Bur ma danana
1 Wani an gang humang ala kur bur ma danana yima tchona mba mi mba. 2 Kayam suma a mba le ni yam taziya, ni suma a le yam beged’a, ni suma subur tazina, suma yam mba ad’enga, suma a ngul Alona, suma bei hum vun simiyêzina, suma bei le mersina, suma bei le mandara Alona. 3 Azi ni suma asa’atna, suma bei we hohowa sumina, suma kad’ud’a, suma bei ve tazina, suma murud’umba, suma a kak djangûna ki djivid’ina. 4 Azi ni suma ka hula, suma tchila yam gata, suma subur tad’a kal kazina, suma a le yam furîd’a hi duniyad’id’a kal Alonina. 5 A mba golozi ni d’igi suma he gagazid’a d’igi ei na na, wani azi mba tin vunazi yam ad’eng mamba. Ang mbut azigang mi suma hina na. 6 Aduk sum ndazina, suma dingâ a nga si kä hur azina, a tan arop suma afefet suma a nga le magomba mi tchod’ina, narop suma d’od’oka hi hliuna d’a lara ge nga d’i tanazina. 7 Arop ndazina a nga hat teteu, wani azi ndak á we gagazid’a tetet ti. 8 Azi ni d’igi Janes azi ki Jambres suma a tchol djangûna ki Moise adjeuna na; sum ndazina a nga tchol djangûna ki gagazid’a mi. Ni suma djib’er mazid’a b’lak keina, he gagazi mazid’a ndak nga d’i. 9 Wani azi mba i avok ngol li, lili mazid’a mba d’i nde woi ir suma pet d’igi Janes azi ki Jambres na mi.
Tchen nda dananda
10 Wani angû, ang we wa hat manda, tit manda, min manda, he gagazi manda, ve ta manda, o manda, rit ta manda, 11 djop vun mana, ndak manda mi. Ang wahle suma a mba kan avo Antiyos ki Ikoniyum ki Listre-na. An ve tan ad’enga kur ahle ndazina pet, wani Salad’a mi pad’an ndei kuruzi mi. 12 Wani suma pet suma a min tit bugol Alona zlapa ki Jesus Christ-sâ, a mba djobozi vunazi mi. 13 Wani suma le tchod’a ki suma lop suma a mba i avogovok kur tcho mazid’a, a mba vit suma woyo, azi tazi a mba vit tazi woi mi. 14 Wani ang tanga, ang kak ngingring kur ahle suma ang hat kuruzi suma ang wazi tetetna, kayam ang we suma a had’angzina. 15 Kid’a ang gogora tua d’a, ang we mbaktumba hAlona d’a ndak á hang ned’a á ing kur suta yam gagazi d’a ang hat yam Jesus Christ-sa. 16 Mbaktumba hAlonid’a pet, nAlona ba, mi fo muzugam kua. Djivid’a nga kua á hat suma gagazid’a, á ngop suma, á d’op suma yam tchod’a, á simad’azi á le d’ingêra, 17 kayam sana hAlonina mi ndak memet á min tam á le sun nda djivi d’a lara ge pet.
© Azumeina Bible © Alliance Biblique du Tchad, 1999.
