Minda hi gong nga kud’orid’a
(Gol 1 Amul 6.1-38)1 Salomon mi tin ad’u min gong nga kud’ora hi Ma didinid’a avo Jerusalem yam ahina d’a Moriya-d’a, ata yima Ma didina mi nde tam mbei kua ir abum David kur ambid’a’â hi Ornan ma Jebus-sîna. 2 Salomon mi tin ad’u le sunda ni kur bur ma mbàna hi til ma mbàna kur biza d’a fid’i d’a mam tamulid’a.
3 Wana nad’u gong nga kud’or ra Salomon mi ngat mi minit mAlonid’a: Fiyagat ni metred’a dok hindi, bubuwat ni metred’a dogo. 4 Gong nga avunata bubuwat ni metred’a dogo d’igi gonga bubuwat na, fiyagat ta akulod’a ni metred’a dok karagaya, mi gulud’ut hurut ma krovona ni ki lor ra bei zozota ba d’a. 5 Mi ndja agu sipre ma bebed’ena kua. Huyok gonga hurut ma ngolâ, mi gulud’ut ni ki lor ra bei zozota ba d’a, mi tchet ahlena d’igi amulongeîna ki vayirâ na kua mi, 6 mi d’udjo hur gong ndata djifa kahina d’a guzut kal teglesa. Lor ra a gulud’ut ki d’a ni lor ra Parvayim-mba. 7 Mi gulut agu ma nglo ma murgulina, agu ma avun gongina, huyok gonga ki bap ma avun gongina pet ni ki lora, mi tchet angus tcherebêna akulo huyok gonga mi.
8 Mi min hur gong nga a yat ala Yima a tinim iram vam ma kal teglesâ na. Gong ndata bubuwat ni metred’a dogo d’igi bubud’a hi gongid’a na, fiyagat ni metred’a dogo mi. Lor ra a gulud’ut ki huruta ni tonna dok mbà, ni lor ra bei zozota ba d’a. 9 Ponde ma lor ma a le ki sundina, mi ndak ir grama kikisa vahl; hur gongîyo suma akulona, mi gulud’uzi ni ki lora.
10 Mi tchet tcherebêna mbà, mi gulud’um ki lora, mi tinim kur yima a tinim iram vam ma kal teglesâ. 11 Tcherebê ma lara pî gigingâmî metred’a mbà ki nusa. Tcherebê ma avo’â gigingâm mi i doï huyok gonga, gigingâm ma hî na mi i doï giging tcherebê ma mbàna. 12 Giging tcherebê ma mbàna, gigingâm mi i doï huyok gonga abo hî, gigingâm ma hî na mi i doï giging tcherebê ma avo’â mi. 13 Tcherebê suma mbà ndazina, gigingâzi ma nga ganga woina mi ni metred’a dogo, irazi nga mbuta avun gonga. 14 Mi tchil baru d’a ka ira luluî d’a botlozid’a ki d’a hleu d’a sisila ki d’a hleud’a kekenga mi. Ni ndat ba, a tin anguza tcherebêna kua.
Kawei ma murgulina ki yima ngal ahle suma ngat buzuna
(Gol 1 Amul 7.15-22)15 Mi pe kawei ma hleu ma murgulina mbà avun gong nga kud’ora hAlonid’a, fiyagam mba akulod’a ni metred’a dogo yam kid’iziya kid’iziya. Yam mba djumba, fiyagat ta akulod’a ni metred’a mbàmbà ki nus nus. 16 Mi zle vayirâ d’igi vayîr ma ata yima a tinim iram vama na, mi gabam akulo yam kawei ma hleu ma murguli máma, mi ndjap vud’agu grenatna kis aduk vayir máma mi. 17 Mi pe kawei ma hleu ma murguli máma avun djola hi gong nga kud’ora hAlonid’a, tu abo ma ndjufâ, tu abo ma gulana mi. A yi ma ata abo ma ndjufîna ala Jakin, a yi ma ata abo ma gulanina ala Bowazu mi.
© Azumeina Bible © Alliance Biblique du Tchad, 1999.
