Od’a
1 An le nga ni de vuna hi suma ki ma hi malaikanina pî, le an nga ni le od’a d’uo ni, zla man nda ded’a ni d’igi kawei ma a nga tumum keng kengâ na, d’oze d’igi agileng ma nga mi tchi kling klingâ na. 2 Le an nga ki he d’a hawad’a á djok vun Alona, le an nga ki wed’a á wäd’u zla d’a mudurid’a pet, le an nga ki he gagazi d’a ndak á djok ahinad’a woid’a pî, le an nga ni le od’a d’uo ni, an ni va d’i. 3 Le an b’rau ahle mana mi suma hohoud’a pet, le an he tan á ngala woi pî, le an nga ni le od’a d’uo ni, ndata ni sun nda hawa yaka.
4 Sama od’a nga mi ve tamu, nga mi le djivid’a, nga mi le yungôr ri. Sama od’a nga mi subur tam mbi, nga mi le yam mba ad’eng nguo mi. 5 Sama od’a nga mi le vama zulo d’i, nga mi hal va kayam tam mbi, hurum nga mi zal atogo d’i, nga mi ve sa kurum mbuo mi. 6 Sama od’a tam nga d’i lum djivid’a yam tchod’a d’i, wani tam mbi lum djivid’a ni yam gagazid’a. 7 Mi nga mi so tam yam ahlena pet, nga mi he gagazid’a yam ahlena pet, nga mi tin hurum yam ahlena pet, nga mi ve tam yam ahlena pet mi.
8 O mamba nga d’i kak didin. Zlad’a hi suma djok vun Alonid’a mba d’i kal leyo, he d’a hawad’a á de vuna hi suma tetenga mba d’i dap peyo, wed’a hi sumid’a mba d’i kal lei mi. 9 Kayam ei wei nga ad’ud’a tetet ti, ei ndak á djok vun Alona woi tetet tuo mi. 10 Wani fata vama ndak memetna mi mba wa ni, vama bei ndak memetna mba mi dap peyo.
11 Kid’a an gogorâ tua d’a, an de zlad’a, an djib’er d’igi gogorâ na. Wani ata yima an djeng sanina, an wal lei kahlena hi gogorîna. 12 Ki tchetchemba, ei nga wei woi tetet ti, d’igi sana nga mi gol tam kur kotroma na. Wani ata yi máma ei mba wei tei ira ki ira. Wani ki tchetchemba, an we nga tetet ti, wani ata yi máma an mba ni we woi tetet d’igi Alona nga mi wan tetet na mi.
13 Ki tchetchemba, ahlena hindi a nga: Gagazi d’a hed’a, hur ma tinda ki od’a. Wani ma kalazi ki ngolina ni od’a.
© Azumeina Bible © Alliance Biblique du Tchad, 1999.
