Tchid’a hi suma hi Ahap-mid’a
1 Ahap grom suma andjofâ dok kid’iziya a nga avo Samari. Jehu mi sun mbaktumba avo Samari mi azigar suma nglo suma kur azì ma ngol ma Jisreyel-lâ ki suma nglona ki suma a nga ngom Ahap gromina. Mi dazi kur ala: 2 Ki tchetchemba, le mbaktum ndata fagiya ni, salagina groma a nga nabogiya. Pus ma dur ayîna teteng kakulumeina kazì ma ad’eng ma ngungu ma ahle suma dur ayîna nga kuana a nga nabogi mi. 3 Agi gologi aduk amulâ groma ma djivi ma ndak á kak amulina, agi tinim yam zlam mba amula habumba. Bugola, agi minigi tagi á durugi yam suma avo hamulîna mi.
4 Wani a le mandarâ ngolâ, a de tazi ala: Amulei suma mbàna a tchol nga avorom mbuo d’uo d’a; ei ndak á tcholï avorom zu?
5 Ata yi máma na wat ma ngol ma hur azina hamulîna ki ma ngolâ hi azigar suma hur azì ma ngolîna ki suma nglona ki suma a nga ngom amulâ gromina, a hulong humba mi Jehu ala: Ami nazungeî mangâ, ami mba lami ahlena pet suma ang hami vuna kazina, ami mba tinimi amul ma ding ngi. Ang le vama ang hurung minima.
6 Jehu mi sun mbaktum mba mbàd’a ala: Le agi ni sun mana, le agi min gagi yagi kä ad’u zla manda ni, agi ngad’agi yam suma avo hamulîna woi pet, agi mbeï fan ka hî avo Jisreyel avin hina dedege. Amulâ grom suma dok kid’iziya ndazina a wulî avo hamulâ ndram ma ngol ma sunda.
7 Kid’a suma nglona a fe mbaktum ndatid’a, a yo amulâ grom suma dok kid’iziyana, a tchaziya, a yozi yazi kur gogologeina, a sunut mi Jehu avo Jisreyel.
8 Sama sunda mi mba mi de mi Jehu ala: A mba wa ki yam amulâ grom ndazina da’.
Jehu mi dazi ala: A i molot kä avun agre’â ad’u mbà gak yorogo.
9 Tcha ndjivin yorogod’a, Jehu mi nde woi hur azina, mi tchola, nga mi de mablaud’a ala: Agi zla nga kagi d’i. An ni sala zlad’a, ni an ba ni ndjak vunan ki suma dingâ yam amulâ, ni tchumu. Wani suma yazi mola pet wana, sama mi tchazina ni nge ge? 10 Agi wagiya, zla d’a Ma didina mi dat yam suma hi Ahap-mid’a nga d’i dap pei hawa d’i. Ma didina mi nda’î vun zla d’a mam dat avun mam ma djok vuna Elie-d’a. 11 Kayam ndata, Jehu mi tchi suma hi Ahap suma a nga kaka Jisreyel-lâ woi pet ki ndrom suma nglo suma sunda ki buniyôma ki mam suma ngat buzuna woi pepet; mi ar nga sa tu á sut ti.
Tchid’a hi suma hamul ma Juda-nid’a
(Gol 2 Sun hAm 22.8)12 Jehu mi tchol á i Samari. Kid’a mi mbaza Bet-Eket ta hi suma polid’a, 13 mi ngaf ki suma hamulâ Ahaziya ma Juda-na. Mi djobozi ala: Agi ni suma lara ge?
A hulong dum ala: Ami ni suma hi Ahaziya-na. Ami mba ná gami amula Jezabel grotna ki suma a ar avo hamulîna depa.
14 Jehu mi er ad’um akulo ala: Agi yogiziya! Ndrom suma ki sed’ema a yozi a tchaziya, a tchuguzi mad’azi kur golong nga Bet-Eket-ta; azi ni dok fid’i yam mbà. Sa adigazi tu pî mi sut ti.
Jehu mi ngaf ki Jonadap
15 Jehu mi hut avok hina nde, mi we Jonadap Rekap goroma nga mi djï avoromu. Mam gum depa, mi dum ala: Ang hurung djivid’a atan d’igi an hurun djivid’a atang na mi zu?
Jonadap mi hulong dum ala: Â.
Jehu mi dum ala: Djiviya, vei abo teya. A vabo taziya. Bugola, Jehu mi hlum akulo kur pus mam ma dur ayîna.
16 Jehu mi dum ala: Ang mbeï i ki sed’enu, ang mba we vama djivi ma an mba ni lum yam Ma didinina. Ni hina ba, mi hlum kur pus mama. 17 Kid’a mi mbaza Samari-d’a, mi tchi suma avo hi Ahap suma a arâ woi pet, mi dap andjaf mama woi pet d’igi Ma didina mi de mi ma djok vun mama Elie na.
Jehu mi d’el suma á kud’or Bäl
18 Jehu mi tok suma kur azinina pet, mi dazi ala: Ahap mi kud’or Bäl nakid’eid’a, wani an tan Jehu mba ni kud’urom kala. 19 Ar agi yagï suma djok vuna hi Bäl-lâ ki suma a kud’uroma ki suma a ngad’am buzunina pepet, a mbeï gevenu. Ar sa arza woi tu d’i, kayam an min le vun til ma ngolâ á ngat buzuna á subur Bäl. Sama ar bei mbad’ina, a mba tchum mbeyo! Jehu mi le ni lemba á tchi suma a kud’or Bäl-lâ woyo.
20 Jehu mi he vuna ala: Agi gagi tok ka djivid’a á läd’u Bäl. Azi yi suma, 21 azi b’rau sunda kur ambas sa Israel-la pet. Suma a kud’or Bäl-lâ pet a mba, sa arza woi tu d’i, a oî gong nga a kud’or Bäl kuad’a ndinding.
22 Ata yi máma Jehu mi de mi sama nga mi ngom baru ma a kud’or ki Bäl-lîna ala: Ang i yoï baruna mi suma a kud’or Bäl-lâ. Mam yoziziya.
23 Bugola, Jehu azi ki Jonadap Rekap goroma a tchuk klavi kur gong nga a kud’or Bäl kuad’a, a de mi suma a nga kud’or Bäl-lâ ala: Agi gologi djivi tetet! Adigagi wani ar a fe sama kud’or Ma didinina tu d’i; wani arî agi pepet ni suma kud’urogi Bäl-lâ hol.
24 Jehu mi tin azigarâ dok klavandi abu avun gonga, mi dazi ala: An hagi sum ndazina pet nabogiya. Le sama ar sa adigazi tu mi sud’a ni, an mba mi tchi sa máma balum sa máma.
Ata yi máma Jehu azi ki Jonadap a tchuk klaviya, a hahle suma ngat buzu suma zlap darigïd’a kahle suma ngat buzu suma ngala teteng mi.
25 Kid’a abozi mi dapa, Jehu mi de mi azigarâ ki mazi suma nglona ala: Agi tchugugi klaviya, agi tchagi sum ndazina woyo. Ar sa adigazi tu pî mi ndabu d’i.
A tchaziya, a tchuguzi mad’azi woi abua. Bugola, a tchuk klavi ata yima a tinim iram vam ma kal teglesâ kur gong nga a kud’or Bäl kuad’a. 26 A yoï ahina d’a tchet ta kur gonga hi Bäl-lid’a woi abua, a ngalat tei kakud’a. 27 Azi to ahina d’a tcheta hi Bäl-lâ kä woyo, a to gonga hi Bäl-la tata kä woi mi, a mbud’ut ni yima o sutna gak ini.
Jehu mi tamula yam Israel-lâ
28 Ni hina ba, Jehu mi tchi kud’ora hi Bäl-la woi aduk Israel-lâ. 29 Wan pî, Jehu mi wal nga ki tcho d’a Jerobowam Nebat goroma mi lat mi zut ki Israel-lâ á le tchod’a á kud’or amuhl ma lor ma avo Betel ki Dan-nid’a woi d’i.
30 Ata yi máma Ma didina mi de mi Jehu ala: Ang le wa vama d’ingêra ma an hurun minima, ang ndak wa vun vama an ngam kurun á ngop ki suma hi Ahap-mina. Kayam ndata, andjavang mba mi kak yam zlam mba amula aduk Israel-lâ gak kur atchogoi d’a fid’id’a.
31 Wani Jehu mi ge nga yam kä ad’u gata hi Ma didina Alona hi Israel-lîd’a ki hurum pet ti, mi wal nga ki tcho d’a Jerobowam mi lat mi zut Israel-lâ á le tchod’id’a woi tu d’uo mi.
32 Kur atchogoi ndata tata, Ma didina mi nde mi ka andaga d’a Israel-la woyo. Hazayel amul ma Siri-na nga mi dur ki Israel-lâ ir hagad’a pet. 33 Mi yo andagad’a mi tinï ad’ud’a avun alum ma Jurdê-na abo ma yorogona gak mi mba kur azì ma Arower ma avun alum ma Arnon-na, gak mi mba yam andaga d’a Galät-ta ki d’a Basan-nda pet. Andaga ndata pet nandagad’a handjafâ hi Gad-na ki ma hi Ruben-na ki ma hi Manase-na mi.
34 Sunda hi Jehu d’a ara kahle suma mi lazina pet kad’eng mam mba dur ayîna, a b’irizi nga kä kur Mbaktum mba de zlad’a yam Sunda hAmulei suma Israel-lîd’a.
35-36 Mi tamula yam Israel-lâ bizad’a dok mbà yam klavandi avo Samari. Mi mit mi i azulei kä ad’u abuyom ngolo. A tozom avo Samari. Goroma Jowahas mi vrak tamula blangâmu.
© Azumeina Bible © Alliance Biblique du Tchad, 1999.
