Israel-lâ a hal amula
1 Kid’a Samuel mi mbut mamara dad’a, mi tin groma nglod’a avok Israel-lâ. 2 Gorom ma ngolâ a yum ala Joel, ma mbàna a yum ala Abiya. A ka’î avo Berseba á ka sariyad’a. 3 Wani groma a nga tit d’igi abuzi na d’i, a nga le d’od’ok beged’a, a nga ve he d’a hawad’a gumun abo suma á ka sariya d’a ata yat tuo d’a.
4 Suma nglo suma Israel-lâ pet a tok tazi a i gen Samuel avo Rama, 5 a dum ala: Samuel, ang gola, ang djengî djengâ, grongâ a nga tit d’igi ang na d’i. Ki tchetchemba, ang tinimi amulâ á te kami d’igi andjaf suma dingâ a nga le na mi.
6 Samuel tam lum nga djivi yam djop pa azi djobom ala mi tinizi amulâ d’a d’i. Samuel mi nde tchen Ma didina. 7 Ma didina mi de mi Samuel ala: Ang hum zlad’a hi Israel-lîd’a, ang lahlena pet suma azi dangzina. Azi noyôngî ang ngi, a noyôn ni anu. Azi min ala an tamula kazi d’uo d’a. 8 Azi nga le ki angî d’igi a le ki an adjeu kid’a an buzuguzï woi kur ambas sa Ezipte-d’id’a na, azi aran ndei á i kud’or alo ma dingâ, azi nga le sun mazi ndata gak ini. 9 Ki tchetchemba, ang hum zla mazid’a, ang gazi humaziya, ang vazi humazi kekei yam ahle suma amul ma mba mi te kazina mba mi lazizina.
Samuel mi de woi yam ndak ka amulâ mba mi lata
10 Samuel mi de zla d’a Ma didina mi dumzid’a pet mi suma a djobom amulina, 11 mi dazi ala: Agi wagi vama amul ma mba mi te kagina mba mi luma ba wana: Mba mi yogi grogina kad’enga á tit ki pus mam ma dur ayîna, á djang akulumeina d’oze á ring avok pus mama tamba. 12 Suma dingâ a mba kak suma te yam suma dubuna, suma dingâ a mba te yam suma dok vahlâ, suma dingâ a mba zumum asinemu, suma dingâ a mba zum awu mama, suma dingâ a mba zle ahle suma dur ayîna kahlena hi pusîna mi. 13 Mam mba mi yo grogi suma aropma á yor mbul ma his ma afufuîna, á yavuna d’oze á gavungôna. 14 Mam mba mi yogi asine magi ma djivina, guguzlu magid’a d’oze agu olif magina, mba mi hum mi mam suma nglona. 15 Mam mba mi yo vun awu magi ma dodogo ma kur asinegina ki guguzlu magid’a, mba mi hazi mazungeî mama ki mam suma nglona. 16 Mam mba mi yo azungeî magina ki yugunei magina, amuzlei magi suma ad’engâ ki koro magina á le sun mamba. 17 Mam mba mi yo ahok magina yazi d’a dodogod’a, agi mba mbud’ugi ni magumei mama. 18 Kur bur máma agi mba tchigi yam Ma didina yam amul ma agi manama, wani Ma didina mba mi humugi d’i.
19 Israel-lâ a hum nga zlad’a hi Samuel-la d’i, a dum ala: Hawa! Ami minimi namulâ mbeî, 20 d’igi andjaf suma dingâ na mi. Amul mamina mba mi kami sariyad’a, mba mi tit avoromiya, mba mi i ki sed’emi ata yima dur ayîna mi.
21 Samuel mi hum zla d’a Israel-lâ a data pet, mi dat mi Ma didina. 22 Ma didina mi de mi Samuel ala: Ang hum zla mazid’a, ang tinizi amulâ. Bugola, Samuel mi de mi Israel-lâ ala nge nge pî, mi hulong avo hatamu.
© Azumeina Bible © Alliance Biblique du Tchad, 1999.
