2 Sunda Hamuleinid’a 33 - Azumeina Bible 1999 (MPG)

Amul la ted’a hi Manase-d’a

1 Manase mi kak amula bizamî dogo yam mbà, mi tamula avo Jerusalem bizad’a dok vahl yam vahl. 2 Mi le sun nda tchod’a avok Ma didina, mi tit ni yam sun nda ndjendje d’a lara ge pet ta andjaf suma Ma didina mi digizi woi adjeu avok yam andagad’a á ar yina mi Israel-lîna a lata. 3 Mi hulong mi min yima nding ma teteng ma tuwal filei ma abum Ezekiyas mi tom mbeina akulo. Mi min yima ngal ahle suma ngat buzuna teteng á kud’or alo ma a yum ala Bäl-lâ, mi pagu ma murgulina malo d’a a yat ala Asera-d’a, mi nga mi grif kä avok ahle suma akulona, nga mi kud’urozi mi. 4 Mi min yima ngal ahle suma ngat buzuna teteng mi fileina kur gong nga kud’ora hi Ma didina d’a Ma didina mi de kat ala: Ni kur Jerusalem ba, simiyên mba mi kak kua gak didinu d’a. 5 Mi min yima ngal ahle suma ngat buzu ma dingâ teteng mahle suma akulona kur atrang nga mbà d’a nga avun gong nga kud’ora hi Ma didinid’id’a. 6 Mi he groma vama ngat buzu ma ngala kur hor ra Hinom-mba. Mi vandjaf kumana teteng, mi nga mi djop fileina, mi tin suma a nga djop ki suma azuleinina ki suma a nga de zlad’a yam vama nga mbana mi, mi le sun nda tchod’a ngola avok Ma didina á zalam hurumu. 7 Mi tin filei ma mam tched’ema kur gong nga kud’ora hAlona d’a mam de mi David azi ki goroma Salomon kat ala: Ni kur gong nga kur Jerusalem mba an manat aduk andjafâ hi Israel-lâ peta ba, simiyên mba mi kak kua gak didinu d’a. 8 Le Israel-lâ a ngom vun ma he mana ki gat manda pet ta azong mana Moise mi dazizid’a ni, an mba ni walazi woi dei kandaga d’a an hat mabuyozi ngolod’a d’i. 9 Wani Manase mi zut suma Juda-na ki suma a nga kaka avo Jerusalem-ma á le tchod’a kal andjaf suma Ma didina mi dabazi woi tchid’a avok Israel-lîna.

10 Ma didina mi de mi Manase ki sum mama hina kö, wani azi nga hum mbi. 11 Ata yi máma Ma didina mi mba ki azigar suma nglo suma hamul ma Asiri-na atam á durâ. A vumu, a tchom atchinam ki kawei ma vunam gundina, a djinim ki kindjing ma hleuna, a mbam avo Babilon. 12 Ata yima mi nga kur ndakina, mi tchen Ma didina Alo mama, mi hulong yam kä avok Alona habuyom ngolona. 13 Mi tchenemu. Ma didina mi hum tchen mam mba hud’a, mi wum hohowomu, mi hulongôm avo Jerusalem kur leu mamba. Ata yi máma Manase mi wala Ma didina nAlo ma iratna.

14 Bugol ahle ndazina, mi min gulumun ma woi abu avun Azì ma ngolâ hi David-nina abo ma fladegena hi mbiyo ma lau ma Gihon-na kur hora gak mi mbaza avun agre’â hi kulufîna. Mi ngui Ofel lei d’uhl, mi minim akulo fiyaka dei, mi tin azigar suma nglona kur azì ma ad’eng ma ngungu ma kur Juda-na pepet mi. 15 Mi yo alona handjaf suma dingîna ki filei ma a tched’ema woi kur gong nga kud’ora hi Ma didinid’a, mi to yima ngal ahle suma ngat buzu suma mam minim yam ahina d’a gonga hi Ma didinid’a nga kua avo Jerusalem-ma woyo, mi tchugum sä woi bugol azì ma ngolâ. 16 Mi hulong mi min yima ngal ahle suma ngat buzuna hi Ma didinina akulo, mi hahle suma ngat buzu suma zlap darigïd’a kahle suma ngat buzu suma le mersid’a mi, mi de mi suma Juda-na ala a kud’orî Ma didina Alona hi Israel-lîna tu go. 17 Wani suma a nga hahle suma ngat buzuna yam yima nding ma a tinim iram vam ma kur ambasina, wani a hazi ni mi Ma didina Alo mazina hol.

18 Sunda hi Manase d’a ara ki tchen nda mi tchen Alo mamid’a ki zla d’a suma djok vuna a dumzi ki simiyê Ma didina Alona hi Israel-lîd’a, a b’irit nga kä kur Mbaktumba hamulei suma Israel-lîd’a. 19 Tchen mamba ki hum mba Alona mi humuta ki tcho mam mba mi lata ki sun mam mba ata yat tuo d’a ki yima mi min yima ndingâ kua á kud’or fileinina ki gong nga kud’or ra mi minit malo d’a a yat ala Asera-d’a ki filei ma mam tched’em avok kä bei mam hulong yam kä d’a, a b’irizi nga kä kur Mbaktumba hi Hozai-d’a. 20 Manase mi mit mi i azulei kä ad’u abuyom ngolo, a tozom kur aziyamu. Goroma Amon mi vrak tamula blangâmu.

Amul la ted’a hi Amon-nda

(Gol 2 Amul 21.19-26)

21 Kid’a Amon mi kak amulid’a, bizamî dok mbà yam mbà. Mi tamula avo Jerusalem bizad’a mbà. 22 Amon mi le sun nda tchod’a avok Ma didina d’igi abum Manase na d’ei. Mi kud’or filei ma abum Manase mi tched’ema pet, mi lum sunda mi. 23 Mi hulong nga yam kä avok Ma didina d’igi abum Manase mi hulong yam kä na d’i. Amon nga mi le tchod’a avogovogo, zlad’a nga kam avok Ma didina.

24 Azungeî mama a ndjak vunazi kamu, a tchum kur aziyamu. 25 Wani suma Juda-na a tchi suma a ndjak vunazi yam amulîna woyo, a man goroma Josiyas á kak amula blangâmu.