1 Amuleina 14 - Azumeina Bible 1999 (MPG)

Amul la ted’a hi Jerobowam-mba nga d’i i avogovogo

1 Kur atchogoi ndata Abiya Jerobowam goroma, mi ve tugud’eid’a. 2 Ata yi máma Jerobowam mi de mamamba ala: Ndak mbut tagu, ar a wak ala nda’î amanda d’i. Bugola, ndak i Silo ata yima Ahiya ma djok vun Alona mi sä kuana; ni sama mi dan ala an mba ni tamula yam Israel-lâ na. 3 Ndak yo avungôna abok dogo ki fangasuna ki gugur ra mbul ayuma tu, ndak i fumu. Mam mba mi dak ad’u vama mba mi le goreinina.

4 Atchad’a hi Jerobowam-mba ti le hina. Ti i Silo avo hi ma djok vuna Ahiya. Mam mi mamara kikra, iram mbi duk kei mi. 5 Wani Ma didina mi dum ala: Atchad’a hi Jerobowam-mba nga d’i mba, mba d’i mbut tat atcha d’a dinga, mba d’i djobong yam gorot ma nga tugud’eid’ina. Ang hulongôt humba hina hina.

6 Kak hina ndjö wani, Ahiya mi humut aset ma tita avun aziyamu, mi de ki delem akulo ala: Atchad’a hi Jerobowam-mba, ndak kalïya! Ni kayam me ba, ndak mbut tak d’igi atcha d’a dinga hina na ge? Kayam ndata, an nga ki zla d’a ad’enga á daksiya.

7 Ndak hulong de mi Jerobowam ala: Wana ni zla d’a Ma didina Alona hi Israel-lîna mi data: Ni an ba ni tining aduk suma, ni an ba ni tining avok man suma Israel-lâ mi. 8 An prut leud’a abo suma hi David-na, an hangziya. Wani ang hle nga zlad’a hazong mana David ma ge yam kä ad’u vun man ma hed’a ma mi lan sunda ki hurum tu bei mi le vama tcho avoron yam tu ba na na d’i. 9 Ang le tchod’a kal suma avorongâ pet, ang i yor alo ma dingâ teteng á zalan hurunu, ang aran ndei ang han azigang mi. 10 Kayam ndata, an nga ni mba ndaka yam sum mangâ, an nga ni dap sumala ni simiyêngû na magumeina d’oze gro vuta woi aduk Israel-lâ, an mba ni yagang andjavang ngei d’igi suma a yak djimgilâ woi na. 11 Suma avo hi Jerobowam pet ma mit avona, adureina a mba mud’umu; ma mi mit abageina, aluweina a mba tumu. Wana ni vama Ma didina mi duma.

12 Ata yi máma ma djok vuna Ahiya mi de kua ala: Ndak atchad’a hi Jerobowam-mba, ndak hulong avo hatagu. Ata yima ndak mba d’i tin asek avo hur azì ma ngolîna, goro’â mba mi mid’a. 13 Israel-lâ pet a mba tchimu, a mba tozom mi. Aduk suma hi Jerobowam-ma pet ni mam tu ba, a mba tozomu, ni mam tu aduk suma avo hi Jerobowam-ma ni vama djivi ma le Ma didina Alona hi Israel-lîna tam djivid’ina. 14 Wani Ma didina mba mi man amulâ yam Israel-lâ, ni mam ba, mba mi dap suma avo hi Jerobowam-ma woyo. Ki tchetchemba, an de nana d’ei ge? 15 Ma didina mba mi to Israel-lâ, a mba giget d’igi ped’eu d’a avun mbinid’a na. Ma didina mba mi yozi woi yam andaga d’a djivi d’a mi hat mabuyozi ngolod’a, mba mi ndjoyôzi woi abo hî avun alum ma Efrat-na. Wana ni vama mba mi mba kazina, kayam azi yor alo ma dingâ á zal hur Ma didina. 16 Mba mi arazi woyo, kayam Jerobowam mi zud’uzi á le tchod’a.

17 Atchad’a hi Jerobowam-mba ti iya, ti kal avo Tirsa; ata yima ti tin aset akulo yam agu ma vun gong matina, gorotna mi mid’a. 18 A tozomu; Israel-lâ pet a tchim d’igi zla d’a Ma didina mi dat avun azong mam ma djogom vunama Ahiya-d’a na mi.

19 Sunda hi Jerobowam mba ara kayî mam ma durâ ki leu mam mba ted’a pet, a b’irizi nga kä kur Mbaktum mba de zlad’a yam Sunda hAmulei suma Israel-lîd’a. 20 Jerobowam mi tamula bizad’a dok mbà yam mbà, mi mit mi i azulei kä ad’u abuyom ngolo. Goroma Nadap mi vrak tamula blangâmu.

(b) AMULEI SUMA JUDA-NA KAMULEI SUMA ISRAEL-LÂ

(4.21—16.34)

Amul la ted’a hi Robowam-mba nga d’i i avogovogo

(Gol 2 Sun hAm 12.1-16)

21 Kid’a Robowam Salomon goroma mi kak amula yam suma Juda-nid’a, bizamî dok fid’i yam tu. Asum a yat ala Näma, ni d’a Amon-nda. Mi tamula avo Jerusalem bizad’a dogo yam kid’iziya. Nazì ma ngol ma Ma didina mi manam kur ambas sa Israel-la pet á kak aduk sum mama kuana. 22 Andjafâ hi Juda-na a lahle suma tchona avok Ma didina, a zalam hurum ki tcho mazi d’a led’a kayam tcho mazi d’a led’a ti kal la habuyozi ngolo d’a. 23 Azi min yina ata yima ndingâ, a tchet ahinad’a, a tinit akulo yam ahuniyô suma djodjohlâ kad’u agu ma d’uf ma lara ge pet mi. 24 Azi nga kandjuvei suma gaulangâ karop suma gaulangâ kur ambasa. Azi nga lahle suma lara ge pet handjaf suma Ma didina mi digizi woi adjeu á ar yina mi Israel-lîna.

25 Kur biza d’a vahl hla Robowam nga mi tamulid’a, Sisak amul ma Ezipte-na mi mba mi dur suma Jerusalem-ma. 26 Mi yo ndjondjoî d’a kur gong nga kud’ora hi Ma didinid’id’a ki ndjondjoî d’a kur azina hamulîd’a pet, mi yo mboriyo suma lor suma Salomon mi yorozina pet mi. 27 Wani amulâ Robowam mi yor mboriyo suma kawei ma hleuna, mi vragazi balumu, mi hazi abo azigar suma nglo suma a ngom vun agre’â hamulîna. 28 Wani bur ma lara ma amulâ mi i kur gong nga kud’ora hi Ma didinid’ina, azigar suma ndjola a yo mboriyo ndazina woyo. Bugola, a hulongôzi ata yazi ma ngomba.

29 Sunda hi Robowam mba ara kahle suma mi lazina pet a b’irizi nga kä kur Mbaktum mba de zlad’a yam Sunda hAmulei suma Juda-nid’a.

30 Kid’a Robowam nga ki iramba, nga mi dur ayîna ki Jerobowam teteu.

31 Robowam mi mit mi i azulei kä ad’u abuyom ngolo. A tozom gevezi kur Azì ma ngolâ hi David-na. Asum a yat ala Näma, ni d’a Amon-nda. Goroma Abiyam mi vrak tamula blangâmu.