Filistê-na a dik David azi i avo
1 Suma Filistê-na a tok azigar mazina pet avo Afek. Israel-lâ a ve kang mazina go ki mbiyo ma lau ma Jisreyel-lâ. 2 Azigar suma nglo suma Filistê-na a nga tit avok suma ki kisâ ki suma dudubuna. David ki sum mama a nga tit bugol kis ki Akis. 3 Azigar suma nglo suma Filistê-na a djop ala: Hebre suma wana a mba ka hî ná le me ge?
Akis mi hulong dazi ala: Ni David azongâ hi Saul amulâ hi Israel-lîna. Mi nga ki sed’en ni dedei burâ ablaud’a ki bizad’a mi. Dedei d’a mam mbad’a, an fe nga vama tcho atam mbi.
4 Wani azigar suma nglo suma Filistê-na huruzi zal ata Akis, a dum ala: Ang dik sa máma mi hulong ata yima ang tinim kuana. Ar mi i ki sed’ei ata yima dur ayîna tala mi mbut mei ma djangûna ata yima durâ d’a d’i. Ni nana ba, sa máma mba mi hulong gen salama ki djivid’a ge? Mba mi yo ni sum meina ba, mi humzi d’uo zu? 5 Ni David ma a lü ndjongâ, a hle sawala kam ala: Saul mi tchi suma dubu; David mi tchi dudubud’a dogo na d’uo zu?
6 Akis mi yi David, mi dum ala: Ma didina ni Ma bei matna! Angî sama d’ingêrâ. An min ang kak ki sed’en á durâ á ndabua á hulong avo ki azigarâ, kayam kur mba manga dei an fe nga vama tcho atang ngi. Wani suma nglona hi azigar suma Filistê-nina tazi nga lazi djivid’a kang ngi. 7 Ki tchetchemba, ang hulong i lafiya, ar ang le vama tcho ma b’lak hur suma nglo suma Filistê-nina d’i.
8 David mi de mi Akis ala: An le ni me? Dedei d’a an mba gevenga gak ini; ang fe ni me ma tchona ata an azong mangâ tala an i ni dur suma djangûna hi salana amul manina d’uo ge?
9 Akis mi hulong dum ala: An wang ang iran djivid’a ni d’igi malaikana hAlonina na. Wani azigar suma nglo suma Filistê-na a dala: Ar mi i ki sed’ei ata yima dur ayîna d’i. 10 Ki tchetchemba, ang ki suma a mba ki sed’engâ, agi tchologi yorogo tcholol; le yina fo ni, agi igiya.
11 Tcha ndjivinda David ki sum mama a tchol á id’a ki yorogo tcholola, a hulong yam ambas sa Filistê-d’a; Filistê-na a i Jisreyel mi.
© Azumeina Bible © Alliance Biblique du Tchad, 1999.
