1 Amuleina 9 - Azumeina Bible 1999 (MPG)

Ma didina mi nde tam mbei ir Salomon yam á mbàd’a

1 Kid’a amulâ Salomon dap gong nga kud’ora hi Ma didinid’a minda kaziyam ma amula kahlena pet suma tam lum djivid’a kazi á mindina dapa, 2 Ma didina mi nde tam mbei iram yam á mbàd’a d’igi mi nde tam mbei iram avo Gabawon-na. 3 Ma didina mi dum ala:

An hum tchen mang nga hu d’a ang tchenenda, an tin wa gong nga ang minita irat vad’u, an mba ni kak kua adigagi gak didin, an mba ni tin iran kad’u, an mba ni vagi atan burâ ki burâ mi. 4 Wani le ang nga tit avoron ki hurung tu d’ingêr d’igi abung David na, le ang nga lahlena pet suma an hang vuna kazina, le ang nga ge yang kä ad’u gat man nda tetenga ni, 5 an mba ni kagang yam zlam mang nga amula ngingring yam Israel-lâ burâ ki burâ d’igi an de mabung David na ala: Ad’u andjavang ang mba ba bei fe sama mba mi vrak blangâng á kak yam zlamba hi Israel-lîd’a d’i gak didin.

6 Wani le ang ki sum mangâ ki grogi ngolona, le agi walagi woi ki sed’enu, le agi nga gagi yagi kä ad’u vun ma he mana ki gat ta an hagizid’a d’uo, le agi igi á le sunda malo ma dingâ teteng, le agi grivigi kä avorom á kud’uromu ni, 7 an mba ni digigi agi Israel-lâ woi kur ambas sa an hagizid’a, an mba ni ge gong nga an tinit irat vat á kud’uron kuad’a woi dei ki sed’en mi.

Ata yi máma Israel-lâ a mba mbut ni vama sanda ki vama lasa aduk suma pet mi. 8 Fata suma a kal gen gong nga ngol la ndandal ndatid’a, a mba le atchap, a mba le mandarâ, a mba djop tazi ala: Ni kayam me ba, Ma didina mi le zla ndata kambas ndata ki gong nga kud’or ndata na ge? 9 Azi mba hulong dazi ala: Ni kayamba Israel-lâ a ar Ma didina Alo mazi ma mi buzugï abuyozi ngolo woi kur andaga d’a Ezipte-d’ina woi d’a. Ni kayamba azi i bugol alo ma dingâ teteng á lum sunda, á grif kä avorom á kud’uromba. Ni kayam ndata ba, Ma didina mi mbazi ndak ndata kazi wana!

Sun nda tetenga hi Salomon-nda

(Gol 2 Sun hAm 8.1-18)

10 Kur dabid’a hi bizad’a dok mbàd’a, Salomon mi dap gongîyo suma mbà ndazina, nala, gong nga kud’ora hi Ma didinid’a ki gonga hamulîd’a minda. 11 Hiram amul ma Tir-râ mi hum agu sedrena kagu siprena ki lora ndak ata min mamba. Kayam ndata, Salomon mi he Hiram azì ma nglona dok mbà kur ambas sa Galile-d’a. 12 Hiram mi tcholï kur azì ma ngol ma Tir-râ á gol azì ma Salomon mi humzina, wani tam lum nga djivid’a kam mbi. 13 Mi de mi Salomon ala: Wiyena, wana nazì ma ang handjina zu? Ni kayam ndata ba, gak ini a nga yi azì máma ala ambas sa Kabul-la. 14 Hiram mi he Salomon lora tonna hindi ki nusa adjewe.

15 Ni hina ba, Salomon mi tin sun nda ad’enga yam suma a min gong nga kud’ora hi Ma didinid’a ki gong mam mba amula ki yima a yum ala Milo-na ki gulumuna hi Jerusalem-ma ki Hasor ki Megido ki Gezer mi. 16 Kid’a Salomon mi ve Faron amul ma Ezipte-na gorombid’a, Faron mi i mi hlazì ma Gezer-râ, mi ngalam mbei kakud’a, mi tchi suma Kanan suma kurâ woyo, mi hum mi goromba he d’a hawad’a. 17 Kayam ndata, Salomon mi min Gezer min nda dinga kazì ma Bet-Horon ma kä ata yima ligitimina. 18 Mi min Bälat ki Tamar azì ma hur fulâ handaga ndatina, 19 mi min azì ma lara ge pet ma a ngom ahle mama kuana kazì ma nglo ma a tchuk pus mam ma dur ayîna kuana kazì ma nglona hi suma djang akulumeinina mi. Mi min ahlena pet suma mi ngazi kurum á minda avo Jerusalem-ma kavo Liban-na, kur ambas sa mam te kata pet mi.

Sun nda ad’enga Salomon mi lata:

20 Suma Amor-râ ki suma Het-na ki suma Peris-sâ ki suma Hef-fâ ki suma Jebus-sâ pet suma a ar suma a nga nandjafâ hi Israel-lâ d’uo na, 21 ki grozi suma a ar blogozi kur ambasa suma Israel-lâ a ndak á tchazi woi pet tuo na, Salomon mi tinizi á le sun nda magomba; a nga kur gak ini. 22 Wani Salomon mi tin nga sama Israel kur sun nda magomba d’i, kayam azi ni suma dur ayîna, a nazungeî suma sunda, a ni suma avok sumina, a ni suma a te yam pus ma dur ayînina, a ni suma djang akulumeina mi. 23 Suma nglo suma Salomon mi tinizi yam sun mambina, a ni kikisa vahl yam dok vahl, mi tinizi ná gol sun nda lara ge pet ta suma ablaud’a a nga lata.

24 Faron goromba ti tcholï kur Azì ma ngolâ hi David-na, ti i kur azì ma amul ma Salomon mi minittchina. Ata yi máma Salomon mi min yima a yum ala Milo-na.

25 Kur bizad’a tu Salomon nga mi hahle suma ngat buzu suma zlap darigïd’a yam yima ngal ahle suma ngat buzu ma mam minim mi Ma didinina yam hindi, nga mi ngal dubang ma his djivid’ina yam yima ngal dubang ma his djivid’a ma nga avok Ma didinina mi. Ni hina ba, mi dap ki suna gong nga kud’ora.

26 Amulâ Salomon mi min batod’a ablaud’a kur azì ma Esiyon-Geber ma go ki Elat avun alum ma ngol ma Tchereuna kur ambas sa Edom-mbina. 27 Hiram mi sun mam suma a we alum ma ngolâ ki suna batod’ina á ndjun suma hi Salomon-na. 28 Azi i ki suma hi Salomon-na avo Ofir, a yoï lora kal tonna dogo yam mbà mamulâ Salomon.