Ma didina mi ngop suma tuwal fileina
1 Ma didina mi dan ala: 2 Ang gor sana, ang mbut irang yam ahuniyô suma Israel-lâ, ang djogozi vuna, 3 ang dazi ala: Agi ahuniyô suma Israel-lâ, agi humugi zlad’a hi Salad’a Ma didinid’a. Nga mi dagi agi ahuniyô suma nglona ki yima ndingâ ki b’irlima ki hora ala: An tanda mba ni mba kayî ma durâ yam suma a nga kaka kagina, an mba ni b’lagazi yi mazi ma akulo ndingâ woi mi. 4 Yi mazi ma ngal ahle suma ngat buzu ma tetengâ mba mi mbut djona. An mba ni tozi filei mazi mafat ma tetengâ kä woyo, an mba ni tchuguzi mad’azi kä avok filei mazi ma teteng máma mi. 5 An mba ni tchuk mad’a Israel-lâ kä avok filei mazi ma tetengâ, an mba ni ndjoyôzi asogozi woi ngui yi mazi ma ngal ahle suma ngat buzu ma tetengâ mi.
6 Agi Israel-lâ, ata yima lara ma agi mba kagagi kuana, a mba b’lagagi azì magi ma nglona woyo. Yi magi ma ngal ahle suma ngat buzu ma tetengâ mba mi ar djona, filei magi ma tetengâ mba mi b’lak keyo, filei magi ma tetengâ mafata a mba tom kä woyo, sun magi d’a teteng nga agi lat kabogid’a mba d’i dap pei mi. 7 Mad’a suma mba mi tchuk kä adigagiya, agi mba wagi ala an ni Ma didina. 8 Wani fata an mba ni ndjoyôgi woi yam ambasa tetenga, an mba ni sut suma dingâ adigagiya. Ni suma a mba sut avun ayî ma durâ aduk andjaf sumina.
9 Suma a mba sut tei ndazina a mba djib’er kan aduk andjaf suma a mba izi magomba kuana. A mba djib’er kan ata yi máma, kayam an ni tozi huruzi ma mizeuna ki irazi d’a nga sod’a á le gaulangâ ki filei mazinid’a woyo. Azi tazi mba gol tazi ni suma ndjendjed’a yam sun nda tcho d’a azi lata ki sun mazi d’a ndjendje d’a lara ge pet mi. 10 Azi mba wala an ni Ma didina, an dazi zlad’a ni hawa d’uo, an ngobozi ki ndak ka wanda ni hawa d’uo mi.
11 Salad’a Ma didina mi dala: Agi tchagi abogiya, agi dadjagi asegi kä, agi tchigi ala: Alë yam asa’ata ki sun nda ndjendjed’a hi Israel-lîd’a pet. A mba tchazi avun ayîna ki baktarad’a ki tugud’ei d’a tcho d’a tchi matna. 12 Ma sä deina, tugud’ei d’a tcho d’a tchi matna mba d’i tchumu. Ma gona, a mba tchum avun ayîna. Ma mba mi arâ, a mba nguyum kä kayîna, baktarad’a mba d’i tchumu. An mba ni ndak vun hur man ma zala, gak ni ngoboziya. 13 Azi mba wala an ni Ma didina ni fata mad’azi mba mi tchuk kä aduk filei mazi ma tetengâ gen yi mazi ma ngal ahle suma ngat buzu ma tetengâ, yam yi mazi ma nding ma lara, yam ahuniyô suma fuyogei suma lara, ad’u agu ma lara ma angusâ, ad’u agu sen ma d’uf ma lara ma guguluîna, ata yima azi ngal dubang ma his djivid’ina mi filei mazina kuana pet. 14 An mba ni hlabon kan akulo á ngoboziya, an mba ni mbut ambas mazid’a djona, an mba ni mbud’ut fula tinï ad’ud’a hur ful ma abo ma sutna dei gak mba ata azì ma ngol na Ribla-na. A mba wala an ni Ma didina.
© Azumeina Bible © Alliance Biblique du Tchad, 1999.
