Josafat mi zlap ki Ahap amul ma Israel-lâ
(Gol 1 Amul 22.1-4)1 Josafat mi mbut sama ndjondjoîna, suma a nga suburum heî mi. Mi zlap ki Ahap amul ma Israel-lâ kur lovot ta tela. 2 Bugol bizad’a tcha mi i gen Ahap avo Samari. Ahap mi ngat tumiyôna kamuzleina ablaud’a mi Josafat ki suma ad’uma, mi zud’um á i durâ ata azì ma Ramot ma kur Galät-na. 3 Ahap amul ma Israel-lâ mi djop Josafat amul ma Juda-na ala: Ang i dur ayîna ki sed’en á hleï azì ma Ramot ma kur ambas sa Galät-tina d’uo zu?
Josafat mi hulong dum ala: Ang ki an ei ni tu, sum mangâ ki sum mana a ni tu mi. An nga ni i dur ayîna ki sed’engû.
Suma djok vun suma a yazina a de woi yam kusa hi Ahap-pa
(Gol 1 Amul 22.5-12)4 Josafat mi de mamul ma Israel-lâ ala: An nga ni tchenengû, ang djop Ma didina tua.
5 Amul ma Israel-lâ mi tok mam suma djok vun Alona kikis fid’i, mi djobozi ala: Na ni ei i dur ayîna á hleï azì ma Ramot ma Galät-na, d’oze an i d’uo zu?
Azi dum ala: Ang iya! Alona mba mi hang azì máma abongû.
6 Wani Josafat mi djobom ala: Ma djok vuna hi Ma didina ma ding nga ka hî tala ei djobei Ma didina atamu d’a nga d’uo zu?
7 Amul ma Israel-lâ mi hulong dum ala: Ma dingâ tu mi nga ka hî, a yum ala Mise ni Jimla goroma, ni ma ndak á djop Ma didina atama. Wani an minim mbi, kayam mam nga mi djogon vun ma djivi d’i; mi djogon ni vun ma tchona burâ ki burâ.
Josafat mi hulong dum ala: Amulâ, ar ang de hina d’i!
8 Ata yi máma amul ma Israel-lâ mi yi azong mam ma sunda tu, mi dum ala: Ang i atogo ang halanï Mise Jimla goroma.
9 Wani amul ma Israel-lâ kamul ma Juda-na, a nga ki baru mazi ma amula ataziya. Nge nge pî mi nga kaka yam zlam mam mba amula yam yima nding ma avun agrek ma Samari-nina, suma djok vun Alona a nga djok vuna avorozi mi. 10 Wani sama dingâ a yum ala Sedekiyas ni Kenäna goroma, mi zle aduvei suma kaweina, mi nga mi dala: Gola! Ma didina mi dala: Aduvei ndazina ni vama simata yam ad’eng nga ang mba kus ki yam suma Siri-na gak ang dabazi ki woi d’a.
11 Suma djok vun suma dingâ pet a de ni zla ndata hina tu ala: Ang i dur ayîna kazì ma Ramot ma Galät-na; ang mba kuza, Ma didina mba mi hangzi abongû, ang mba kus kamu.
Mise mi djok vuna yam ayî ma mba mi kus yam Ahap-ma
(Gol 1 Amul 22.13-28)12 Ma sun ma mi i hal Mise-na mi mbaza, mi dum ala: Ang huma! Suma djok vun Alona pet a ndjak vunazi tu, a djok vun ma djivina mamulâ. Ang pî i djok vun ma djivina d’igi azi na mi!
13 Wani Mise mi hulong dum ala: Ma didina ni Ma bei matna ba na. An i ni de ni vama Alo mana mba mi dandjina.
14 Ata yima mi mba gen amulîna, amulâ Ahap mi djobom ala: Mise, djivid’a ami imi dur ayîna á hlazì ma Ramot ma Galät-na d’oze an i d’uo zu?
Mise mi hulong dum ala: Agi igiya! Agi mba kuzugiya, Ma didina mba mi hagizi abogiya! Agi mba kuzugi kamu!
15 Wani amulâ Ahap mi dum ala: An tcheneng tchen nda hud’a ni yan ga tua ba, ang mba dan zla d’a gagazi d’a tcholï avun Ma didinid’a ge?
16 Ata yi máma Mise mi dum ala: An we Israel-lâ pet a b’rau woi yam ahinad’a d’igi tumiyô suma bei sama pola kazi ba na na. Ma didina mi dala: Azi nga kamul li. Ar nge nge pî mi hulong avo hatam ki halasa!
17 Amul ma Israel-lâ mi de mi Josafat ala: An dangî a na ge? Mi nga mi djogon vun ma djivi d’i, mi djogon ni vun ma tchona burâ ki burâ!
18 Wani Mise mi hulong dum ala: Ang hum zla d’a Ma didina mi data. An we Ma didina mi nga kaka yam zlam mam mba amula, azungeî mam suma sä akulona pet a nga tchola gevem yam bigam mba ndjufâ ki d’a gulad’a. 19 Mi djop ala: Ni nge ba, mba mi lop sä vun Ahap á i dur ayîna ata azì ma Ramot ma Galät-na lop ba, á tchumza woi ge? Ma hina mi de zla mamba ni vad’u, ma hina mi de zla mamba ni vat mi.
20 Ata yi máma, muzuk ma mi de zlad’a mi suma djok vun ndazinina, mi ndeï mi tchol avok Ma didina, mi dum ala: An i ni lobom mi i dur ayîna.
Ma didina mi djobom ala: Ang i lobomî nana ge?
21 Mi dum ala: An i ni de zla d’a kad’a avun suma djok vuna hamulîna pet.
Ma didina mi hulong dum ala: Ang i lobomu, ang i le hina!
22 Mise mi de kua ala: Djiviya! Ki tchetchemba, Ma didina mi tin wa zla d’a kad’a avun mang suma djok vun suma a nga ka hina. Gagazi, Ma didina mi nga hurum á mbang ndaka kangû.
23 Ata yi máma na wat Sedekiyas Kenäna goroma mi hut gen Mise, mi tumum agozlom ping, mi dum ala: Muzu’â hi Ma didinina mi nde kurun ndeï ni mindja ba, mi dang zlad’a ge?
24 Mise mi hulong dum ala: Ang tang mba wad’ud’a kur bur ma ang ring kur gong hî gong hî á ngeid’ina.
25 Ata yi máma amul ma Israel-lâ mi dazi ala: Agi vagi Mise, agi im mi Amon ma ngol ma hur azinina ki Jowas amulâ goroma. 26 Agi i dazi ala: Amulâ mi he vuna ala: Agi gagi sama wana dangeina, agi hum tena ngol luo mi na, agi hum mbina ngol luo mi, gak an hulongî avo ki halasa tua.
27 Mise mi dum ala: Ang le hulongî avo ki halasa ni, Ma didina mi dan nga zlad’a ni mam mbuo. Mi de kua ala: Agi suma pet, agi humugiya!
A tchi Ahap kur ayî ma durâ
(Gol 1 Amul 22.29-40)28 Ahap amul ma Israel-lâ ki Josafat amul ma Juda-na a i dur ayîna kazì ma Ramot ma Galät-na. 29 Amul ma Israel-lâ mi de mi Josafat ala: An i ni mbut tan d’igi sama dingâ na á i durâ. Wani ang tchuk baru mang ma amula atangû. Hina amul ma Israel-lâ mi mbut tam d’igi sama dingâ na, azi i dur ayîna.
30 Wani amul ma Siri-na mi he vuna mi suma nglo suma yam pus ma dur ayînina ala: Agi durugi azigar suma gureina d’oze azigar suma nglona d’i. Wani agi durugi namul ma Israel-lâ tamba. 31 Kayam ndata, ata yima suma nglo suma yam pus ma dur ayînina a we Josafat-na, a dala: Wana namul ma Israel-lâ, a nguyum á durâ. Wani Josafat mi yi Ma didina á ndjunumu. Ma didina mi ndjunumu, mi digizi woi kamu. 32 Ata yima suma nglo suma yam pus ma dur ayînina a wala nga namul ma Israel-lâ d’uo na, a aram bei dika.
33 Wani azigar ma Siri-na mi pat yeû mamba, mi yed’ettcha hawa na. Ti ndeza ata kongrong ma didik amul ma Israel-lîna d’ad’ar. Amul ma Israel-lâ mi de mi sa mam ma djangâm pusîna ala: Ang hulong bugolo, ang ndan ndei ata yima dur ayîna! Kayam an daga!
34 Wani kur bur máma ayîna mi dur dur ma tchona, a ar nga amul ma Israel-lâ denga akulo kur pus mama, iram abo ma azigar suma Siri-na a nga kuana gak fladege d’a afata ti i nikid’a, mi mid’a.
© Azumeina Bible © Alliance Biblique du Tchad, 1999.
