2 Sunda Hamuleinid’a 29 - Azumeina Bible 1999 (MPG)

Amul la ted’a hi Ezekiyas-sa. Mi mbut gong nga kud’ora yed’et

1 Kid’a Ezekiyas mi kak amulid’a, bizamî dok mbà yam vahl. Mi tamula avo Jerusalem bizad’a dok mbà yam zlengâ. Asum a yat ala Abiya ni Zakari goromba. 2 Ezekiyas mi le sun nda d’ingêra avok Ma didina ki hurum pet d’igi abum ngolo David-na.

3 Kur biza d’a avok ka mi tamulid’a, kur til ma avo’â, mi mal vun gong nga kud’ora hi Ma didinid’a woyo, mi min yima mi b’lak keina akulo. 4 Mi yi suma ngat buzuna ki suma hi Levi-na, mi togozi ata yima abo ma yorogona, 5 mi dazi ala: Agi suma hi Levi-na, agi humunu! Ki tchetchemba, agi mbud’ugi tagi yed’et, agi mbud’ugi gong nga kud’ora hi Ma didina Alona habuyogi ngolonid’a yed’et mi, agi tchugugi ahle suma ndjendje suma a nga ata yima a tinim iram vama woi abua. 6 Kayam abuyoi ngolo a le sun nda ata yat tuo d’a, a le sun nda tchod’a avok Ma didina Alo meina, a aram mbeyo, a hazigazi mi gong mam mba kud’ora, a hat huyogozi mi. 7 A i gak a duk vun gulumuna hi gong mam mba kud’orina akulo, a tchi lalamba woyo, a nga ngal dubang ma his djivid’ina d’oze a nga he he d’a hawa d’a ngala yam yima a tinim iram vama d’i. 8 Kayam ndata, Ma didina hurum zal yam suma Juda-na ki suma Jerusalem-ma. Mi mbud’uzi vama mandarâ, vama hohoud’a ki vama sanda d’igi agi wagizi ki iragi ini na. 9 Gola! Ni kayam ndata ba, a tchi abuyoi avun ayîna. Gurei suma andjofâ, gurei suma aropma kamiyoîna a yozi magomba ni yam sun nda tcho ndata.

10 Ki tchetchemba, an nga ki djib’era kurun krovo á djin vunan ki Ma didina Alona hi Israel-lîna, kayambala kur ayî mam ma bibiliuna ar hurum b’leng ngei keya d’a. 11 Grona, ki tchetchemba, agi gologi zla ndata hina is si. Kayam ni agi ba, Ma didina mi managi á tchol avorom á lum sunda, á mbut azungeî mama, á ngalam dubang ma his djivid’ina mi.

12 Ata yi máma suma hi Levi-na a tchol akulo.

Suma ad’u andjafâ hi Kehat-na ba wana: Mahat Amasai goroma ki Joel Azariya goroma;

Suma ad’u andjafâ hi Merari-na ba wana: Kis Abadi goroma ki Azariya Jehalelel goroma;

Suma ad’u andjafâ hi Gerson-na ba wana: Jowa Zima goroma ki Eden Jowa goroma;

13 Suma ad’u andjafâ hi Elisafan-na ba wana: Simri ki Jeyel;

Suma ad’u andjafâ hi Asaf-fâ ba wana: Zakari ki Mataniya;

14 Suma ad’u andjafâ hi Heman-na ba wana: Jehiyel ki Simei;

Suma ad’u andjafâ hi Jedutun-na ba wana: Semaya ki Uziyel.

15 Azi tok andjaf tazi mud’ok, a mbut tazi yed’et. Bugola, a tchuk klavi kur gong nga kud’ora hi Ma didinid’a á mbud’ut yed’et yam vun ma hed’a hamulîna d’igi Ma didina mi min na mi. 16 Suma ngat buzuna a tchuk klavi kur gonga á mbud’ut hurut yed’et, a yo ahle suma ndjendje suma a nga kur gong nga kud’orina woi abu pepet, a tchuguzi kä kur gulumuna hi gong nga kud’orina. Suma hi Levi-na a yozi a tchuguzi sä woi bugol azina kur hor ra Kedron-nda. 17 A tin ad’ud’a á mbut hur gongîyona yed’et ni kur bur ma avok kikidjina hi tilîna. Kur bur ma klavandina, a mba avun gulumuna hi gong nga kud’orina. A le burâ klavandi á mbut hur gongîyona yed’et mi. Kur bur ma dogo yam karagayana hi til mámina, abozi mi dap sunda.

18 Bugola, suma hi Levi-na a i avo gen amulâ Ezekiyas, a dum ala: Amulâ, ami mbud’umiya wa gong nga kud’ora hi Ma didinid’a yed’et da’, nala, yima ngal ahle suma ngat buzuna kahle suma a le ki sunda kama pet ki tabul ma a tin avungôna mAlona kama kahle suma a le ki sunda kama pet mi. 19 Ahle suma a tinizi irazi vazi suma amulâ Ahas mi mbud’uzi ndjendjed’a ata yima mi nga ki iram tua na, ami tiniziya wa ata lovod’oziya, ami tiniziya wa irazi vazi tin nda dinga mi. Gola! A nga tchuka kä avok yima ngal ahle suma ngat buzuna.

Ezekiyas mi tin kud’ora kahle suma ngat buzuna

20 Amulâ Ezekiyas mi nde ki yorogo tcholola, mi tok suma nglo suma hur azinina, mi i ki sed’ezi kur gulumuna hi gong nga kud’ora hi Ma didinid’a. 21 A mba kamuzleina kid’iziya, gamlâna kid’iziya, gro tumiyôna kid’iziya ki mbekmberena kid’iziya á he he d’a hawa d’a ngala á zlup yam tchod’a hi leud’id’a, yam yima a tinim iram vama, yam suma Juda-na pet mi. Ezekiyas mi he vuna mandjafâ hi Aron suma ngat buzuna á ngat ahle ndazina buzuna yam yima ngal ahle suma ngat buzuna hi Ma didinina. 22 Suma ngat buzuna a ngat amuzlei suma kid’iziyana, a ve buzuna, a yamam yam yima ngal ahle suma ngat buzuna, a ngat gamlâ suma kid’iziyana, a ve buzuna, a yamam yam yima ngal ahle suma ngat buzuna, a ngat gro tumiyô suma kid’iziyana, a ve buzuna, a yamam yam yima ngal ahle suma ngat buzuna. 23 A mba ki mbekmbere ma kid’iziya ma a hum á zlup yam tchod’ina avok amulâ azi kablau suma a nga tokina. Amulâ azi kablaud’a a tin abozi yam mbekmbere ma kid’iziya máma. 24 Suma ngat buzuna a ngat mbekmbere suma kid’iziya ndazina, a vo buzuwazi yam yima ngal ahle suma ngat buzuna tala Alona mi vat hurum mbei yam Israel-lâ ped’u d’a, kayam amulâ mi he vuna ala a hahle suma ngat buzu suma ngala kahle suma ngat buzu suma zlup yam tchod’ina yam Israel-lâ pet.

25 Amulâ mi tin suma hi Levi-na kur gong nga kud’ora hi Ma didinid’a ki tchigiyeud’a kading ma nglona kading ma gureina abozi yam vun ma hed’a hi David-na, yam vun ma hed’a hi Gad ma wahle suma a nga mbana hamulîna, yam vun ma hed’a hi Natan ma djok vun Alonina, kayam ni vun ma he ma Ma didina mi hum avun mam suma djok vunina. 26 Suma hi Levi-na a tchol akulo kahle suma bud’a hi David-na aboziya, suma ngat buzuna a nga kaduveina abozi mi. 27 Ezekiyas mi he vuna ala a i ngal ahle suma ngat buzu suma ngala yam yima ngal ahle suma ngat buzuna. Ata yima a tin ad’u hahle suma ngat buzu suma ngalina, ata yi máma, a tin ad’u hle sawala á gile Ma didina zlapa kaduveina kahle suma bu suma hi David amulâ hi Israel-lîna. 28 Ablau suma zla tazi pet a grif kä andaga, suma hle sawala a nga hle sawala, suma bu aduveina a nga bu aduveina gak a dap kahle suma ngat buzu suma ngala. 29 Ata yima abozi mi dapma, amulâ ki suma a nga zlapa ki sed’ema pet a hud’o kä, a grif kä andaga a kud’or Ma didina. 30 Amulâ Ezekiyas ki suma nglo suma sunda a de mi suma hi Levi-na ala a subur Ma didina ki sawal la David azi ki Asaf ma djok vun Alona a hlata. A hlat ki furîd’a. Bugola, a grif kä andaga a kud’or Ma didina.

31 Ata yi máma Ezekiyas mi de mi suma ala: Agi hagiya wa tagi mi Ma didina da’. Ki tchetchemba, agi hud’ugiya, agi mbeyegi kahle suma ngat buzu suma le mersid’a kur gong nga kud’ora hi Ma didinid’a. Ablau suma toka a mba kahle suma ngat buzu suma le mersid’a, suma pet suma huruzi min á hed’ina a hahle suma ngat buzu suma ngala mi. 32 Ablau ahle suma a hazi á ngalina ba wana: Amuzleina dok kid’iziya, gamlâna kis, gro tumiyôna kikis mbà mi. Wan pet nahle suma a hazi he d’a hawa d’a ngala mi Ma didinina. 33 A tin amuzleina irazi vazi mi Ma didina kikis karagaya, aho’â dudubud’a hindi mi. 34 Wani suma ngat buzuna a nga ablau d’i, a ndak nga á ze ahle suma ngat buzu suma ngal ndazina pet ti. Wani b’oziyozi suma hi Levi-na a mba, a ndjunuziya, gak a dap sun ndata, gak suma ngat buzu suma dingâ a mbut tazi yed’et, kayam suma hi Levi-na, huruzi min a mbut tazi yed’et kal suma ngat buzu suma hiuna. 35 Kayam ahle suma ngat buzu suma ngala a nga ngola ki mbulâ hahle suma ngat buzu suma zlap darigïd’a zlapa ki süm guguzlu d’a ngala.

Ni hina ba, mi hulong tin kud’ora kur gonga hi Ma didinid’a. 36 Ezekiyas kablaud’a peta a le furîd’a ngola, kayam Alona mi ndjunuzi á dap sun ndata, kayam a hahle ndazina natogo zak.