Salomon mi min ahlena á min gong nga kud’ora
(Gol 1 Amul 5.1-181 7.13-14)1 Salomon mi he vuna ala a min gonga mi Ma didina, a min gong nga amula mi mam tamba mi. 2 Salomon mi ndum suma zi ahlena 70.000, suma tchet ahinad’a akulo yam ahinad’ina 80.000 ki suma a gol sunda 3600.
3 Salomon mi ge sunda gen Hiram amul ma Tir-râ, mi dum ala: Ang le ki sed’en d’igi ang le kabun David ang hum agu sedrena á min kaziyam na. 4 Gola! An nga ni min gonga mi Ma didina Alo mana á tinit irat vat á ngal dubang ma his djivid’ina avoromu, á ndjar avungôna avorom teteu, á hahle suma ngat buzu suma ngala yorogo ki fladege burâ ki burâ, kur bur ma sabatna, kur deîd’a hi tilîd’a, kur bur ma vun tilâ hi Ma didina Alo mamina d’igi mi he gat ta didinda mi Israel-lâ na. 5 Gong nga an nga ni minita ni gong nga ngola, kayam Alo mamina nAlo ma ngol ma kal alona petna. 6 Ni nge ba, mi nga kad’enga á minim gonga ge? Kayam akulod’a ki ngolot pet pî ti ndak nga kam mbi. An ni nge ko ba, ni minim gonga ge? An minit ná ngal dubang ma his djivid’ina avorom wü d’a! 7 Ki tchetchemba, ang sununï sama d’al ma mi we suna lora, kawei ma hapma, kawei ma hleuna, kawei ma wurana, ki baru d’a hleu d’a sisila ki d’a hleu d’a kekenga ki d’a botlozid’a, ni ma we d’udjo ahlena á le sunda ki suma d’al suma a nga geven ka hî avo Jerusalem suma abun David mi manazina. 8 Ang sununï agu ma Liban-na, nala, agu sedrena, agu siprena kagu sandalâ mi, kayam an we sum mangâ a we lovota á ka agu ma Liban-na. Gola! Azungeî mana a mba i kazungeî mangâ mi. 9 Ar azi kaï aguna ngola, kayam gong nga an nga ni minita ni gong nga ngol la djif fa kal teglesa. 10 An lut nga afut gemena tonna 6000, afut awu orsâ tonna 6000, süm guguzlud’a lidirâ 800.000, mbulâ lidirâ 800.000 yam azungeî mang suma ka aguna.
11 Hiram amul ma Tir-râ, mi hulong mi b’ir mbaktumba mi Salomon, mi dum ala: Ni kayamba Ma didina mi le yam sum mamid’a ba, mi tining amula kaziya. 12 Hiram mi de kua ala: An le mersi mi Ma didina Alona hi Israel-lâ ma mi lakulod’a kandagad’ina, kayam mi hamulâ David gor ma ned’a ma d’alâ ma wad’ud’a ma ndak á min gong nga kud’ora mi Ma didina ki gong nga amula yam mam tambina. 13 Ki tchetchemba, an nga ni sunung Hiram-Abi ma d’al ma ne ma nda’â. 14 Abumî ma Tir-râ, asumî d’a ad’u andjafâ hi Dan-nid’a, ni sama we suna lora, kawei ma hapma, kawei ma hleuna, kawei ma wurana, ahinad’a, aguna, baru d’a hleu d’a sisila ki d’a botlozid’a ki d’a hleu d’a luluîd’a, ni ma we tchet ahle suma lara ge pet ki sun nda d’al la lara d’a a mba humzi á led’id’a. Mba mi le sunda ki mang suma d’alâ, zlapa ki suma abung amulâ David mi manazina mi. 15 Sama ngolâ, ki tchetchemba, ang sununï gemena, awu orsâ, mbulâ ki süm guguzlud’a suma ang dazi zlazina mi ami azungeî mangâ. 16 Ami mba kang agu ma Liban-na d’igi ang hurung min na, ami mba djiningziya, ami ingzi sä kur alum ma ngolâ gak ami mbangzi sä Jafa. Ang mba djagam sä akulo Jerusalem.
17 Salomon mi ndum a angoyogei suma yam ambas sa Israel suma abum David mi ndumuzina pet. Azi pet ni 153.600. 18 Mi yo suma 70.000 á zi ahlena, suma 80.000 á tchet ahinad’a akulo yam ahinad’a ki suma 3600 á gol sunda abo suma mi.
© Azumeina Bible © Alliance Biblique du Tchad, 1999.
