2 Sunda Hamuleinid’a 34 - Azumeina Bible 1999 (MPG)

Amul la ted’a hi Josiyas-sa. Mi hulong mi tin yima kud’ora

1 Kid’a Josiyas mi kak amulid’a, bizamî klavandi. Mi tamula avo Jerusalem bizad’a dok hindi yam tu. 2 Josiyas mi le sun nda d’ingêra avok Ma didina ki hurum pet d’igi abum ngolo David na, mi d’es nga woi kat yam bigam mba gulad’a d’oze yam mba ndjufa d’i.

3 Wani kur biza d’a klavandi d’a mam nga mi tamulid’a, ata yima mam nga kazongôm tua na, mi tin ad’ud’a á hal Alona habum ngolo David-na. Kur biza d’a dogo yam mbàd’a, mi nde to yima nding ma a tinim iram vama ki gong nga kud’or ra a minit malo d’a a yat ala Asera-d’a ki filei ma a tched’ema ki filei ma kawei ma a yoroma woi kur ambas sa Juda-d’a ki suma kur azì ma Jerusalem-mina woi mi. 4 A to yima ngal ahle suma ngat buzuna hi Bäl-lâ ma tetengâ kä woi avoromu, mi to filei ma afat ma nga kam akulo ma tetengâ kä woyo, mi kus agu ma murguli ma teteng ma a pum malo d’a a yat ala Asera-d’a kä woi ki filei ma teteng ma a tched’ema ki filei ma kawei ma teteng ma a yoroma kä woi mi, mi tozi woi kikizek, mi mbud’uzi d’igi andaga d’a gugud’upa na, mi tchuguzi sä woi yam asud’a hi suliyozi suma a ngad’azi buzunina. 5 Mi ngal asoga mazi suma ngat buzuna woi yam yi mazi ma ngal ahle mazi suma ngat buzuna ma tetengâ. Ni hina ba, mi mbut ambas sa Juda-d’a kazì ma Jerusalem-ma yed’et.

6 Bugola, mi kal kur azì ma nglona hi Manase-na ki ma hi Efraim-ma ki ma hi Simeon-na gak mba kur azina hi Neftali-na, ata yima lara ma b’lak keina. 7 Mi to yima ngal ahle suma ngat buzuna mi fileina ma tetengâ kä woyo, mi kus agu ma murguli ma teteng ma a pum malo d’a a yat ala Asera-d’a ki filei ma teteng ma a tched’ema kä woi kikizek, mi mbud’uzi d’igi andaga d’a gugud’upa na, mi to filei ma afat ma tetengâ kä woi kur ambasa pet, tua ba mi hulong avo Jerusalem.

Ma ngol ma ngat buzuna mi fe mbaktum mba gata

(Gol 2 Amul 22.3-10)

8 Kur biza d’a dogo yam klavandi d’a Josiyas nga mi tamulid’a, mi tin ad’ud’a á mbut ambasa ki gong nga kud’ora yed’et. Mi sun Safan Asaliya goroma, Mäseya ma ngol ma hur azinina ki Jowa Jowahas gorom ma b’ir zla d’a led’a kä na á min gong nga kud’ora hi Ma didinid’a Alo mama yat ma b’lak keina akulo. 9 Sum ndazina a i gen ma ngol ma ngat buzuna Hilkiya. A hum bege d’a a yod’ï kur gonga hAlona d’a suma hi Levi suma a ngom vun gonga a i vat abo suma hi Manase-na, abo suma hi Efraim-ma kabo Israel suma dingîd’a, zlapa ki bege d’a a vat abo suma Juda-nid’a ki d’a a vat abo suma Benjamin-nid’a pet ki d’a a vat abo suma avo Jerusalem-mid’a mi. 10 A mba a hat abo suma yam suna gonga hi Ma didinid’ina, a hat mi suma le sunda á le ki sunda kur gonga hi Ma didinid’a, á tcholot ad’enga, á minit yat ma b’lak keina akulo mi. 11 A hat mi suma tchet aguna ki suma min gongîyona á gus kahina d’a tcheta kagu ma ndjad’a katna á min ki gongîyo suma amulei suma Juda-na a arazi a b’lak keina akulo. 12 Sum ndazina a le sun mazid’a ni ki hur ma tuna, ad’u vun ma hed’a hi suma hi Levi-nina, nala, Jahat ki Obadiya suma ad’u andjafâ hi Merari-na ki Zakari ki Mesulam suma ad’u andjafâ hi Kehat-na. Suma hi Levi suma ding suma a we hle sawala kahle suma bud’a heîna a ni suma a gol sundina, 13 a ni suma yam suma zi ahlena yam suma a le sun nda lara ge petna. Suma hi Levi suma dingâ a ni suma b’ir mbaktumba, a ni suma nglo suma gol sunda ki suma a kak ndjolina mi.

14 Ata yima a yoï beged’a kur gonga hi Ma didinid’a woina, ma ngat buzuna Hilkiya mi fe mbaktum mba gata hi Ma didina d’a mi hat mi Moise-sa. 15 Ata yi máma Hilkiya mi de mi ma b’ir mbaktumba Safan ala: An fe mbaktum mba Gata kur gong nga kud’ora hi Ma didinid’a. Hilkiya mi he mbaktum ndata mi Safan.

16 Bugola, Safan mi i ki mbaktum ndata mamulâ, mi vum ad’ud’a yam sun nda a lata, mi dum ala: Azungeî mangâ a lahlena pet suma a hazi vuna kazina. 17 A ko bege d’a a fat kur gonga hi Ma didinid’a kä woyo, a hat mi suma a le sunda ki sed’etna ki suma le sunda mi.

18 Safan mi dum kua ala: Ma ngat buzuna Hilkiya mi han mbaktumba tu. Ata yi máma mi ndumut kä avok amulâ.

Josiyas mi i mi djop pa djok vun Alona Hulda

(Gol 2 Amul 22.11-20a)

19 Ata yima amulâ mi hum zlad’a hi gatid’ina, mi haû baru mama woi atamu. 20 Amulâ mi he vuna mi Hilkiya, Ahikam Safan goroma, Apdon Mise goroma, Safan ma b’ir mbaktumba ki Asaya mam ma sunda, mi dazi ala: 21 Agi i djobogi Ma didina kan an ki Israel suma a arâ ki suma Juda suma a arâ yam zla d’a kur mbaktum mba a fat wanda. Kayam Ma didina hurum mi zal kei ngola ni kayambala abuyoi ngolo a ngom nga zla mamba, a le nga sunda yam zla d’a pet ta a b’irit kur mbaktum ndata d’uo d’a.

22 Hilkiya azi ki suma ding suma amulâ mi manazina, a i avo hi d’a djok vun Alona Hulda d’a nga kaka avo Jerusalem kur kartiye d’a awilid’id’a. Natchad’a hi Salum ma Tokehat-na gorom ma Hasra gorom ngolonina ni ma ngom baru ma nga kur gong nga kud’orina. Azi vat ad’u zla d’a azi mba kata.

23 Ata yi máma ti hulong dazi ala: Agi i dagi mi sama mi sunugi gevena ala: Wana ni zla d’a ded’a hi Ma didina Alona hi Israel-lîna: 24 Mi dala: Gola! An Ma didina mba ni mba ki ndaka yam yima wana ki suma a nga kaka kuruma d’igi vun ma ge ma pet ma a b’irim zlam kur mbaktum mba a ndumut avok amul ma Juda-nid’a na. 25 Kayam azi aran ndei a ngal dubang ma his djivid’ina malo ma dingâ á zalan hurun ki sun nda lara ge d’a azi lat kabozid’a. Kayam ndata, hurun zal ngola yam yima wana, hurun nga mi vat tei d’i.

26 Wani agi i dagi mamul ma Juda ma mi sunugï á djobona ala: Zla d’a an Ma didina Alona hi Israel-lâ ni dat yam zla d’a ang humuta ba wana: 27 Ang hum zla d’a an dat yam azì ma Jerusalem-ma ki suma a nga kaka kurumid’a woi tetet. Kayam ndata, ang mbut hurungû, ang ge yang kä avoronu, ang haû baru mang ma atangâ woyo, ang tchi ki simina irang mi. An pî ni, ni humungû. An Ma didina ni de na. 28 An mba ni arang ang mba mit ki halasa, a mba tozong kur zul manga bei ang we ndak ka an nga ni mbat yam azì ma Jerusalem-ma ki suma a nga kaka kurumid’a ba.

Josiyas mi hulong djin vunam kAlona djin nda dinga

(Gol 2 Amul 22.20b—23.3)

Ma ngol ma ngat buzuna Hilkiya ki ndrom suma ki sed’ema a mba väd’u zla ndata mamulâ Josiyas. 29 Ata yi máma na wat, amulâ mi yi suma nglo suma Juda-na ki suma Jerusalem-ma pet. 30 Amulâ ki suma Juda-na pet ki suma a nga kaka avo Jerusalem-ma, suma ngat buzuna, suma hi Levi-na kablaud’a pet suma nglona ki kemba a tchuk krovo kur gulumuna hi gong nga kud’ora hi Ma didinid’a. Mi ndum zla d’a kur mbaktum mba Alona mi djin vunam kurut ta a fat kur gong mambid’a avorozi pet. 31 Amulâ mi ar tchola ata yamu. Mi djin vunam ki Ma didina á tit yam vun ma he mama, yam gat mamba ki hurum tu ki tam pet mi, á tit yam zlad’a hi vun ma djin mám ma a b’irit kur mbaktum ndatinid’a mi. 32 Amulâ mi le ki suma a mba Jerusalem-ma ki suma hi Benjamin-na á djin vunazi ki sed’em mi. Suma a nga kaka avo Jerusalem-ma a tit yam vun ma djin ma mi djinim kAlona habuyozi ngolonina.

33 Josiyas mi b’lak sun nda ndjendje d’a kur ambasa hi Israel-lîd’a woi pet, mi tin Israel-lâ pet á kud’or Ma didina Alo mazina. Ata yima mam nga ki irama, Israel-lâ a wal nga woi ki Ma didina Alona habuyozi ngolona d’i.