2 Sunda Hamuleinid’a 21 - Azumeina Bible 1999 (MPG)

1 Josafat mi mit mi i azulei kä ad’u abuyom ngolo. A tozom gevezi kur Azì ma ngolâ hi David-na. Goroma Joram mi vrak tamula blangâmu.

Amul la ted’a hi Joram-mba

(Gol 2 Amul 8.16-24)

2 Joram b’oziyom suma Josafat gromina a nablaud’a, nala, Azariya, Jehiyel, Zakari, Azariyahu, Mikayel ki Sefatiya. Azi pet namulâ Josafat groma. 3 Abuzi mi hazi he d’a hawa d’a ngola heî, nala, kawei ma hapma, lora kahle suma guzuzi kal teglesâ, mi hazi azì ma nglo ma ad’eng ma ngungu ma kur ambas sa Juda-d’ina teteng mi, wani mi hamula ni mi Joram, kayam mam mi gorom ma ngolâ.

4 Kid’a Joram mi kak amula balum abum mi sira leu mamba ad’ut kä ngingi d’a, mi tchi b’oziyoma woi pet zlapa ki nglo suma Israel suma hiuna mi. 5 Kid’a Joram mi kak amulid’a, bizamî dok hindi yam mbà. Mi tamula avo Jerusalem bizad’a klavandi. 6 Mi le sun nda tchod’a d’igi amulei suma Israel-lâ na, d’igi suma hi Ahap-ma na mi, kayam mi ve Ahap goromba atchad’a, mi le sun nda tchod’a avok Ma didina mi. 7 Wani Ma didina mi min á dap suma hi David-na woi d’i, kayam mam djin vunam ki sed’em mi hlum vunam ala mam mba mi aram mi tamula kandjavam gak didin.

8 Kur atchogoi mamba suma Edom-ma a tchol huneîd’a ki suma Juda-na, a min ala suma Juda-na a te kazi d’i, a tin amula yam taziya. 9 Joram mi tchol ki mam suma nglona ki mam suma yam pus ma dur ayînina pet, a i dur suma Edom-ma. Kandjege dangâlad’a mi tcho aduk suma Edom suma a nguyuma zlapa ki nglo suma yam pus mam ma dur ayînina. 10 Suma Edom-ma a kak djangûna ki suma te yam suma Juda-na kur atchogoi ndata gak ini. Suma Libini-na a tchol huneîd’a ki sed’em kur atchogoi ndata mi, kayam mi ar Ma didina Alona habuyom ngolona woyo. 11 Joram mi min yima kud’or fileina yam ahina d’a Juda-d’a, mi zut suma avo Jerusalem-ma ki suma Juda-na á le gaulangâ mi.

12 Bur tu, mbaktumba ti tcholï abo Elie ma djok vun Alona, ti fumu, mi dum ala: Ma didina Alona habung ngolo David-na mi dala: Ang tit nga yam lovota habung Josafat-ta ki d’a hi Asa amul ma Juda-nid’a d’i, 13 wani ang tit ni kur lovota hamulei suma Israel-lîd’a. Ang tan suma Juda-na ki suma Jerusalem-ma á le gaulangâ d’igi suma hi Ahap-ma na, ang tchi b’oziyong suma habung suma a kalang ki djivid’ina woi mi. 14 Ni kayam ndata ba, Ma didina nga mi tum sum mangâ, grongâ, amiyôngâ kahle mangâ pet ki tugud’ei d’a tchod’a. 15 Ang tanga mba mi tumung ki tugud’ei d’a tcho d’a tang aruwad’anga, mba d’i i avogovok burâ ki burâ gak aruwad’ang mba mi buzuk kei abu abo te d’a tanga.

16 Ma didina mi zut suma Filistê-na ki suma Arap suma go ki suma Etiyopi-na á dur ayîna ki Joram. 17 A i durâ ata suma Juda-na, a kal kur leu mazid’a, a hurum ahle suma kur gong nga amulina pet, a yo Joram groma kamiyôma pet; gorom ma arâ ni ma gorâ Ahaziya tu go.

18 Bugol ahle ndazina, Ma didina mi tumum aruwad’am ki tugud’ei d’a tcho d’a bei tchila ba d’a. 19 Nga d’i i avogovok burâ ki burâ. Kur dabid’a hi biza d’a mbàd’a aruwad’am mi buzuk kei abo te d’a tumba, mi mit ni kur ndak ka ngola. Sum mama a ngalam nga mbul ma his ma afufuîna á suburum d’igi a le kabuyom ngolo na d’i.

20 Kid’a mi kak amulid’a, bizamî dok hindi yam mbà. Mi tamula avo Jerusalem bizad’a klavandi. Ata yima mi mitna, sa mi hat nga hurum kam mbi. A tozomî kur Azì ma ngolâ hi David-na, wani a tozom nga kur zula hamuleinid’a d’i.