Josiyas mi le Pa’â
(Gol 2 Amul 23.21-23)1 Josiyas mi le vun til ma Pa’â avo Jerusalem á he ngola mi Ma didina. A ngat tumiyôna á Pa’â kur bur ma dogo yam fid’ina hi til ma avo’îna. 2 Mi tin suma ngat buzuna kur sun mazid’a, mi hazi ad’enga á le suna gong nga kud’ora hi Ma didinid’a. 3 Mi de mi suma hi Levi suma a nga hat Israel-lâ pet suma a tin tazi irat vat yam Ma didinina ala: Agi djogogi zanduk ma a tinim iram vama kur gong nga Salomon David amul ma Israel-lâ goroma mi minita, agi hlagizi kelegi d’uo d’a. Ki tchetchemba, agi lagi sunda mi Ma didina, mi mam suma Israel-lâ mi. 4 Agi minigi tagi ad’u andjavagiya, ad’u adezeziya, agi tid’igi yam zla d’a David amul ma Israel-lâ mi b’irit kä d’a ki zla d’a goroma Salomon mi b’irit kä d’a mi. 5 Ar agi andjafâ hi Levi ma lara pî ad’u adezemu, mi tchol ata yima a tinim iram vama, ngad’a yam Israel suma dingâ wala ad’u andjavazi teteng. 6 Agi mbud’ugi tagi yed’et, agi ngad’agi tumiyôna á Pa’â, agi minigi ahle mama yam b’oziyogi suma Israel-lâ, agi lagi ni d’igi zla d’a Ma didina mi dat avun Moise-sa na.
7 Josiyas mi he d’uwar ma gureina mablau suma a nga toka ata yi mámina. Tumiyôna ki b’ogeina á Pa’â ablawazi pet ni 30.000 kamuzleina 3000 mi. Wan pet nahle suma a yozï avo hamulîna. 8 Mam suma sunda a hahlena kur min mazid’a ki hur ma djivina mablaud’a, mi suma ngat buzuna, mi suma hi Levi-na mi. Suma a te yam gonga hAlonid’ina, nala, Hilkiya, Zakari ki Jehiyel, a he tumiyôna 2600 kamuzleina 300 á Pa’â mi suma ngat buzuna. 9 Konaniya, Semaya ki Netanel ki b’oziyoma Hasabiya, Jeyel ki Jozabat suma avok suma hi Levi-nina, a haho’â 5000 kamuzleina 500 á Pa’â mi suma hi Levi-na mi.
10 Ata yima a min sunda da na, suma ngat buzuna a tchol akulo ata yazi ma sunda zlapa ki suma hi Levi-na ad’u adezezi yam vun ma hed’a hamulîna. 11 A ngat ahle suma a hazi á Pa’îna, suma ngat buzuna a yam buzu ma a vum abo suma hi Levi-nina kä yam yima ngal ahle suma ngat buzuna. Suma hi Levi-na a nga ze ahle suma a tchazina woyo. 12 A tchuk hliu ma a hum á ngalina iram vam á hum mi suma ablaud’a ad’u andjavazi ad’u andjavaziya, tala azi hum mi Ma didina d’igi a b’ir kur gata hi Moise-sa na d’a, a le kamuzleina ni hina mi. 13 A sor hliu tumiyôna kakud’a d’igi gata de na, a yi hliu ma a tinim iram vama kur duguyona, ma dingâ a yum ki duguyo suma yavuna, ma dingâ a yum kur halâ mi, a b’rau ahle ndazina mi suma ablaud’a atogo zazak. 14 Bugola, suma hi Levi-na a min te ma kazi azina ki tena hi suma ngat buzunina, kayam suma ngat buzuna andjafâ hi Aron-na, a nga le sun nda ngal ahle suma ngat buzu suma ngala ki mbul ahle suma ngat buzuna gak andjege. Ni kayam ndata ba, suma hi Levi-na a min tena kazi azi ki suma ngat buzuna andjafâ hi Aron-na. 15 Suma hle sawala andjafâ hi Asaf-fâ a nga tchola ata yazi ma sunda d’igi David azi ki Asaf, Heman ki Jedutun ma wahle suma a nga mbana hamulîna a he vuna na. Suma ngom vun gongîyona a nga tchola ata vun agrek ma lara pî gagang. Suma hle sawala ki suma ngom vun gongîyona, sa mi djok nga ad’um mbei ata yam ma sunda d’i, kayam b’oziyozi suma hi Levi-na a nga min tena kaziya. 16 Ni hina ba, a min ahle suma a le ki sunda hi Ma didinid’a kur bur máma á le ki vun til ma Pa’â, á hahle suma ngat buzu suma ngala yam yima ngal ahle suma ngat buzuna hi Ma didinina d’igi amulâ Josiyas mi he vuna na.
17 Israel suma a nga ata yi máma kur bur mámina a le vun til ma Pa’â ki vun til ma a lum kavungô ma bei angufina gak burâ kid’iziya mi. 18 Tinï ad’ud’a kur atchogoid’a hi Samuel ma djok vun Alonid’a dei, a le nga vun til ma Pak ma hina na aduk Israel-lâ yazi tu d’i. Amul ma ding ma Israel ma zlapa ki suma ngat buzuna ki suma hi Levi-na ki suma Juda-na ki Israel suma pet suma a nga ata yi mámina zlapa ki suma a nga kaka avo Jerusalem-ma mi a le nga vun til ma Pak ma d’igi Josiyas mi lum hina na yazi tu d’uo mi. 19 A le vun til ma Pak máma ni kur biza d’a dogo yam klavandi d’a Josiyas nga mi tamulid’a.
Amul la ted’a dabid’a hi Josiyas-sa
(Gol 2 Amul 23.28-30)20 Bugol ahle ndazina, kid’a Josiyas mi min gong nga kud’ora hi Ma didinid’a yat ma b’lak keina akulo minda, Neko amul ma Ezipte-na mi i Karkemis avun alum ma Efrat-na á dur ayîna. Josiyas mi nde ngavam á durâ. 21 Wani Neko mi ge sunda atam mi dum ala: Ang amul ma Juda-na, vama ndolong ki an ni me ge? An mba á dur ayîna ini nata ang ngi, wani nata suma ding suma a kak djangûna ki sed’ena. Alona mi dan ala an b’at tan atogo. Ar ang d’el Alo ma nga ki sed’ena tala mi tchang ngei d’uo d’a!
22 Wani Josiyas nga mi aram bed’em mbi. Mi mbut tam sama dingâ á dur ayîna, mi hum nga zla d’a tcholï avun Alona d’a mi dat mi Neko-d’a d’i, mi i dur ayîna kur hor ra Megido-d’a. 23 Suma a dur ki yeûd’ina a yet amulâ Josiyas. Mi de mazungeî mama ala: Agi hlanu, kayam an fe dak ka ngola!
24 Azungeî mama a hlum kur pus mama, a mba djogom mbei kur pus mam ma mbàna, a im avo Jerusalem. Mi mit sä kua kolâ, a tozom gen abuyom ngolo. Suma Juda-na ki suma Jerusalem-ma pet a tchi horâ Josiyas.
25 Ma djok vun Alona Jeremi, mi tchi horâ Josiyas. Andjof suma hle sawala karop suma hle sawala a nga de zla Josiyas kur hor mazi ma tchina gak ini mi. Sawal ndata ti mbut ni gata aduk Israel-lâ, a b’irit nga kä kur Mbaktum mba horâ.
26 Sunda hi Josiyas sa ara ki sun mam mba djivi d’a mi lat yam Alonid’a, ti ndjak ki zla d’a nga b’ira kä kur gata hi Ma didinid’a mi. 27 Sun mam mba avoka ki d’a dananda, a b’irit nga kä kur Mbaktumba hamulei suma Israel-lâ kamulei suma Juda-nid’a mi.
© Azumeina Bible © Alliance Biblique du Tchad, 1999.
