1 Kur bizad’a kid’iziya d’a Jehu nga mi tamula yam Israel-lîd’a, Jowas mi kak amula yam suma Juda-na avo Jerusalem. Mi tamula bizad’a dok fid’i. Asum a yat ala Sibiya d’a Berseba-d’a. 2 Kid’a mam nga ki iram tua d’a, mi le sun nda d’ingêra avok Ma didina, kayam mi tit ad’u hat ta Jehojada ma ngat buzuna mi had’amzid’a.
3 Wani mi to nga yima nding ma a tinim iram vam ma suma a nga hahle suma ngat buzuna ki dubang ma his djivid’ina kuana kä woi d’i.
Jowas mi hulong mi min gong nga kud’ora akulo
(Gol 2 Sun hAm 24.4-14)4-5 Bur tu Jowas mi de mi suma ngat buzuna ala: Agi vagi beged’a pet ta a nga mba ki sed’et kur gong nga kud’ora hi Ma didinid’a á le sunda hi Ma didinid’a, nala, bege d’a a nga vat abo sumid’a ki bege d’a sana mi hat kur min mambid’a. Agi vagi bege ndata abo suma agi wazina, agi lagi sunda ki sed’et á minigi ki gong nga kud’ora hi Ma didinid’a yat ma b’lak keina akulo pet. 6 Wani kur biza mam mba dok mbà yam hindi d’a mam tamulid’a, suma ngat buzuna a min nga gonga hi Ma didinid’a yat ma b’lak keina akulo d’i.
7 Jowas mi yi Jehojada ki suma ngat buzu suma dingâ, mi djobozi ala: Ni kayam me ba, agi minigi gong nga kud’ora hi Ma didinid’a yat ma b’lak keina akulo d’uo ge? Ki tchetchemba, ar agi vagi beged’a abo suma agi wagizina d’uo d’a, wani agi arat á min ki gonga hi Ma didinid’a yat ma b’lak keina akulo.
8 Suma ngat buzuna a ndjak vunazi ki sed’em ala azi ve beged’a abo suma d’uo mi na, a min gonga hi Ma didinid’a yat ma b’lak keina akulo d’uo mi.
9 Ma ngat buzuna Jehojada mi hle zandu’â, mi tchom vunam ndulung, mi tinim go ki yima ngal ahle suma ngat buzuna ata gonga abot ma ndjufâ ata yima suma a kal kuana. Suma ngat buzu suma a nga ngom vun agre’îna a nga tchuk bege d’a pet ta suma a nga mba ki sed’et kur gonga hi Ma didinid’a kur zanduk máma. 10 Azi le we beged’a ti mba ngola kur zandu’â ni, a yï ma b’ir mbaktumba hamulîna ki ma ngol ma ngat buzuna mi. Azi a yoï bege ndata, a ndumud’u. 11 Kid’a azi ndumut da d’a, a hat abo suma a nga gol suna gong nga kud’ora hi Ma didinid’ina, kayam azi wurak ki suma sun suma a nga min gong ndatina, nala, suma tchet aguna, 12 suma min gongîyona ki suma tchet ahinad’a á gus aguna kahina d’a tcheta kahlena pet suma ndak á min ki gong nga kud’ora hi Ma didinid’a yat ma b’lak keina akulo.
13 Wani he d’a hawa d’a azi mba ki sed’et kur gonga hi Ma didinid’a ndata, a yor nga ki hal ma kawei ma hap poze vama min ki lalambina d’oze hal ma vo buzuna d’oze aduveina d’oze ahle suma d’igi lora d’oze kawei ma hapma na na d’i. 14 Azi hat abo suma gol suna gonga, kayam azi min ki gonga yat ma b’lak keina akulo. 15 Azi hal nga ad’u suma a hazi beged’a a wurak ki suma sundina d’i, kayam azi le sun mazid’a nata yat memet. 16 Wani bege d’a ding nga suma a hat he d’a hawa d’a yam tchilad’a hi sanid’a ki bege d’a a hat yam tcho d’a sana mi lata, a nga tchugut kur zandu’â d’i; bege ndata ni hi suma ngat buzunid’a.
Amul la te d’a dabid’a hi Jowas-sa
(Gol 2 Sun hAm 24.23-27)17 Kur atchogoi ndata Hazayel amul ma Siri-na mi mba á dur ayîna kazì ma Gat-na, mi hlumu, mi nga hurum ala mam i dur ayîna ki Jerusalem mi. 18 Ata yi máma na wat, Jowas mi yo ahle suma mam kabuyom ngolo amulei suma Juda-na Josafat ki Joram ki Ahaziya a tinizi irazi vazina pet ki lor ra nga tinda kur gong nga ngom ndjondjoî d’a kur gong nga kud’ora hi Ma didinid’a ki d’a nga kur azì ma amulid’a pet mi. Mi yot mi it mamulâ Hazayel pet. Ni kayam ndata ba, Hazayel mi ar Jerusalem bei durâ.
19 Sunda hi Jowas sa ara kahle suma mi lazina pet a b’irizi nga kä kur Mbaktum mba de zlad’a yam Sunda hAmulei suma Juda-nid’a. 20-21 Mam suma nglona a ndjak vunazi á kak djangûna ki sed’emu. Suma dingâ mbà adigaziya, ma hina a yum ala Jozakar ni Simat goroma, ma hina a yum ala Jozabat ni Somer goroma, a tom a tchum avo Milo go ki lovot ta djak kä i Sila-d’a. Suma Juda-na a tozom gen simiyêm kur Azì ma ngolâ hi David-na. Goroma Amasiya mi vrak tamula blangâmu.
© Azumeina Bible © Alliance Biblique du Tchad, 1999.
