Samson mi kus vun agrek ma Gaza-na woyo
1 Samson mi i avo Gaza, mi watcha d’a gaulangâ nga kua, mi zlap ki sed’ed’u. 2 A de mi suma Gaza-na ala: Samson mi mba nga ka hî, a i a nguyumu, a burum kä avun agre’â hazì ma ngolîna, a bur kä andjege ndata hawa tchugot. A dala: Tcha yorogo ei mba tchiziya! 3 Samson mi bur kä gak tcha andjege dangâla, mi tchol akulo, mi ve bap ma avun agre’îna, mi pat agu ma avun agre’îna ki zla tam djak ki kawei ma atama, mi yozi kelem mi i tchuguzi sä yam ahina d’a ngagad’a yam Hebron d’ara.
Delila ti he Samson ndei abo suma Filistê-na
4 Bugola, atcha d’a dinga ti nga kaka kur hor ra Sorek-ka d’a a yat ala Delila, Samson hurum vad’u. 5 Amulei suma Filistê-na a i geved’u, a dat ala: Ndak i lobom á we d’ala ad’eng mam mba tcho tcho ndata ti tcholï ni lara ge d’a? Ni nana ba, ami mba kuzumi kam ami mba hulongôm yam kä ge? Hina wani, nge nge pî adigami mba mi hak bege d’a hapa kikisa dogo yam tutu.
6 Delila ti de mi Samson ala: Ang tagan ad’eng mang nga tcho tcho ndata, a djiningî ki me ba, a hulongông yang kä ge?
7 Samson mi hulong dat ala: Le a djinin ki ziyo ma ari ma gan ki yeûd’ina kid’iziya ni, an mba ni mbut amangeîd’a, an mba ni mbut ni d’igi suma dingâ pet na mi.
8 Amulei suma Filistê-na a he ziyo ma ari máma kid’iziya mi Delila, ti djin ki Samson. 9 Doli na ni d’igi suma a nga burâ kä gevet klavi kur gonga. Ti de mi Samson ala: Samson, golï Filistê-na kang nga! Mi tchal ziyo máma d’igi sana mi tchal ziyo ma luluî ma akud’a ngalama na. A we nga ad’u ad’eng mam ndata d’i.
10 Delila ti de mi Samson ala: Gola! Ang lazan ni laza, ang kan ni zlad’a. Ki tchetchemba, an nga ni tchenengû, ang danu, a djiningî ki me ge?
11 Mi dat ala: Le a djinin ki ziyo ma awili ma bei le ki sunda ba na ni, an mba ni mbut amangeîd’a, an mba ni mbut ni d’igi suma dingâ pet na mi.
12 Delila ti yo ziyo ma awilina, ti djinim kiya, ti dum ala: Samson, golï Filistê-na kang nga! Doli na ni d’igi suma a nga burâ kä gevet klavi kur gonga. Mi tchal ziyo ma nga djinda del aboma woi d’igi sana mi tchal ziyo baru d’a para woina.
13 Delila ti de mi Samson ala: Gak ini angî atan lasa na, ang kan ni zlad’a hawa! Ang danu, a djiningî ki me ge?
Mi dat ala: Ndak gan yan nda ge d’a kid’iziyad’a ki baru d’a tchil la d’igi erdjena na d’a.
14 Ti b’alat kä ki tcheblena, ti dum ala: Samson, golï Filistê-na kang nga! Mi zlit akulo, mi pat tcheblena woi akulo ki baru d’a d’igi erdjena na d’a atam tutum.
15 Ti dum ala: Ni nana ba, ang dala ang hurung vanu ba, hurung nga tu ki sed’en nduo ge? Gola! Ki tchetchemba, ang lobon ndei yang hindi, ang nga bei tagan ad’eng mang nga tcho tcho ndata ba!
16 Kid’a ti nga b’lagam djib’erem burâ ki burâ ki zla mat ta ti nga d’i hum ndaka mi d’a, ve ta mamba nga d’uo d’a, mi dala: Hotei an mid’a! 17 Mi hat hurum pet, mi dala: Sa mi tinin nga vel kan ndi. Kayam a tinin iran van mAlona ei ni kur asun dei. Le a welen yan ndeyo ni, ad’engên ti nga d’uo, an mbut namangeîd’a, an mba mbut ni d’igi suma dingâ pet na mi.
18 Delila ti we dala mi hat wa hurum pet dad’a, ti ge sunda ti yï amulei suma Filistê-na, ti dazi ala: Ki tchetchemba, agi mbeyegiya! Mi han wa hurum pet da’. Amulei suma Filistê-na a mbeï gevet ki beged’a aboziya. 19 Samson mi bur sena adigad’u, ti yi sana. Mi mba, mi welem yam mba ge d’a kid’iziyad’a woyo. Ti tin ad’ud’a á hulongôm yam kä, ad’engêm nga d’uo d’a.
20 Ti dum ala: Samson, golï Filistê-na kang nga! Mi zlit akulo, mi dala: An nga ni nde woi d’igi avok deid’a na, an nga ni prut tan ndeyo. Wani mi we nga d’ala Ma didina mi wal lei ki sed’emu d’a d’i. 21 Suma Filistê-na a vumu, a tchom iram mbeyo, a i ki sed’em Gaza, a djinim ki kawei ma hleuna, a tinim á lut awuna kur dangeina.
22 Wani yam mba a welet teid’a, ti tum hara.
Sun nda atchapa hi Samson-nda ki mat mama
23 Wani bur tu amulei suma Filistê-na a tok tazi á hahle suma ngat buzuna malo mazina Dagon, a le furîd’a, a dala: Alo meina mi hei wa Samson mei ma djangûna aboya.
24 Ata yima a wuma, a subur alo mazina, a dala: Alo meina mi hei wa Samson mei ma djangû ma mi b’lagei ambas meid’a mi dabei tchid’ina aboya.
25 Kur furî mazid’a a dala: Agi i yagï Samson mi mbeï mi lei zla d’a sanda. A yï Samson ndei kur dangeina, nga mi lü djongâ avoroziya. A tcholom aduk grak ka hur gongid’a. 26 Samson mi de mi gor azong ma vum aboma ala: Ang aran an i ni vabon ata grak ka djik gonga akulod’a, an i ni deng tan kua.
27 Andjofâ karopma a nga oîd’a hur gonga, amulei suma Filistê-na a nga kua. Suma kur gongina pet andjofâ karopma a ni go ki 3000, a nga gol Samson luna. 28 Ata yi máma Samson mi tchen Ma didina ala: Salad’a Ma didina, an nga ni tchenengû, Alo mana, ang djib’er kanu! Ang han ad’enga ki tchetchem mba wanda hina go, ar an sä atchugulun ki suma Filistê-na yan hina tu yam iran nda mbà d’a a tchot teid’a.
29 Samson mi vabom ata grak ka mbà d’a aduk ka djik gonga akulod’a, mi vabom ma ndjufâ ata hid’a, mi vabom ma gulana ata hid’a mi. 30 Samson mi dala: Ar an mit ki suma Filistê-na! Mi oî kad’engêm pet; gonga hirif kä yam amulei suma Filistê-na ki suma pet suma a nga kuana. Suma Samson mi tchazi ki sed’ema ablawazi kal suma mi tchazi kid’a mi nga ki iramba.
31 B’oziyoma ki suma habuma pet a i hlumîya, a mba tozom aduk Sora ki Estawol kur zula habum Manowa-d’a.
Mi kak ma ngolâ avok Israel-lâ ni bizad’a dok mbà.
© Azumeina Bible © Alliance Biblique du Tchad, 1999.
