Ge hum mba bugola ki dep pa ged’a
1 Wana ni i manda yan á hindid’a á iza hatagid’a. D’igi mbaktumba hAlonid’a ti de na ala: Le zla d’a glangâsâ hi suma mbà d’oze hindid’a ti ndjak tu yam sama a tchugum zlad’a kama ni, zlad’a mba d’i vumu. 2 Kayam ndata, kid’a an mbaza kam mbei hatagi yan á mbàd’id’a, an ngop suma a le tchod’a adjeuna ki suma dingâ mi. Wani ki tchetchemba, an sä adigagi d’uo pî, an nga ni dugot ded’a kua: Fata an mbaza hatagid’a, an mba ni arazi hawa bei ngopa d’i. 3 Kayam agi min á we zla d’a ded’a hi Christ sa an nga ni data, agi mba wad’u. Ni Christ ma nga amangeîd’a adigagi d’uo na, nga mi tak ad’eng mamba woi adigagi mi. 4 Wani le a b’alam akulo ata aguna d’igi sama amangeîna na pî, mam nga karid’a yam ad’enga hAlonid’a. Hina mi, ami namangeîd’a zlapa tu ki mamu, wani ami mba kagami karid’a zlapa ki mam yam ad’enga hAlonid’a á ndjunugiya.
5 Kayam ndata, ar agi gologi tagi djiviya, na ni agi nga hagi gagazid’a gagazi zu? Ar agi kugugi tagiya. Agi wagiya, na ni Christ nga kurugi gagazi zu? D’oze agi mba kid’agagi woi zu? 6 An min agi wagi ala ami ndagami yam kuk ndata. 7 Wani ami nga tchenemi Alona kagi ala ar agi lagi tchod’a d’i. Nga ni kayambala ami ndagamiya d’a d’i, wani le ami ndagami nga d’uo pî, ar agi lagi nahle suma djivina. 8 Kayam ami ndak á lami vama tchila yam zla d’a gagazid’a hAlonid’ina d’i, wani ami lami ahlena pet ni yam zla d’a gagazid’a. 9 Le ami namangeîd’a, le agi nga kad’enga ni, ami nga lami furîd’a kayam ndata. Ami nga tchenemi Alona kagi ala agi ndagagi memet. 10 Le an sä adigagi d’uo pî, an nga ni b’irigi mbaktum mba wanda, kayam fata an mbazid’a, an mba ni lagi kad’eng nga Salad’a mi handjid’a d’i. Kayam ad’eng nga Salad’a mi handjid’a ná wulugi akulo kur he gagazid’a, ná b’lagagi d’i.
11 B’oziyona, vama arâ, ar agi kagagi lafiya. Ar agi kagagi ni suma ndak memetna, ar agi b’lengêgi hur tagiya, ar agi kagagi ki djib’er ra tud’a, ar agi kagagi ki b’leng nga halasa aduk tagi mi. Hina wani, Alo ma od’a ma b’leng nga halasa mba mi kak ki sed’egiya.
12 Ar agi b’ed’egi tagi kokok ki dep pa ged’a. Suma hAlonina pet a gagi depa mi.
13 Ar sumad’a hi Saleina Jesus Christ-sa ki od’a hAlonid’a ki darigïd’a hi Muzuk mam ma bei tchod’a ba nid’a a kak ki sed’egi pet mi.
© Azumeina Bible © Alliance Biblique du Tchad, 1999.
