David mi kus yam andjaf suma dingâ
(Gol 2 Sam 8.1-14)1 Bugol ahle ndazina, wana nahle suma a lena: David mi dur ayîna ki suma Filistê-na, mi kus kaziya, mi hulongôzi yazi kä ad’umu, mi hlazì ma Gat-na kazì ma nguyuma aboziya.
2 David mi dur ayîna ki suma Mowap-ma, mi kus kaziya, mi hulongôzi yazi kä ad’umu, a hum tara.
3 Kid’a Hadadezer amul ma Soba ma abo ma Hamat-na mi hulong á hle leu mam mba avun alum ma Efrat-nid’a, David mi dur ayîna ki sed’emu, mi kus kamu. 4 Mi yo pus ma dur ayîna 1000, suma djang akulumeina 7000, suma asemba 20.000, mi ka gigling akulumei suma a arâ woi pet, mi ar akulumeina ndak yam pusâ kis.
5 Kid’a suma Siri suma Damas-sâ a mba á ndjun Hadadezer amul ma Soba-nid’a, David mi tchi sum mazina 22.000. 6 David mi min yima kaka hi azigar mama avo Siri d’a Damas-sa. Suma Siri-na a hulong yazi kä ad’umu, a hum tara.
Ata yima lara ma David nga mi i kuana, Ma didina nga mi hum ad’enga á kus ayîna yam suma pet.
7 David mi yoï mboriyo suma lora hi suma a ngom Hadadezer-râ, mi mbazi Jerusalem. 8 David mi yoï kawei ma hleuna ngola avo Tibat ki Kun, azì ma nglona hi Hadadezer-râ. Salomon mi min yima mbus ma ngolâ kagu ma murgulina kahle suma le sunda kur gong nga kud’ora hAlonid’a ki kawei ma hleu máma.
9 Tohu amul ma Hamat-na, mi hum ala: David mi kus wa azigarâ hi Hadadezer amul ma Soba-na pet! 10 Mi sun goroma Hadoram gen amulâ David á gum depa, á suburum mi, kayam dur ma mam dur ki Hadadezer mi kus kama, kayam Tohu mi dur ayîna ki Hadadezer mi. Tohu mi sunum ahle suma a lazi ki lora, ki kawei ma hapma ki kawei ma hleunina mi. 11 David mi tinizi irazi vazi mi Ma didina zlapa ki kawei ma hapma ki lora suma mam yozï abo andjaf suma pet suma mam kus kazina, nala, suma Edom-ma, suma Mowap-ma, suma Amon-na, suma Filistê-na ki suma Amale’â mi.
12 Abisai Seruya gorotna, mi tchi suma Edom-ma kur hor ra ndjuvuna 18.000. 13 Mi min yima kaka hi azigar mamina kur Edom pet; suma Edom-ma pet a ge yazi kä ad’umu.
Ata yima lara ma David nga mi i kuana, Ma didina nga mi hum ad’enga á kus ayîna yam suma pet.
Suma sunda hi David-na ndum mazid’a
(Gol 2 Sam 8.15-18)14 David mi te yam Israel-lâ pet, mi nga mi ka sariyad’a yam sum mama pet ki d’ingêra mi. 15 Jowap Seruya gorotna ni ma ngolâ hi azigarîna. Josafat Ahilut goroma ni ma b’ir zla d’a led’a kä na. 16 Sadok Ahitup goroma azi ki Abimelek Abiyatar goroma ni suma a ngat buzuna mAlonina. Savesa ni ma b’ir mbaktumba. 17 Benaya Jehojada goroma ni ma ngolâ hi suma Keret-na ki suma Pelet-na. David groma a nga kad’enga yam ahlena teteng mi.
© Azumeina Bible © Alliance Biblique du Tchad, 1999.
