Esdras 3 - Azumeina Bible 1999 (MPG)

Josue azi ki Zorobabel a hulong tin kud’ora

1 Kid’a Israel-lâ a mba avo hatazi kur azì mazina ata yima a kal kur til ma kid’iziyanina, a tok tazi d’igi sama tuna na avo Jerusalem.

2 Josue Josadak goroma ki b’oziyom suma ngat buzuna ki Zorobabel Salatiyel goroma ki b’oziyoma, a tchol a min yima ngal ahle suma ngat buzuna hAlona hi Israel-lîna á he he d’a hawa d’a ngala kam d’igi a b’ir kur gata hi Moise sana hAloninid’a na. 3 Azi nga le mandara suma ata yi mámina. Hina pî, a min yima ngal ahle suma ngat buzuna ata yam ma adjeuna, a nga he he d’a hawa d’a ngala mi Ma didina yorogo ki fladege. 4 A nga le vun til ma zlub’ud’a d’igi a b’ir kur gata hAlonid’a na, a nga he he d’a hawa d’a ngala burâ ki burâ ndak yam ndum mba Alona mi ngazizi burâ ki burîd’a. 5 Bugola, a nga he he d’a hawa d’a ngala teteu, he d’a hawa d’a ngala hi til ma deî awilinid’a, hi vun til ma lara ge ma a tinim iram vam mi Ma didinina ki he d’a hawa d’a hi suma lara suma a nga hat kur min mazid’a mi Ma didinid’a. 6 Kur bur ma avo’â hi til ma kid’iziyanina, a nde he he d’a hawa d’a ngala mi Ma didina, wani a ge nga ad’u gong nga kud’ora hi Ma didinid’a kä d’uo tua.

7 A he bege d’a hapa mi suma tchet ahinad’a ki suma tchet aguna. A hahle suma tena, ahle suma tched’a ki mbulâ mi suma Sidon-na ki suma Tir-râ, kayam a djagï agu sedre ma Liban-na woi kur alum ma ngolâ gak a mbam Jafa d’igi Sirus amul ma Perse-na mi heï vuna na. 8 Kur til ma mbàna hi biza d’a mbàd’ina kur mba mazid’a avo Jerusalem ata yima gong nga kud’ora hAlonid’a nga kuana, Zorobabel Salatiyel goroma, Josue Josadak goroma, b’oziyozi suma ngat buzu suma a arâ, suma hi Levi-na ki suma pet suma a tcholï kur magomba a mba avo Jerusalem-ma, a nde le sunda. A he sun ndata abo suma hi Levi suma bizazi dok mbà dok mbà d’oze kal dok mbà dok mbàna, kayam a gol sun nda led’a hi gong nga kud’ora hi Ma didinid’a. 9 Ata yi máma Josue ki groma ki b’oziyoma, Kadamiyel ki grom suma ad’u andjafâ hi Juda-nina, Henadat groma ki grozina ki b’oziyozi suma hi Levi-na pet, a tok tazi tu, a nga gol suma a nga le suna gong nga kud’ora hi Ma didinid’ina.

10 Kid’a suma sunda a ge ad’u gong nga kud’ora hi Ma didinid’a kä dad’a, suma ngat buzuna a nga tchola ata yi máma ki barud’a nglod’a ataziya, aduveina abozi mi, zlapa ki suma hi Levi suma Asaf gromina ki tchigiyeud’a abozi á gile Alona d’igi David amulâ hi Israel-lîna mi hazi vuna adjeu na. 11 A nga hle sawala, a nga gile Ma didina, a nga suburum ki delezi akulo ala: Mam mi Ma djivina, kayam we hohou mam mba yam Israel-lîd’a nga d’i dap pi. Suma pet a nga gile Ma didina ki delezi akulo ki furîd’a, kayam suma sunda a gum ad’u gong mamba kä da’.

12 Wani ablau suma ngat buzuna ki suma hi Levi-na ki suma nglo suma momorogei suma a we gong nga avokina, ata yima a ge ad’u gonga kä irazina, a nde tchina ki delezi akulo ngola. Suma dingâ ablaud’a a nga er ad’uzi akulo ki furîd’a mi. 13 Kayam ndata, ablaud’a ndak á we d’ala a tchi ni tchiya, d’oze a hle ni sawala zi ge d’a d’i, kayam suma a nga le vuna ngola, suma a nga humum sä woi ata yima deina.