Amasiya mi tamula yam Juda-na
(Gol 2 Sun hAm 25.1-42 11-122 17-282 26.1-2)1 Kur biza d’a mbà d’a Jowas Jowahas goroma amul ma Israel-lâ nga mi tamulid’a, Amasiya Jowas goroma mi kak amula yam suma Juda-na. 2 Kid’a mi kak amulid’a, bizamî dok mbà yam vahl. Mi tamula bizad’a dok mbà yam zlengâ avo Jerusalem. Asum a yat ala Jowadan ni d’a Jerusalem-mba.
3 Amasiya mi le sun nda d’ingêra avok Ma didina wani nga d’igi abum ngolo David na d’i. Mi le ni d’igi abum Jowas hina dedege. 4 Hina pî mi to nga yima nding ma a tinim iram vam ma suma a nga hahle suma ngat buzuna ki dubang ma his djivid’ina kuana kä woi d’i. 5 Kid’a amul mamba ad’ut b’al kä ngingi d’a, mi tchi azungeî mam suma a tchi abum amulâ Jowas seina. 6 Wani mi tchi nga suma tchi matna grozina woi d’i, kayam zla d’a a b’irit kur Mbaktum mba Gata hi Moise-sa, kayam Ma didina mi he vuna ala: Ar agi tchagi abuyod’a woi yam tchod’a hi grod’id’a d’i, ar agi tchagi grod’a woi yam tchod’a habuyod’id’a d’uo mi. Ar agi tchagi nge nge pî yam tcho mam mba mi lata.
7 Amasiya mi tchi azigar suma Edom-ma 10.000 kur hor ra Ndjuvuna kur ayî ma durâ, mi hlazì ma Sela-na, mi djogom simiyêm ala Joktel, ni simi máma ba, a nga yum ki gak ini.
8 Bur tu Amasiya mi sun suma ata Jowas Jowahas gorom ma Jehu gorom ngolona amul ma Israel-lâ, mi dum ala: Ang ngavanï, ei duri tei ayîna.
9 Jowas amul ma Israel-lâ mi ge sunda ata Amasiya amul ma Juda-na, mi dum ala: Bur tu awei d’a Liban-nda, ti ge sunda ata agu sedre ma Liban-na, ti dum ala: Ar an ve goronga mi gorona atchad’a. Wani ambur ma abagei ma Liban-na mi kal tita, mi miret awei ndata kä!
10 Jowas mi dum kua ala: Kayam ang kus yam suma Edom-ma, ang nga hle yang akulo, ang nga subur ki tang wana. Kayam ndata, ar ang kak avo hatangû! Ni kayam me ba, ang hal ayîna á mba ki ndaka kang á tchang zlapa ki suma Juda-na ge?
11 Wani Amasiya mi hum nga zla ndata d’i. Ata yi máma Jowas amul ma Israel-lâ mi i á dur ayîna ki Amasiya amul ma Juda-na avo Bet-Semes sa kur ambas sa Juda-d’id’a. 12 Azigar suma Israel-lâ a kus yam suma Juda-na; a wet ringâ, nge nge pî mi i avo hatamu. 13 Jowas amul ma Israel-lâ mi ve Amasiya amul ma Juda ma Jowas gorom ma Ahaziya gorom ngolonina avo Bet-Semes. Bugola, mi i Jerusalem, mi to abo gulumun ma Jerusalem-ma kä woi ndak metred’a kikis mbà, tinï ad’ud’a avun agre’â hi suma Efraim-mina dei gak mba avun agrek ma gulumuna mi kong kuana. 14 Mi yo lora ki kawei ma hapma kahle suma a fazi kur gong nga kud’ora hi Ma didinid’ina kahle suma a fazi kur azì ma amulina, mi yo suma dingâ balâ, mi hulong avo Samari.
15 Sunda hi Jowas sa ara kahle suma mi lazina kad’eng mam mba dur ayîna kayî ma mam durum ki Amasiya amul ma Juda-nina, a b’irizi nga kä kur Mbaktum mba de zlad’a yam Sunda hAmulei suma Israel-lîd’a.
16 Jowas mi mit mi i azulei kä ad’u abuyom ngolo. A tozom avo Samari gen amulei suma Israel-lâ. Goroma Jerobowam mi vrak tamula blangâmu.
17 Bugol matna hi Jowas amul ma Israel-lîna, Amasiya Jowas gorom ma amul ma Juda-na mi le bizad’a blogom dogo yam vahl.
18 Sunda hi Amasiya d’a ara a b’irit nga kä kur Mbaktum mba de zlad’a yam Sunda hAmulei suma Juda-nid’a.
19 Ata yi máma suma Jerusalem-ma a ndjak vunazi yam Amasiya avo Jerusalem. Mi ring Lakis, wani a digim ad’um gak a mbaza Lakis, a tchum sä kua kolâ. 20 Wani sum mama a hlumï mad’am ki pusâ hakulumeinina, a mbam avo Jerusalem, a tozom gen abuyom ngolo kur Azì ma ngolâ hi David-na. 21 Azariya Amasiya goroma bizamî dogo yam karagaya, suma Juda-na a manam a tinim amula balum abumu. 22 Bugol matna habuma, mi dur mi hlazì ma Elat-na, mi hulongôm mi suma Juda-na.
Jerobowam ma mbàna mi tamula yam Israel-lâ
23 Kur biza d’a dogo yam vahl hla Amasiya Jowas gorom ma amul ma Juda-na nga mi tamulid’a, Jerobowam Jowas goroma mi kak amula yam Israel-lâ avo Samari, mi tamula bizad’a dok fid’i yam tu. 24 Mi le sun nda tchod’a avok Ma didina, mi wal nga ki tcho d’a Jerobowam Nebat goroma d’a mi lat mi zut ki Israel-lâ á le tchod’id’a woi tu d’i. 25 Mi yo andagad’a hi Israel-lîd’a, tinï ad’ud’a Hamat abo ma norâ dei gak mba avun apo d’a Matna abo ma sutna, d’igi Ma didina Alona hi Israel-lîna mi dat avun ma djogom vunama Jonas Amitai gorom ma Gat-Hefer-râ na.
26 Ma didina mi we ndaka hi Israel-lâ d’a kal kazi heîd’a. Ndak ndata ti ni yam magumeina ki gro vuta pet, wani sama tu ma mi ndak á ndjunuzina nga d’i, gagazi, sa nga d’i. 27 Wani Ma didina mi min b’lagazi woi d’i. Kayam ndata, mi had’enga mi Jerobowam Jowas goroma mi sud’uzi woyo.
28 Sunda hi Jerobowam mba ara kahle suma mi lazina kad’eng mam mba dur ayîna ki hulong nga mi hulong azì ma Damas-sâ ki ma Hamat-na mi Israel-lîd’a, a b’irizi nga kä kur Mbaktum mba de zlad’a yam Sunda hAmulei suma Israel-lîd’a.
29 Jerobowam mi mit mi i azulei kä ad’u abuyom ngolo. A tozom avo Samari gen amulei suma Israel-lâ. Goroma Zakari mi vrak tamula blangâmu.
© Azumeina Bible © Alliance Biblique du Tchad, 1999.
