Atali ti tamula avo Jerusalem
(Gol 2 Sun hAm 22.10-12)1 Ata yima Atali Ahaziya asum mbi hum ala gorotna mi mit wa na, ti tchola, ti tchi andjaf ma amula woi pet. 2 Wani ata yima a nga tchazina, Joseba Joram amul ma Juda-na goromba, Ahaziya wiyemba, ti ve Jowas Ahaziya goroma gumun aduk amulâ groma, ti hum abo atcha d’a wulumba kur gong nga burâ á sud’um mbei abo Atali, kayam ndat ti tchum mbi. 3 Jowas mi ar kaka ki Joseba kur gong nga kud’ora hi Ma didinid’a ngeid’a gak bizad’a karagaya. Wani Atali nga d’i tamula yam ambasa.
A tin Jowas iram vam á tamula
(Gol 2 Sun hAm 23.1-21)4 Kur biza d’a kid’iziyad’a, ma ngat buzuna Jehojada mi yï azigar suma nglo suma avok azigar suma kikis suma Keret-na ki azigar suma ding suma ndjola, mi i ki sed’ezi kur gong nga kud’ora hi Ma didinid’a, mi djin vunam ki sed’eziya; a gun tazi mi. Ata yi máma mi tagazi amulâ goroma.
5 Bugola, mi hazi vuna ala: Vama agi mba luma ba wana: Aduk magi suma a nga ve sunda kur bur ma sabatnina, ades ma avo’â mi tchol ndjola kur gong nga amula, 6 ades ma mbàna mi tchol ndjola avun agrek ma a yum ala Sur-râ, ades ma hindina mi tchol ndjola avun agrek ma bugol suma ndjolina, kayam ar sa mi kal kua d’i. 7 Wani ades magi ma mbà ma mi nga mi le sunda kur bur ma sabat tuo na, mi tchol ndjola avun gong nga kud’ora hi Ma didinid’a gen amulâ. 8 Agi yogi ahle suma sïna abogiya, agi nguyugi amulâ kä. Sama lara ma mi min kal kur gongina, agi tchum mbeyo. Ata yima amulâ mi ndabuna, ata yima mi kal avona mi, agi gologizi ped’et.
9 Azigar suma nglo suma avok azigar suma kikisâ a lahlena pet suma ma ngat buzuna Jehojada mi hazi vuna kazina. Azi nge nge pî, mi yo sum mama, suma a kal á le sunda kur bur ma sabatnina ki suma sun mazid’a dap kur bur ma sabatnina mi, a i gen Jehojada. 10 Ata yi máma Jehojada mi hasubiyona ki mboriyo suma amulâ David mi tchuguzi kur gong nga kud’ora hi Ma didinid’ina abo azigar suma nglo ndazina. 11 Azigarâ nge nge pî mi tchol kahle suma sïna abomu, tin ad’ud’a ata gonga abot ma ndjufâ dei gak mba ata gonga abot ma gulana go ki yima ngal ahle suma ngat buzuna go ki gong nga kud’ora, a ngui amulâ kä d’uhl. 12 Ma ngat buzuna Jehojada mi ndeï kamulâ goroma Jowas sei abua, mi kulubum djum mba amula kamu, mi ndeï ki vama glangâsâ woi kam mi. A tinim amula, a vom mbulâ kamu, a tchaboziya, a dala: Amulâ, ar va mi lang ngi!
13 Ata yima Atali ti hum siwela hi azigarîd’a ki d’a hi sumid’ina, ti mbeï gen suma kur gong nga kud’ora hi Ma didinid’a. 14 Ti gola, ti wamulâ mi nga tchola ata yima ndingâ d’igi azi nga le na. Suma nglona ki suma a bu aduveina a nga tchola gen amulâ. Suma kur ambasina pet a nga le furîd’a, suma a nga bu aduveina a nga buzi mi. Ata yi máma Atali ti haû baru matna woyo, ti er ad’ut akulo ala: Ihî ni mbut ira! Ihî ni mbut ira!
15 Jehojada mi dala: A tchat kur gong nga kud’ora hi Ma didinid’a d’i. Kayam ndata, mi he vuna mi azigar suma nglo suma a he vuna mi azigarîna ala: Agi ndattcha woi abu adigagi kur ndjar magid’a. Le sa mi ge tam ad’ud’u ni, agi tchumu!
16 A tanat tei kur azì ma amula, a mbattcha avun agre’â hakulumeinina, a tchad’u.
17 Jehojada mi mba ki vun ma djinda aduk Ma didina kamulâ ki sumuna, a djin vunazi ala ar azi ka’î suma hi Ma didinina. Mi mba ki vun ma djinda aduk amulâ ki sumuna mi. 18 Ata yi máma suma kur ambasina pet a tchuk kur gong nga kud’ora halo ma a yum ala Bäl-lîd’a, a pleyêt teyo, a to yima teteng ma ngal ahle suma ngat buzuna ki filei mazi ma teteng ma nga tchola kuana woi kakaf. A tchi Matan ma ngat buzuna hi Bäl-lâ kä woi avok yima ngal ahle suma ngat buzuna mi. Bugola, Jehojada mi tin suma nglona á ngom gong nga kud’ora hi Ma didinid’a. 19 Jehojada mi yo azigar suma nglo suma avok azigar suma kikisâ ki suma Keret-na ki azigar suma ding suma ndjola ki suma kur ambasina pet, á tcholï kamulâ kur gong nga kud’ora hi Ma didinid’a á tinim avo kur azì ma amula. A hle lovot ta avun agrek ma suma ndjola a nga kuana. Ata yi máma Jowas mi kak yam zlam mam mba amula. 20 Suma kur ambasina pet a nga le furîd’a.
Suma kur azì ma ngolîna a kak ki halasa yam tchi d’a a tchi Atali woi kur azì ma amulid’a.
Jowas mi tamula yam Juda-na
(Gol 2 Sun hAm 24.1-3)21 Kid’a Jowas mi kak amulid’a, bizamî kid’iziya.
© Azumeina Bible © Alliance Biblique du Tchad, 1999.
