1 Amuleina 4 - Azumeina Bible 1999 (MPG)

Salomon mi tin ad’u leu mamba

1 Salomon mi kak amula yam Israel-lâ ki zlazi pet. 2 Wana ni simiyê mam suma nglona:

Azariya Sadok ma ngat buzuna goroma;

3 Elihoref ki Ahiya Sisa groma ni suma b’ir mbaktumba;

Josafat Ahilut goroma ni ma mi ngom zla d’a a b’irit kä d’ina;

4 Benaya Jehojada goroma ni ma ngolâ hi azigarîna;

Sadok ki Abiyatar ni suma ngat buzuna mAlona;

5 Azariya Natan goroma ni ma ngol ma avok suma a te yam Israel-lîna;

Zabut Natan gorom ma ngat buzuna ni ma de d’alâ mamulîna;

6 Ahisar ni ma ngolâ hi suma avo hamulîna;

Adoniram Abada goroma ni ma ngolâ hi suma a yo suma sunda kad’engina.

7 Salomon mi tin suma nglo suma te yamba dogo yam mbà; sum ndazina a nga i kur ambas sa Israel-la pet, a nga tok tena yam amulâ ki suma avo hatama pet. Nge nge pî mi nga ki sun mamba tilâ tutu gak bizad’a. 8 Suma nglo suma te yam ndazina simiyêzi ba wana:

Benhur ni ma a tinim kur azì ma yam ahuniyô suma Efraim-mina;

9 Bendeka ni ma yam azì ma Makas-sâ ki ma Sälbim-ma ki ma Bet-Semes-sâ ki ma Elon-na ki ma Bet-Hanan-na mi na;

10 Benheset ni ma avo Arubot kur azì ma Sokot-na kambas sa kur Hefer-ra petna;

11 Abinadap goroma ni ma nga yam ambas sa Dor-rina pet, ni ma ve Tafat Salomon gorombina mi;

12 Bäna Ahilut goroma ni ma nga yam ambas sa Tänak-kina ki Megido kandaga d’a Bet-Seyan nda pet ta go ki Sartan avok Jisreyel la kä d’a; abot ni ndjaka ki Bet-Seyan ki Abel-Mehola gak ti i avun Jokmeyam;

13 Ben-Geber ni ma a tinim kur Ramot ta nga kur Galät-tina; ni ma nga yam azì ma Jayir ma hi Manase gorom ma Galät-nina kambas sa Argop pa Basan-nda mi. Kur ambas ndata pet azì ma ad’engâ nga kua ni dok karagaya, mi nga nguid’a ki gulumuna ki kawei ma hleu ma murgulina kua mi;

14 Ahinadap Ido goroma ni ma a tinim kur azì ma Mahanayim-mina;

15 Ahimas ni ma a tinim yam andaga d’a Neftali-d’ina; mam pî mi ve Salomon gorom mba a yat ala Basmat-ta mi;

16 Bäna Husai goroma ni ma a tinim yam andaga d’a Aser-ra kazì ma Beyalot-nina;

17 Josafat Paruwa goroma ni ma a tinim yam andaga d’a Isakar-rina;

18 Simei Ela goroma ni ma a tinim yam andaga d’a Benjamin-ndina;

19 Geber Uri goroma ni ma a tinim yam ambas sa Galät-ta kandagad’a hi Sihon ma amul ma Amor-râ ki d’a hi Ok amul ma Basan-nid’a mi. Mam mi ma ngol ma te yam ma tu gid’eng ma nga kur ambas ndatina petna.

Te yamba hi Salomon-nda nga d’i i avogovogo

20 Suma kur ambas sa Juda-d’ina ki suma kur ambas sa Israel-lina a zul d’igi les ma avun alum ma ngolîna na; a nga te, a nga tche, a nga le furîd’a. 21 Salomon mi te yam leu d’a ding nga nguyumba pet, tinï ad’ud’a avun alum ma Efrat-na dei gak mba kur ambas sa Filistê-d’a, gak mi yoï hagad’a ki Ezipte. Kid’a mam nga ki iram tua d’a, amulei suma kur ambas ndatina pet a ge yazi kä ad’umu, a nga hum tara mi.

22 Burâ ki burâ Salomon te ma avo hatama ni tonna hafut ta aharid’a zlengâ zlengâ, tonna hafut ta adiged’id’a dogo yam klavandi klavandi, 23 amuzlei suma d’orâ dogo dogo, amuzlei suma ding suma takulona dok mbà dok mbà kaho’â kis kis bei ndum azurei suma hiuna, nala, d’igi alafâ ki duguyona kahu abeid’a na, kaluwei suma d’orâ mi.

24 Salomon mi te yam andaga d’a abo ma fladegena halum ma Efrat-nid’a, tinï ad’ud’a Tipsa dei gak mba Gaza. Amulei suma kur ambas ndatina pet a ge yazi kä ad’umu. Mi te ki ndrom suma azina pet lafiya. 25 Kid’a Salomon mi nga ki iramba, suma Juda-na ki Israel-lâ a kak ki halasa ata yi máma, nge nge pî nga mi zum guguzlu mamba ki tulum mama ki halasa abo hî abo hî kur ambasa pet.

26 Salomon mi min yima tchol akulumeina hi pus mam ma dur ayîna 40.000, mi nga ki suma djang akulumeina 12.000 mi.

27 Suma nglo suma te yam suma dogo yam mbà suma amulâ Salomon mi tinizina, a nga tok te ma nda’â yam Salomon ki suma mam nga mi yazï á te tenina. Nge nge pî adigazi nga mi le sun mamba tilâ tu kur bizad’a ki djib’era ala ar va mi kid’ak ki d’a. 28 Suma nglo suma te yamba a nga mba kawu orsâ ki hat ma djivina makulumei suma a djang heîna yam vun ma hed’a hamulîna ata yima amulâ mi nga kuana.

Salomon ne mamba ti kal suma pet

29 Alona mi he Salomon ned’a ngola ki wad’ud’a, d’al ma kuruma mi zul d’igi les ma avun alum ma ngolîna na mi. 30 Salomon ne mamba ti kal ned’a hi suma Mesopotami-na ki d’a hi suma Ezipte-nid’a pet mi. 31 Ne mamba ti kal suma pet, kal Etan ma Esra-na tamba mi, kal Heman ko, kal Kalkol ki Darda Mahol groma. Ne mamba ti kal ngola, zlam nde yina kur azì ma nguyuma pet mi. 32 Mi de zla d’a d’ogola dudubud’a hindi; sawal mamba kal dubud’a. 33 Mi de zlad’a yam agu ma lara ge pet, tin ad’ud’a ata agu sedre ma Liban-na dei gak mba ata agu hisop ma gurei ma deî kä ad’u gulumunina. Mi de zlad’a yam ambureina, yam azureina, yam d’uwarâ, yam aluweina, yam ahle suma dram kä na, yam kulufâ mi. 34 Wani andjaf suma lara ge pet a mba á hum ned’a hi Salomon nda mi nga ki d’a. Amulei suma yam andagad’ina pet suma a hum zla ne mambina a sunï suma gevem mi.