Ma tchona
1 B’oziyomina, ami nga tchenegi yam mbad’a hi Salad’a Jesus Christ-sa, yam tok meid’a ki sed’emba mi. 2 Ar djib’er magid’a ti mbut atogo zak d’oze vunadigagi d’i pat yam djok vuna hi sa d’oze yam wal la tchid’a d’oze yam mbaktum mba ala ti tcholï ni hatami ala: Burâ hi Salad’ina mi mba wa da d’a d’i. 3 Kayam ndata, ar sa lobogi ki zla d’a ding ngi. Kayam avok bur máma bei mba tua d’a, ablau suma a mba ar lovota hAlonid’a woyo, Ma tchona mba mi nde tam mbei ir suma, ni ma nga kam á bad’a woina. 4 Ni ma mba kak djangûna kahlena pet suma a nga yazi ala Alona na d’oze ahle suma a nga kud’urozina, mba mi hle yam akulo gak mi i kak kur gong nga kud’ora hAlonid’a ala mam tamba nAlona.
5 Agi djib’eregi nga yam zla d’a an dagizi kid’a an nga ki sed’egi tua d’a d’uo zu? 6 Wani agi wagi vama d’el Ma tchona ki tchetchembina, gak kur bur ma mba mi nde tam mbei ir sumina. 7 Ki tchetchemba, ad’eng nga mudurid’a hi Ma tchonid’a nga d’i le sunda, wani vama d’elema nga gak bur ma a mba hlum mbeina. 8 Ata yi máma, Ma tchona mba mi nde tam mbei ir suma. Ni ma Salad’a Jesus mba mi tchum mbei ki fo d’a avunambina, mba mi b’lagam mbei ki b’o mamba fata mam mba mi mbad’a. 9 Ma tcho máma mba mi mba ni kad’enga hi Seitan-nda á lahle suma ndandal suma lara ge pet ki simat ta ka zlad’a, 10 á lop suma a nga ba woina pet, kayam azi noî á le yam gagazid’a á fe suta. 11 Kayam ndata, Alona mba mi hazi djib’er ra vita kuruzi á he gagazid’a yam zla d’a kad’a. 12 Kayam suma pet, suma a he nga gagazid’a yam gagazid’a d’uo wani tazi d’i lazi djivid’a ni yam tchod’ina, Alona mba mi kazi sariyad’a kaziya.
Alona mi managi avok dei á sud’ugiya
13 B’oziyomi suma Salad’a mi le kagi heîna, ami nga lami mersi mAlona teteu kagiya. Agi ni suma Alona mi managi avok dei á fe suta yam ad’enga hi Muzuk mam ma mbud’ugi sum mama yam gagazi d’a agi hatina. 14 Ni kayam ndata ba, Alona mi yagi yam Zla d’a Djivi d’a ami tchagizi walata á suburugi zlapa ki Saleina Jesus Christ. 15 Kayam ndata, b’oziyomina, ar agi kagagi ngingring kur hat ta ami had’agizid’a ki zla d’a ami dagizid’a ki mbaktum mba ami b’irigizid’a mi.
16 Ar Saleina Jesus Christ tamba kAbui Alo ma mi le keina, mi b’lengeî huri b’leng nga didinda yam suma mamba ki tin hur ma djivina, 17 mi b’lengêgi hurugiya, mi siragi ngingring á le sunda djivi d’a lara ge pet ki zla d’a djivid’a.
© Azumeina Bible © Alliance Biblique du Tchad, 1999.
