Sun nda batrang nga kur leu d’a Juda-d’id’a
1 Gola! Salad’a Ma didin ma ad’engêm kal petna,
nga mi hlad’eng nga Jerusalem-mba
ki d’a Juda-d’a woyo,
nga mi hlad’eng nga azi fe ki tenid’a,
d’oze d’a azi fe ki mbinid’a woi mi.
2 Mba mi hle grangâ ki ma we durîna woyo,
mba mi hle ma ka sariyad’a ki ma djok vuna
ki ma wahle suma a nga mbana
ki ma bizeina woi mi.
3 Mba mi hle ma avok suma dok vahlâ
ki ma ngolâ ki ma de d’alâ ki ma d’alâ heîna
ki ma mbut ma kal teglesâ woi mi.
4 Ma didina mi dala:
An mba ni tinizi gugureina amuleina kaziya,
kem mba gureid’a a mba te kazi mi.
5 Suma a mba djop vun taziya,
nge nge pî mba mi djop vun ndrama,
gogorâ mba mi nde ma mamarâ huneîd’a,
ma ndak va nduo na mba mi nde
ma suma a nga hum ngolina huneîd’a mi.
6 Ata yi máma sana mba mi ve wiyema
kur azina habuma ndinding,
mba mi dum ala:
Ang nga ki baru d’a ngola.
Kayam ndata, ang kak amula kamiya,
ang te yam ambas sa b’lak kei ndata!
7 Kur bur máma mba mi hulong dazi ala:
An ndak á le va ki sed’egi d’i.
Vama te d’oze baru d’a ngola nga avo hatan ndi.
Agi tinindi amula yam suma d’i.
8 Gagazi, azì ma Jerusalem-ma mi b’lak keyo,
leu d’a Juda-d’a ti puka mi.
Kayam zla mazi d’a ded’a ki sun mazid’a
a kak djangûna ki Ma didina,
a nga ngulum avunam mi.
9 Irazi d’a gola nga d’i le glangâsâ kaziya.
A nga de woi yam tcho mazid’a bei ngeyet kä ba
d’igi suma Sodom-ma na.
Ni zla d’a hohoud’a kaziya,
kayam azi a nga hal ndaka yam azi tazid’a.
10 Agi nga dagi yam ma d’engzengâ ala
mam mba mi kak ki djivid’a;
ahle suma mi lazina, mba mi faziya.
11 Wani ni zla d’a hohoud’a yam sama asa’atna!
Mam mba mi fe ndaka,
kayam a mba wuragam yam sun
nda mam tam mi lat kabomba.
12 Ma didina mi dala:
Sum mana, gugureina a nga djobogi vunagiya,
aropma a nga te kagi mi.
Agi sum mana, suma avorogina a nga vid’igi woyo,
a tchi lovot ta agi tid’igi kura woi mi.
Sariya d’a ka d’a yam suma avok sumid’a
13 Ma didina mi min tam á ka sariyad’a,
mi tchol akulo á ka sariyad’a yam sum mama.
14 Nga mi ka sariyad’a yam mam suma nglona,
yam suma avok sumina,
nga mi dala: Agi b’lagagi guguzlud’a woyo,
ahle suma agi hurumuzi abo suma houd’ina a nga avo hatagi mi.
15 Salad’a Ma didin ma ad’engêm kal petna
mi dala: Ni kayam me ba,
agi mired’egi sum mana kä,
agi ndjirebegi suma hohoud’a kä woi na ge?
Arop suma djif suma avo Jerusalem-ma
16 Ma didina mi dala:
Arop suma Siyon-na yazi ad’enga,
a nga hle irazi akulo ki tita herengêleng,
a nga lop suma ki irazi d’a gola,
kayam azi nga tit tit ta kidjik tad’a,
a nga tchi b’alang ma asezina tchutchuî.
17 Kayam ndata, Ma didina mba mi yozi yazi woyo,
mba mi arazi gandilad’a mi.
18 Kur bur máma Ma didina mba mi pat ahle suma min tad’a woi pet, nala, ngangama, vama aropma a ve ki yazi kä na, b’alang ma asema yêyê ma kela, 19 ngangam ma humba, wulaka, lafeina, 20 mandila, b’alangâ, d’i’â, kop ma vo mbul ma his ma afufuîna, gan nda bel tad’a, 21 ngangam ma abona, ngangam ma atchina, 22 baru ma djif ma kal teglesâ, baru d’a nglo d’a huhuguid’a, baru d’a nglod’a, bud’omeina, 23 kotroma, baru d’a irat ndjâd’a, kadamula ki baru d’a tchuk kela.
24 Azi mba ar zla d’a le ni mbul ma his ma afufuîna ta,
a le ni mbul ma bud’a;
azi mba ar zla d’a djin d’i’â furîd’a ta,
a djin ni ziyona;
yazi mba d’i ar zla d’a ti se djifîd’a ta,
ti mba d’i yot ni woyo;
azi mba ar zla d’a tchu’î baru d’a ngol la djifîd’a ta,
a mba tchu’î baru d’a dodora ataziya;
azi mba ar zla d’a a mbut tazi djifîd’a ta,
a mba mbut ni tazi hohoud’a.
Arop suma modono suma Jerusalem-ma
25 Ndak Jerusalem, sum ma’â, a mba tchazi ki mbigeu d’a fiyaka,
grang ma’â, a mba tchazi avun ayîna.
26 Suma avun agrek ma Siyon-na
a mba zam taziya,
ndak mba d’i tchi horâ;
a mba hurumugu,
ndak mba d’i ar kaka kä aduk andagad’a mi.
© Azumeina Bible © Alliance Biblique du Tchad, 1999.
