Asa mi hulong suma ad’u gata hAlonid’a
(Gol 1 Amul 15.12-15)1 Muzu’â hAlonina mi mba yam Azariya Odet goroma. 2 Mi nde mi i fe Asa, mi dum ala: Amulâ Asa, agi ki suma Juda-na ki suma Benjamin-na pet, agi humugiya! Ata yima agi nga ki Ma didinina, mam nga ki sed’egiya. Le agi halamu ni, agi mba fumu. Le agi aram mbeyo ni, mam mba mi aragi woi mi. 3 Israel-lâ a le bizad’a ablaud’a bei Alo ma gagazina adigaziya, bei ma ngat buzu ma mi had’azina, bei gat mamba adigazi mi. 4 Wani kur ndak mazid’a azi hulong gen Ma didina Alona hi Israel-lîna, a halamu, mi arazi a fum mi. 5 Kur atchogoi ndata, b’leng nga halasa ti nga yam suma á id’a á hulongîd’a d’i. Kayam tcha d’a tatad’a ti nga aduk suma a nga kaka yam ambasina pet. 6 Andjaf ma dingâ nga mi dur ayîna ki ndram andjaf ma dingâ, azì ma ngolâ nga mi dur ki ndram azì ma ngolâ mi, kayam Alona mi b’lagazi djib’er mazid’a woi ki ndak ka lara ge pet. 7 Wani ki tchetchemba, agi vagi tagi ad’enga, ar tagi tchuk lus si, kayam a mba wuragagi yam sun magid’a.
8 Ata yima amulâ mi hum zla d’a ma djok vun Alona Azariya Odet goroma mi datina, mi ve tam ad’enga, mi pleî ahle suma ndjendje suma kur ambas sa Juda-d’a ki suma kur ambas sa Benjamin-nda ki suma kur azì ma nglo ma mam hlum yam ahina d’a Efraim-mbina woi pet. Mi hulong min yima ngal ahle suma ngat buzu ma b’lak kei ma nga avun gong nga kud’ora hAlonid’ina akulo mi. 9 Mi tok suma Juda-na ki suma Benjamin-na pet, mi tok suma Efraim-ma ki suma hi Manase-na ki suma hi Simeon suma a nga kaka adigazina mi. Kayam ata yima Israel-lâ a we d’ala Ma didina Alo mama mi nga ki sed’emu d’a, ablaud’a a zlap ki sed’emu. 10 A tok avo Jerusalem kur til ma hindina kur biza d’a dogo yam vahl hla Asa nga mi tamulid’a. 11 Kur bur máma a hahle suma a yozï hurumbina vama ngat buzuna mi Ma didina, nala, amuzleina 700 ki tumiyôna 7000 mi. 12 A hle vunazi kur bur máma ala azi le minda hi Ma didina Alona habuyozi ngolona ki hur ma tuna ki tazi pet mi. 13 Sama lara ma mi ge nga yam kä ad’u minda hAlona hi Israel-lîd’a d’uo na, le ni gogorâ, d’oze sama ngolâ, d’oze mandjufâ, d’oze atchad’a, a tchum mbeyo. 14 A gun tazi avok Ma didina ki delezi akulo, a tum sora, a bu aduveina kadif fa ngola mi. 15 Suma Juda-na ki zla tazi pet a le furîd’a yam gun nda azi gun tazid’a, kayam azi gun tazi ni ki hur ma tuna, a hal Ma didina ni ki furîd’a, mi arazi a fum mi, kayam Ma didina mi hazi lovota á tuk tad’a ata yima lara ge pet mi.
16 Amulâ Asa mi pat asum ngolo Mäka woi kur amul mata, kayam ti yor fileina malo d’a a yat ala Asera-d’a, mi he vuna ala a b’lak filei máma woyo, a mbud’um d’igi gugud’upa na, a ngalam mbei avun toliyon nda Kedron-nda. 17 Wani mi b’lak nga yima nding ma Israel-lâ a tinim iram vama woi d’i. Hina pet pî, kid’a Asa mi nga ki iramba tua d’a, mi nga mi le yam Ma didina ki hurum tu. 18 Nga mi mba ki he d’a hawa d’a abum mi tinit irat vata ki he d’a hawa mamba tata kur gong nga kud’ora hAlonid’a, nala, kawei ma hapma ki lora kahle suma djivi suma kal teglesâ teteng mi.
19 Sa mi dur nga ayî ki Asa d’uo gak mba kur biza d’a dok hindi yam vahl hla mam nga mi tamulid’a.
© Azumeina Bible © Alliance Biblique du Tchad, 1999.
