nga kaka
kur azì ma nglona tetengâ
a mba mba á kak kur Jerusalem.
21 Suma a nga kaka kur azì ma ngol ma dingîna
a mba i de mi suma kur ndram azì ma dingîna ala:
Agi mbeyegï ei i tcheneigi Ma didina,
ei i haleigi Ma didin ma ad’engêm kal petna.
Azi mba hulong dazi ala: Ei iya.
22 Andjaf suma ablaud’a kandjaf suma sib’ika a mba mba
á halan an Ma didin ma ad’engên kal petna avo Jerusalem,
a mba tchenen mi.
23 An Ma didin ma ad’engên kal petna ni dala:
Kur bur máma suma dogo ad’u vun ma ded’a teteng
a mba ve vun barud’a hi ma Juif-fîd’a,
a mba dum ala: Ami imi ki sed’egiya,
kayam ami humumi ala
Alona mi nga ki sed’egiya.
© Azumeina Bible © Alliance Biblique du Tchad, 1999.
