A tin David iram vam amula yam Israel-lâ
(Gol 2 Sam 5.1-3)1 Israel-lâ pet a tok gen David avo Hebron, a dum ala: Gola! Ami ni simiyêngû, ami ni hliwing mi. 2 Avok ka Saul nga mi tamula kami tua d’a, ni ang ba, i ki Israel-lâ á durâ, ang hulong ki sed’ezi avo mi. Ma didina Alo mangâ mi dang ala: Ni ang ba, mba pol man suma Israel-lâ, ang mba kak amula kazi mi.
3 Ni hina ba, nglo suma Israel-lâ pet a mba gen amulâ David avo Hebron. David mi djin vunam ki sed’ezi avok Ma didina avo Hebron, a vom mbulâ kam á tinim amula yam Israel-lâ d’igi Ma didina mi de zlad’a avun Samuel na.
David mi hle Jerusalem
(Gol 2 Sam 5.6-10)4 David ki Israel-lâ pet, a i ngui Jerusalem mba a yat ala Jebus-sa, kayam suma Jebus suma a nga kaka yam andaga ndatina a nga kaka kat tua. 5 Suma Jebus-sâ a de mi David ala: Ang mba kal ka hî d’i!
Wani David mi hlazì ma ad’eng ma Siyon-na, mi arî Azì ma ngolâ hi David-na.
6 David mi dala: Sama i dur suma Jebus-sâ avok kikidjina, ni mam ba, mba mi mbut sama ngolâ á kak ngola hi azigarîd’a. Jowap Seruya gorotna mi i atazi durâ avok kikidji, mi kak ngola hi azigarîd’a.
7 David mi kak kur azì ma ad’eng máma. Ni kayam ndata ba, a yum ala Azì ma ngolâ hi David-na. 8 Bugola, mi min azì ma dingâ gevemu, tinï ad’ud’a Milo dei gak mi nguyum mbei pet. Jowap mi min azina ad’um mba ara.
9 David simiyêm nga mi yi avogovogo, kayam Ma didin ma ad’engêm kal petna, mi nga ki sed’emu.
Grang suma dur ayîna hi David-na
(Gol 2 Sam 23.8-39)10 Wana ni grang suma avok suma dur ayîna hi David suma a ndjunum zlapa ki Israel-lâ pet á hum ad’enga á tamula d’igi Ma didina mi he vuna yam sum mama na na. 11 Wana nablau grang suma durâ hi David-na: Isebäl ma Hakmoni-na goroma. Ni ma yam grang suma hindinina . Ni ma mi hlasap mamba, mi tchi suma kikis hindi suma a mba atam á dur ayîna kur bur ma tunina.
12 Ma kama ni Elazar Dodo ma Ahohi-na goroma. Ni ma aduk grang suma hindinina. 13 Mi nga zlapa ki David avo Pas-Damim. Kur yi máma suma Filistê-na a tok tazi á duruziya. Azigar suma Israel-lâ a ring avoroziya. Kur yi máma asine ma awu orsâ mi nga kua. 14 Elazar máma ki sum mama a tchol kur asinena, a ngomomu, a dur suma Filistê-na. Ma didina mi hazi ad’enga á kus ayîna yam suma Filistê-na.
15 Bur tu, suma hindi suma aduk grang suma dok hindina a i gen David yam ahinad’a go ki zul ahina d’a Adulam-mba. Filistê-na a ve nga anguvora kur hor ra Refa-d’a. 16 David mi nga kaka ata yima ad’eng máma. Wani kangâ hi Filistê-nina mi nga avo Betelehem. 17 David zla mbina lumu, mi dala: Ni nge ba, mi i mi gulunï mbiyo ma kur golong nga sä avun azì ma Betelehem-ma á tched’a ge?
18 Ata yi máma suma hindi ndazina a b’at kangâ hi Filistê-nina kad’enga, a gulï mbiyo ma kur golong nga sä avun azì ma Betelehem-mid’a, a mbam mi David. Wani David mi tchum nga d’i, mi hum he d’a hawad’a mi Ma didina, mi vom kä woi andaga. 19 David mi dala: Ma didina, ar an lahle ndazina d’i! Wana ni buzuna hi suma a he tazi woi á matnina d’uo zu? Mi tchum nga d’i. Wana ni vama grang suma hindi ndazina a luma.
20 Abisai Jowap wiyema ni ma ngolâ hi grang suma dok hindinina. Ni ma tchi suma kasap mamba yam tu kikisa hindina. Simiyêm mi yi aduk grang suma hindina. 21 Subur mamba kal suma dok hindina; ni hina ba, a tinim ngol mazid’a, wani mi ndak nga ki suma hindi suma avok ndazina d’i.
22 Benaya Jehojada ma Kapsel-lâ goroma ni sama zlam nde yina ki sun mam mba ndandal la mi lata heîna. Mi tchi suma Ariyel suma Mowap-ma mbà. Bur ma dingâ mi tchazlona kur golonga kur bur ma alona mi se nesâ kuana. 23 Bur ma ding ma hina kua, mi tchi ma Ezipte ma fiyagam go ki metred’a mbà ki nusina. Ma Ezipte máma mi nga kasapa abomu, wani Benaya mi i atam ki totogod’a, mi prut asap pa abomba, mi tchum kasap mamba tata go. 24 Wana ni vama Benaya Jehojada goroma mi luma. Ni hina ba, simiyêm mi yi aduk grang suma dok hindina. 25 Subur mamba kal ndrom suma dok hindina, wani mi ndak nga ki grang suma hindi suma avok ndazina d’i. David mi tinim ma ngolâ yam azigar suma avo hatama.
26 Suma ding suma aduk grang suma dok hindina ba wana: Asayel Jowap wiyema; Elanan Dodo ma Betelehem-ma mi; 27 Samot ma Haror-râ; Heles ma Palon-na; 28 Ira Ikes ma Tekowa-na goroma; Abiyezer ma Anatot-na; 29 Sibekai ma Husa-na; Ilai ma Ahowa-na; 30 Maharai ma Netofa-na; Helet Bäna ma Netofa-na goroma; 31 Itai Ribai ma Gibeya d’a Benjamin-nda goroma; Benaya ma Piraton-na; 32 Hurai ma Nahale-Gäs-sâ; Abiyel ma Araba-na; 33 Azimavet ma Bahurim-ma; Eliyaba ma Sälbon-na; 34 Bene-Hasem ma Gizon-na; Jonatan Sage ma Harar-râ goroma; 35 Ahiyam Sakar ma Harar-râ goroma; Elifal Ur goroma; 36 Hefer ma Mekera-na; Ahiya ma Palon-na; 37 Hesro ma Karmel-lâ; Närai Esbai goroma; 38 Joel Natan wiyema; Mibar Hagri goroma; 39 Selek ma Amon-na; Narai ma Berot ma nga mi zi ahle suma sïna hi Jowap ma Seruya gorotnina; 40 Ira ma Jeter-râ; Garep ma Jeter-râ mi; 41 Uri ma Het-na; Zabat Alai goroma; 42 Adina Siza ma Ruben-na ni ma avok suma hi Ruben-nina, ni ma nga zlapa ki azigar suma dok hindinina; 43 Hanan Mäka goroma; Josafat ma Meten-na; 44 Uziya Astarot goroma; Sama ki Jehiyel Hotam ma Arower-râ goroma; 45 Jediyael Simri goroma; wiyema Joha ma Tis-sâ; 46 Eliyel ma Mahava-na; Jeribai ki Josaviya Elnäm groma; Jitma ma Mowap-ma; 47 Eliyel, Obed ki Jäsiyel ma Soba-na mi.
© Azumeina Bible © Alliance Biblique du Tchad, 1999.
