Ose namul ma danana hi Israel-lîna
1 Kur biza d’a dogo yam mbà d’a Ahas amul ma Juda-na nga mi tamulid’a, Ose Ela goroma mi kak amula yam Israel-lâ avo Samari, mi tamula bizad’a zlengâ. 2 Mi le sun nda tchod’a avok Ma didina, wani nga d’igi amulei suma Israel suma a tamula avoroma na d’i. 3 Salmanasar amul ma Asiri-na mi mba mi dur ayîna ki Ose. Ose mi hulong ge yam kä ad’umu, mi hum tara. 4 Wani bugola, Ose mi ndjak vunam ki sum mama á tchol huneîd’a ki sed’emu, mi ge sunda ata So amul ma Ezipte-na, mi noî á he tara mamul ma Asiri-na mi. Ata yima Salmanasar mi hum zla ndatina, mi ve Ose, mi djinim ki kindjingâ, mi gum dangeina.
(c) HLED’A HI SAMARI-D’A
Salmanasar mi hle Samari
5 Bugola, Salmanasar mi tchol durâ kandaga d’a Israel-la pet, gak mi mba Samari. Azigar mama a nguyut kä gak bizad’a hindi. 6 Kur biza d’a zlengâ d’a Ose nga mi tamulid’a, amul ma Asiri-na mi hlazì ma ngol ma Samari-na, mi yo Israel suma kurâ mi izi magomba, mi izi Asiri, mi tchuk suma dingâ kur ambas sa Hala-d’a, mi tchuk suma dingâ kur Gozan avun alum ma Habor-râ, mi tchuk suma dingâ kur azì ma nglo ma Mede-na mi.
Zla d’a mba ki b’laka yam leud’a hi Israel-lid’a
7 Ndak ndata ti mba yam Israel-lâ, kayam azi le tchod’a avok Ma didina Alo mazi ma pad’azï woi yam andaga d’a Ezipte-d’a abo amulâ Faron-na, a kud’or alo ma ding ma tetengâ mi. 8 Azi hle zlad’a handjaf suma Ma didina mi digizi woi avorozi adjeu á arazi yinina, azi hle zla d’a ding nga amulei suma Israel-lâ a hlad’ï a mba hazizid’a mi. 9 Azi lahle suma ding suma tcho suma sana mi ndak á lazi d’uo na gumun avok Ma didina Alo mazina. Azi min yima ndingâ kur azì mazi ma nglo ma lara ge pet, tinï ad’ud’a avun azì ma azigarâ a nga kak ndjola kuana, gak mba avun azì ma nglo ma ad’eng ma ngunguna mi. 10 Azi ndjar ahina d’a tcheta akulo, azi ndjar agu ma murgulina ped’a akulo malo d’a a yat ala Asera-d’a yam yima nding ma lara ge pet ad’u agu ma lara ma angusâ pet mi. 11 Azi ngal dubang ma his djivid’ina yam yima nding máma ata yima lara ge pet, d’igi andjaf suma Ma didina mi digizi woi avorozi á arazi yinina na. Azi le sun nda tcho d’a lara ge pet á zal hur Ma didina. 12 Azi kud’or filei ma teteng ma Ma didina mi dazi kam ala azi kud’urom mbuo na.
13 Wan pî, Ma didina mi sun mam suma djok vuna pet ki suma a nga wahle suma a nga mbana pet á ge hum Israel-lâ ki suma Juda-na kad’enga ala: Agi hulongôgiya, agi aragi sun magi d’a tchod’a woyo, ar agi gagi yagi kä ad’u vun man ma hed’a ki zla manda, ar agi tid’igi yam gat ta an he vuna kat mabuyogi ngolo avun azungeî man suma djok vuna ki hurugi pet mi. 14 Wani sum ndazina a nga hum vun ndi, a le yam mba ad’enga d’igi abuyozi ngolo suma a he nga gagazid’a yam Ma didina Alo mazina d’uo na na. 15 Azi ar gata hAlonid’a ki vun ma djin ma mam djinim kabuyozi ngolona ki ge hum mba mi gazi humazi kad’engid’a woyo. Azi i bugol ahle suma hawa ya’â, azi tazi a mbut tazi vama hawa ya’â mi. Azi tit bugol andjaf suma nguyuzi suma Ma didina mi dazi ala a tit blogozi d’uo na. 16 Azi ar vun ma hed’a hi Ma didina Alo mazinina woi pet, azi yor lora gro amuzleina mbà, azi min agu ma murgulina malo d’a a yat ala Asera-d’a, azi grif kä a kud’or ahle suma akulona pet, azi le sunda malo ma a yum ala Bäl-lâ mi. 17 Azi ngal grozi suma andjofâ ki grozi suma aropma woi kad’ud’a d’igi vama ngat buzu ma ngala na, azi ve kumana, a djop fileina, a he tazi á le sun nda tchod’a avok Ma didina á zalam hurumu. 18 Ata yi máma Ma didina hurum zal ngola yam Israel-lâ, mi digizi woi avoromu. Andjafâ hi Juda-na mi arî mam hol.
19 Wani suma Juda-na tazid’a pî a ge nga yazi kä ad’u vun ma hed’a hi Ma didina Alo mazinina d’i, azi hle ni zla d’a Israel-lâ a lata. 20 Kayam ndata, Ma didina mi noî andjaf Israel-lâ woi ki zla tazi pet, mi mbud’uzi zulona mi hazi abo suma á hurumuzi ahle mazina, gak mi digizi woi dei ki sed’emu.
21 Ata yima Ma didina mi prut leud’a hi Israel-lîd’a abo suma hi David-na woina, Israel-lâ a tin Jerobowam Nebat goroma amula. Mam walazi woi ki Ma didina, mi tinizi á le tcho d’a ngola. 22 Ata yi máma Israel-lâ a he tazi á le tcho d’a lara ge pet ta Jerobowam mi lata, a arat nga woi d’i. 23 Kayam ndata, Ma didina mi digizi woi dei avoromu, mi izi magomba yam andaga d’a Asiri-d’a gak ini d’igi Ma didina mi de woi avun azungeî mam suma djok vuna pet na.
A yoï andjaf suma dingâ, a mbazi Samari
24 Amul ma Asiri-na mi yoï suma Babilon-na, suma Kuta-na, suma Ava-na, suma Hamat-na ki suma Sefarvayim-ma, mi tchuguzi kur ambas sa Samari-d’a balum Israel-lâ. Azi hlazì ma ngol ma Samari-na, a kak kur azì mat ma nglona pet. 25 Wani ad’u tinda hi kak mazid’id’a azi le nga mandara Ma didina d’i. Kayam ndata, Ma didina mi sunï azlona taziya, mi vik suma dingâ ablaud’a adigaziya. 26 Sana mi de mamul ma Asiri-na ala: Suma ang yozi djogozi sä kur azì ma nglo ma Samari-nina a we nga lovota á he ngola malo ma yam andaga ndatina d’i. Kayam ndata, alo máma mi sunï azlona mi tchazi woyo!
27 Kayam ndata, amul ma Asiri-na mi he vuna ala: Agi hlagi ma ngat buzu ma Samari-na tu aduk suma agi yozï magombina. Ar mi i sä hî, mi had’azi lovot ta azi he ngola malo ma kur andaga ndatina. 28 Kayam ndata, ma ngat buzuna tu ma a vumï Samari-na, mi mba mi kak Betel nga mi had’azi nana ba azi le mandara Ma didina ge.
29 Wani andjaf suma lara pî a min alo mazina, a tinim kur gongîyo suma a tinizi irazi vazi suma suma Samari-na a minizi adjeu yam yima ndingîna. Andjaf sum ndazina nge nge pî mi le hina kur azì ma ngol ma mam nga kaka kuana. 30 Suma a yozï Babilon-na a min alo ma a yum ala Sukot-Benot-na, suma Kuta-na a min alo ma a yum ala Nergal-lâ, suma Hamat-na a min alo ma a yum ala Asima-na, 31 suma Ava-na a min alo ma a yum ala Nibas-sâ ki ma a yum ala Tarta’â mi. Suma Sefarvayim-ma tazid’a a ngal grozina woi kakud’a d’igi vama ngat buzu ma ngala na malo mazi ma a yum ala Adramele’â ki ma ding ma a yum ala Anamele’â. 32 Azi tazi a nga le mandara Ma didina, wani a man suma dingâ adigazi á mbut suma ngat buzuna kur gongîyo mazi suma ata yima ndingîna mi. 33 Azi nga le mandara Ma didina gak mi na, a nga le sunda malo mazina d’igi andjaf suma a yozï adigazina a nga le adjeu na mi.
34 Gak ini a nga tit ni yam zla mazi d’a adjeud’a, wani a nga le mandara Ma didina d’i. Azi nga tit yam vun mazi ma hed’a ki gat mazi d’a adjeud’a memet ti, a nga tit yam gata ki vun ma he ma Ma didina mi hum mandjafâ hi Jakob ma mam yum ala Israel-lâ na d’uo mi.
35 Israel ni suma Ma didina mi djin vunam ki sed’ezi mi hazi vuna ala: Ar agi lagi mandara alo ma ding ngi, ar agi grivigi kä avorom mbi, ar agi lum sunda d’i, ar agi hagizi vama ngat buzuna d’uo mi na. 36 Wani ar agi lagi ni mandaran an Ma didin ma ni buzugugï woi kur ambas sa Ezipte-d’a ki sib’ik man nda kal teglesa ki bigan nda zid’a woi akulo kan zid’a, ar agi grivigi ni kä navoron an tu, ar agi han ahle suma ngat buzuna mi. 37 Ar agi gagi yagi kä ad’u gat manda, ad’u vun mam ma he ma an b’irigizi kur mbaktumba tetengâ, ar agi tid’igi kazi tala agi lagi mandara alo ma ding nguo d’a. 38 Ar agi maragi yam vun ma djin ma an djinim ki sed’egina d’i, ar agi le mandara alo ma ding ngi. 39 Ar agi lagi ni mandaran an Ma didina Alo magina. Hina wani, an mba ni sud’ugi woi abo magi suma djangûna pet.
40 Wani andjaf sum ndazina a min hum mbi, a nga le ni sun mazi d’a azi nga lat adjeu d’eid’a. 41 Wani azi nga le mandara Ma didina gak mi na, a nga le sunda mi filei mazi ma tcheta gak mi. Grozina ki grozi ngolona a nga lahle suma abuyozi a lazina gak ini.
© Azumeina Bible © Alliance Biblique du Tchad, 1999.
