2 Amuleina 15 - Azumeina Bible 1999 (MPG)

Azariya mi tamula yam Juda-na

1 Kur biza d’a dok mbà yam kid’iziya d’a Jerobowam amul ma Israel-lâ nga mi tamulid’a, Azariya Amasiya goroma mi kak amula yam suma Juda-na. 2 Kid’a mi kak amulid’a, bizamî dogo yam karagaya. Mi tamula avo Jerusalem bizad’a dok vahl yam mbà. Asum a yat ala Jekoliya ni d’a Jerusalem-mba. 3 Azariya mi le sun nda d’ingêra avok Ma didina pet d’igi abum Amasiya na. 4 Wani mi to nga yima nding ma a tinim iram vam ma suma a nga hahle suma ngat buzuna ki dubang ma his djivid’ina kuana kä woi d’i. 5 Ma didina mi tum Azariya ki libina. Mi kak kur azì ma dingâ woi vam gak mat mama. Goroma Jotam mi kak kur azì ma amula, nga mi te yam suma kur ambasina.

6 Sunda hi Azariya d’a ara kahle suma mi lazina pet a b’irizi nga kä kur Mbaktum mba de zlad’a yam Sunda hAmulei suma Juda-nid’a.

7 Azariya mi mit mi i azulei kä ad’u abuyom ngolo. A tozom gevezi kur Azì ma ngolâ hi David-na. Goroma Jotam mi vrak tamula blangâmu.

Zakari mi tamula yam Israel-lâ

8 Kur biza d’a dok hindi yam klavandi d’a Azariya amul ma Juda-na nga mi tamulid’a, Zakari Jerobowam goroma mi kak amula avo Samari, mi tamula tilâ karagaya. 9 Mi le sun nda tchod’a avok Ma didina d’igi abuyom ngolo na, mi wal nga ki tcho d’a Jerobowam Nebat goroma d’a mi lat mi zut ki Israel-lâ á le tchod’id’a woi d’i. 10 Salum Jabes goroma mi tchol huneîd’a ki sed’emu, mi tchum avok suma pet, mi vrak tamula blangâmu.

11 Sunda hi Zakari d’a ara a b’irit nga kä kur Mbaktum mba de zlad’a yam Sunda hAmulei suma Israel-lîd’a.

12 Zla ndata le hina á ndak vun zla d’a Ma didina mi dat mi Jehu ala: Andjavang mba mi kak yam zlam mba amula aduk Israel-lâ gak kur atchogoi d’a fid’id’a d’a.

Salum mi tamula yam Israel-lâ

13 Kur biza d’a dok hindi yam zlengâ d’a Azariya amul ma Juda-na nga mi tamulid’a, Salum Jabes goroma mi kak amula yam Israel-lâ, mi tamula avo Samari ni tilâ tu go.

14 Menahem Gadi goroma mi tcholï Tirsa mba mi kal avo Samari, mi tchi Salum Jabes goroma, mi vrak tamula blangâmu.

15 Sunda hi Salum mba ara ki vun ma ndjak ma mam ndjagama, a b’irizi nga kä kur Mbaktum mba de zlad’a yam Sunda hAmulei suma Israel-lîd’a. 16 Ata yi máma Menahem mi b’lak azì ma Tifsa-na ki suma kuruma woi pet kandaga d’a nguyumba, tinï ad’ud’a Tifsa dei gak mba Tirsa, mi b’as hur arop mazi suma wirâ woi pepet mi. Mi le hina ni kayamba ata i mam mba Samari-d’a a aram nga lovota á kal avo hatazi d’uo d’a.

Menahem tamula yam Israel-lâ

17 Kur biza d’a dok hindi yam zlengâ d’a Azariya amul ma Juda-na nga mi tamulid’a, Menahem Gadi goroma mi kak amula yam Israel-lâ, mi tamula avo Samari bizad’a dogo. 18 Kur kak mam mba yam andagad’id’a pet mi le sun nda tchod’a avok Ma didina, mi wal nga ki tcho d’a Jerobowam Nebat goroma mi lat mi zut ki Israel-lâ á le tchod’id’a woi d’i.

19 Pul amul ma Asiri-na mi mba á dur ayîna kandaga d’a Israel-la, wani Menahem mi hum kawei ma hapma tonna dok hindi á ndjunum á siram ad’u amul mamba kä ngingring. 20 Menahem mi tar bege ndata nabo Israel suma ndjondjoîna. Nge nge pî mi wurak bege d’a hapa dok vahl dok vahl. Menahem mi hat mamul ma Asiri-na. Kayam ndata, mam ar andaga d’a Israel-la, mi hulong avo hatamu.

21 Sunda hi Menahem mba ara kahle suma mi lazina pet, a b’irizi nga kä kur Mbaktum mba de zlad’a yam Sunda hAmulei suma Israel-lîd’a. 22 Menahem mi mit mi i azulei kä ad’u abuyom ngolo. Goroma Pekahiya mi vrak tamula blangâmu.

Pekahiya tamula yam Israel-lâ

23 Kur biza d’a dok vahl hla Azariya amul ma Juda-na nga mi tamulid’a, Pekahiya Menahem goroma ki kak amula yam Israel-lâ avo Samari, mi tamula bizad’a mbà. 24 Mi le sun nda tchod’a avok Ma didina, mi wal nga ki tcho d’a Jerobowam Nebat goroma d’a mi lat mi zut ki Israel-lâ á le tchod’id’a woi d’i.

25 Peka Remaliya goroma, azigar mam ma ndjunuma, mi ndjak vunam ki azigar suma Galät-na dok vahl, a ngruvum kur azì ma amula, mi tchum zlapa ki Argop ki Ariye, mi vrak tamula blangâmu.

26 Sunda hi Pekahiya d’a ara kahle suma mi lazina pet, a b’irizi nga kä kur Mbaktum mba de zlad’a yam Sunda hAmulei suma Israel-lîd’a.

Peka mi tamula yam Israel-lâ

27 Kur biza d’a dok vahl yam mbà d’a Azariya amul ma Juda-na nga mi tamulid’a, Peka Remaliya goroma mi kak amula yam Israel-lâ avo Samari, mi tamula bizad’a dok mbà. 28 Mi le sun nda tchod’a avok Ma didina, mi wal nga ki tcho d’a Jerobowam Nebat goroma d’a mi lat mi zut ki Israel-lâ kur tchod’id’a woi d’i.

29 Kur atchogoi d’a Peka amul ma Israel-lâ nga mi tamulid’a, Tiglat-Pileser amul ma Asiri-na, mi mba mi hlazì ma Ijon-na, Abel-Bet-Mäka, Janowa, Kedes, Hasor kambas sa Galät-ta ki d’a Galile-d’a kandaga d’a Neftali-d’a pet. Mi yo suma kuruzina pet, mi izi Asiri.

30 Ose Ela goroma mi ndjak vunam yam amulâ Peka, mi tchumu, mi vrak tamula blangâmu. Ni kur biza d’a dok mbà d’a Jotam Azariya goroma amul ma Juda-na nga mi tamulid’a.

31 Sunda hi Peka d’a ara kahle suma mi lazina pet, a b’irizi nga kä kur Mbaktum mba de zlad’a yam Sunda hAmulei suma Israel-lîd’a.

Jotam mi tamula yam Juda-na

(Gol 2 Sun hAm 27.1-32 7-9)

32 Kur biza d’a mbà d’a Peka Remaliya gorom ma amul ma Israel-lâ nga mi tamulid’a, Jotam Azariya goroma mi kak amula yam suma Juda-na. 33 Kid’a mi kak amulid’a, bizamî dok mbà yam vahl. Mi tamula avo Jerusalem bizad’a dogo yam karagaya. Asum a yat ala Jerusa ni Sadok goromba. 34 Jotam mi le sun nda d’ingêra avok Ma didina pepet, d’igi abum Azariya na. 35 Wani mi to nga yima nding ma a tinim iram vam ma suma a nga hahle suma ngat buzuna ki dubang ma his djivid’ina kuana kä woi d’i. Ni Jotam ba, mi min vun agrek ma akulo nding ma avun gong nga kud’ora hi Ma didinid’ina.

36 Sunda hi Jotam mba ara kahle suma mi lazina pet, a b’irizi nga kä kur Mbaktum mba de zlad’a yam Sunda hAmulei suma Juda-nid’a. 37 Kur atchogoi d’a Jotam nga mi tamulid’a, Ma didina mi nde mi sunï Resin amul ma Siri-na ki Peka amul ma Israel-lâ á dur ayîna ki suma Juda-na.

38 Jotam mi mit mi i azulei kä ad’u abuyom ngolo. A tozom gevezi kur Azì ma ngolâ habum ngolo David-na. Goroma Ahas mi vrak tamula blangâmu.