Amul la ted’a hi Abiya-d’a
(Gol 1 Amul 15.1-8)1 Kur biza d’a dogo yam klavandi d’a Jerobowam nga mi tamulid’a, Abiya mi kak amula yam suma Juda-na. 2 Mi tamula avo Jerusalem bizad’a hindi. Asum a yat ala Mikaya, ni Uriyel ma Gibeya-na goromba.
Abiya ki Jerobowam a nga dur taziya. 3 Abiya mi yo azigar suma gangrang suma a we durîna 400.000. Jerobowam mi yo azigar suma gangrang suma a we durîna 800.000, a ndjar á dur Abiya.
4 Abiya mi djak akulo yam ahina d’a Semarayim mba yam ahina d’a Efraim-mba, mi de mi Jerobowam ki mam suma Israel-lâ pet ala: Agi humugiya! 5 Agi wagi nga d’ala Ma didina Alona hi Israel-lîna mi he David amula á te leud’a yam Israel-lâ gak didinu d’uo zu? Mi djin vunam kandjavam ni djin nda sana mi ndak á mbud’ut tei d’uo d’a.
6 Wani Jerobowam Nebat gorom ma azongâ hi Salomon ma David goromina, mi kak djangûna ki salama. 7 Suma yazi nga d’uo suma hawa ya’â a tok ad’umu, a kus yam Robowam Salomon goroma, kayam Robowam mi ni gogorâ bei ned’a, mi ndak á tchol avorozi ngingring ngi. 8 Ki tchetchemba, agi djib’eregi ala agi hlagi leu d’a Ma didina mi hat mi David andjavamba, agi yogi azigarâ ablaud’a, agi nga kamuhl ma lor ma Jerobowam mi yorogizi d’igi alona na na mi. 9 Agi digigi suma ngat buzuna hi Ma didinina andjafâ hi Aron-na ki suma hi Levi-na woyo, agi tinigi suma ngat buzuna d’igi suma yam ambas sa dinga a nga le na. Nge nge pî, mi mba kamuhl ma azongâ ki gamlâna kid’iziya á tinim ki kur sun nda ngat buzuna malo mala nAlona d’uo na.
10 Wani amiya, Ma didina nAlo mamina, ami aram nga woi d’i, suma ngat buzuna hi Ma didinina andjafâ hi Aron-na a nga kur sun mazid’a, suma hi Levi-na a nga le sun mazid’a mi. 11 Ami nga hami he d’a hawa d’a ngala mi Ma didina yorogo ki fladege burâ ki burâ. Ami nga ngalami dubang ma his djivid’ina, ami nga ndjarami avungôna yam tabul ma a tinim iram vama. Fladege ami nga sad’ami agu lalam ma lora woyo, ami nga domi lalam mamba akud’a mi. Ami nga ngomomi vun ma hed’a hi Ma didina Alo maminina. Wani agiya, agi aram mbeyo. 12 Gola! Alona mi nga ki sed’emiya, mi nga mi tit avoromiya, mam suma ngat buzuna a nga kaduvei suma tchina á bud’a á tagami lovota á dur ayîna ki sed’egiya. Agi Israel-lâ, ar agi durugi ayîna ki Ma didina Alona habuyogi ngolona d’i, kayam agi ndak á kus kam mbi.
13 Ata yi máma Jerobowam mi sun azigar suma dingâ gumun á mbud’ï bugol suma Juda-na á nguyuziya, Israel suma dingâ a tchol avoroziya. 14 Suma Juda-na a mbut iraziya. Kid’a a wala ayîna mi nga avorozi ki blogozi mi d’a, a tchi yam Ma didina ki delezi akulo, suma ngat buzuna a bu aduveina mi. 15 Ata yi máma suma Juda-na a tum sor ra ayîna. Ata yima a tum sor ra ayînina, Ma didina mi dur Jerobowam azi ki Israel-lâ avok Abiya ki suma Juda-na. 16 Israel-lâ a wet ringâ avok suma Juda-na, Alona mi hazi abo suma Juda-na. 17 Abiya ki sum mama a kus kazi kus sa ngola, a tchi suma gangrang suma dur ayîna aduk Israel-lâ suma 500.000. 18 Ata yi máma Israel-lâ a hulong yazi kä, suma Juda-na a kus kaziya, kayam suma Juda-na a deng tazi nata Ma didina Alona habuyozi ngolona. 19 Abiya mi dik Jerobowam, mi yom azì mam ma nglona, mi hlazì ma Betel-lâ, azì ma Jesana, azì ma Efron-na kazì ma gurei ma nguyuzina pet mi.
20 Kid’a Abiya mi nga ki iram tua d’a, Jerobowam mi nga kad’enga ding nguo d’a. Bugola, Ma didina mi tumum mi mid’a. 21 Wani Abiya mi fad’enga kur leu mamba. Mi vik aropma dogo yam fid’i, mi vut gro andjofâ dok mbà yam mbà, gro aropma dogo yam karagaya mi.
22 Sunda hi Abiya d’a ara kahle suma mi lazina ki zla d’a mi data, a b’irit nga kä kur Mbaktum mba ge humba hi Ido ma djok vun Alonid’a. 23 Abiya mi mit mi i azulei kä ad’u abuyom ngolo. A tozom kur Azì ma ngola hi David-na. Goroma Asa mi vrak tamula blangâmu.
Tin ad’u tamula hi Asa-d’a
(Gol 1 Amul 15.9-11)Kur atchogoid’a hi Asa-d’a ambasa kak ki halasa gak bizad’a dogo.
© Azumeina Bible © Alliance Biblique du Tchad, 1999.
