1 Ma didina mi de mi ma djogom vunama Jehu Hanani goroma ala: Ang i de mi Bäsa ala: 2 Ni an ba ni pad’angî aduk gugud’upa handagad’id’a, ni tining yam man suma Israel-lâ. Wani ang nga tit tchod’a d’igi Jerobowam na, ang nga zut Israel-lâ á le tchod’a, a nga zalan hurun ki tcho mazi d’a led’a. 3 Kayam ndata, an mba ni b’lagang ang Bäsa ki sum mangâ woyo, an mba ni le ki sed’egi d’igi an le ki suma hi Jerobowam Nebat goromina na. 4 Sa mang ma mit avo kä na, adureina a mba mud’umu; ma mit sä abageina, aluweina a mba tum mi.
5 Sunda hi Bäsa d’a ara kahle suma mi lazina kad’eng mam mba dur ayîna, a b’irizi nga kä kur Mbaktum mba de zlad’a yam Sunda hAmulei suma Israel-lîd’a.
6 Bäsa mi mit mi i azulei kä ad’u abuyom ngolo. A tozom avo Tirsa. Goroma Ela mi vrak tamula blangâmu. 7 Ata yima Ma didina mi de zlad’a mi ma djogom vunama Jehu Hanani goroma á de zlad’a mi Bäsa-d’ina, mi dumî yam zlad’a mbà:
D’a avoka, ni yamba Bäsa ki sum mama a le tchod’a avok Ma didina, a zalam hurum ki tcho mazi d’a led’a d’igi suma hi Jerobowam-ma na d’a;
D’a mbàd’a, ni yamba Bäsa mi tchi andjafâ hi Jerobowam-ma woyo.
Ela mi tamula yam Israel-lâ
8 Kur biza d’a dok mbà yam karagaya d’a Asa nga mi tamula yam suma Juda-nid’a, Ela Bäsa goroma mi kak amula yam Israel-lâ avo Tirsa, mi tamula bizad’a mbà. 9 Azong mama a yum ala Zimri, ni ma yam pus ma dur ayî ma hiuna, mi ndjak vunam ki suma dingâ á dur ayîna ki sed’emu. Wani amulâ Ela mi nga navo Tirsa avo hi Arsa ma yam azì ma amulina, nga mi tche, nga mi gurud’a. 10 Zimri mi kal kua, mi tchumu; ahle ndazina a le ni kur biza d’a dok mbà yam kid’iziya d’a Asa nga mi tamula yam suma Juda-nid’a. Zimri mi vrak tamula balum Bäsa. 11 Kid’a mi vrak tamula vraka, mi tchi suma hi Bäsa-na woi pet, mi ar nga sa tu d’i, andjavam mboze banam mbuo mi. 12 Zimri mi dap suma hi Bäsa-na woi pet d’igi Ma didina mi de zlad’a avun ma djogom vunama Jehu na. 13 Ahle ndazina a mba hina pet kayam Bäsa ki goroma Ela a le tchod’a, a zut Israel-lâ á le tchod’a, kayam azi zal hur Ma didina Alona hi Israel-lîna ki filei mazi ma hawa ya’â mi.
14 Sunda hi Ela d’a ara kahle suma mi lazina pet, a b’irizi nga kä kur Mbaktum mba de zlad’a yam Sunda hAmulei suma Israel-lîd’a.
Zimri mi tamula yam Israel-lâ
15 Kur biza d’a dok mbà yam kid’iziya d’a Asa nga mi tamula yam suma Juda-nid’a, Zimri mi kak amula avo Tirsa, mi le burâ kid’iziya. Azigar suma Israel-lâ a ve nga anguvora á dur ayîna kazì ma Gibeton ma nga kur leud’a hi Filistê-nid’a.
16 Kid’a azigar ndazina a hum ala Zimri mi ndjak vunam ki suma dingâ, mi dur kamulâ, mi tchumu d’a, ata yi máma hina wat azi pet a pat Omri ma ngolâ hi azigarîna, a tinim amula yam Israel-lâ. 17 Ata yi máma Omri ki azigar mama pet a ar azì ma Gibeton-na, a i kak sä Tirsa. 18 Ata yima Zimri mi wala azigarâ a hle wa azina da na, mi kal kur azì ma amula, mi do akud’a kamu, mi ngal tam mbeyo. 19 Ahle ndazina a mba hina kayam Zimri mi le tchod’a avok Ma didina; tit mamba ni tchod’a d’igi Jerobowam ma mi zut Israel-lâ á le tchod’ina na mi.
20 Sunda hi Zimri d’a ara ki vun ma ndjak ma mam ndjagama, a b’irizi nga kä kur Mbaktum mba de zlad’a yam Sunda hAmulei suma Israel-lîd’a.
21 Bugol matna hi Zimri-na, Israel-lâ a wal kä ad’u mbà. Suma hiuna a min ala Tipni Ginat goroma mi tamula, suma hiuna a min ala Omri mi tamula. 22 Wani suma ad’u Omri-na a kal yam suma hi Tipni Ginat goromina; Tipni mi mid’a, Omri mi tamula.
Omri mi tamula yam Israel-lâ
23 Kur biza d’a dok hindi yam tu d’a Asa nga mi tamula yam suma Juda-nid’a, Omri mi kak amula yam Israel-lâ. Mi tamula bizad’a dogo yam mbà, ni d’igi mi teï wa amula bizad’a woi Tirsa karagaya da’. 24 Bugola, mi i gen Semer, mi gus yima nding ma Samari-na abom ir bege d’a hapa 6000, mi min azina yam yima nding máma, mi yum ki simiyê sala yi máma Semer ala Samari. 25 Wani Omri mi lahle suma tchona avok Ma didina kal amulei suma a tamula avoroma pet. 26 Tit mamba ni tchod’a d’igi Jerobowam Nebat gorom ma mi zut Israel-lâ á le tchod’a á zal hur Ma didina Alona hi Israel-lîna ki filei mazi ma hawa ya’â na.
27 Sunda hi Omri d’a ara kahle suma mi lazina kad’eng mam mba dur ayîna, a b’irizi nga kä kur Mbaktum mba de zlad’a yam Sunda hAmulei suma Israel-lîd’a. 28 Omri mi mit mi i azulei kä ad’u abuyom ngolo. A tozom avo Samari. Goroma Ahap mi vrak tamula blangâmu.
Ahap mi tamula yam Israel-lâ
29 Kur biza d’a dok hindi yam klavandi d’a Asa nga mi tamula yam suma Juda-nid’a, Ahap Omri goroma mi kak amula yam Israel-lâ, mi tamula avo Samari bizad’a dok mbà yam mbà. 30 Ahap mi hahle suma tchona avok Ma didina kal amulei suma a tamula avoroma pet. 31 Mi golî d’igi ni vama akid’eina iram na á tit bugol tcho d’a Jerobowam Nebat goroma d’a mi lata, mi i ve ni Jezabel Etbäl amul ma Sidon-na goromba, mi nde le sunda malo ma a yum ala Bäl-lâ, nga mi kud’urom mi. 32 Mi min gong nga kud’ora mi Bäl avo Samari, mi min yima ngal ahle suma ngat buzuna kua mi. 33 Mi tin alo d’a a yat ala Asera-d’a kua. Ahle suma mam lazina pet, a zal hur Ma didina Alona hi Israel-lîna. Ahap mi le tchod’a kal amulei suma Israel suma a tamula avoroma pet.
34 Kur atchogoi ndata Hiyel ma Betel-lâ mi nde min azì ma Jeriko-na. D’igi Ma didina mi de mi Josue Nun goroma na, ata yima Hiyel mi gäd’u azì ma Jeriko-nina, Abiram Hiyel gorom ma ngolâ mi mid’a; ata yima mi tin vun gulumunina, Segup Hiyel gorom ma gorâ mi mit mi.
© Azumeina Bible © Alliance Biblique du Tchad, 1999.
