DAVID NGA MI TAMULA YAM ANDJAFÂ HI JUDA-NA
David hum zla matna hi Saul-lâ
1 David mi durï suma Amale’â, mi hulongî avo, mi le burâ Siklak mbà, mi hum ala a tchi wa Saul. 2 Kur bur ma hindina, sana mi tcholï kur kangâ hi Saul-lâ ki barud’a haûd’a atamu, kandagad’a kod’a kam mi, mi mba go ki David, mi tchok yam kä, mi grif kä andaga.
3 David mi dum ala: Ang tcholï ni lara ge?
Mi hulong dum ala: An ringî ni kur kangâ hi Israel-lîna.
4 David mi dum ala: Ni me mi le ge? Ang van ad’ud’a.
Mi hulong dum ala: Suma a ring wa abo ayîna, suma ablaud’a adigazi a bo; a tchi Saul azi ki goroma Jonatan djak mi.
5 David mi de mi gor azong ma mba mi dum zlad’ina ala: Ang wala a tchi Saul azi ki goroma Jonatan ni nana ge?
6 Gor azong máma mi hulong dum ala: An fe Saul nga yam ahina d’a Gilbowa-d’a, mi ge nga tam avun asap mamba. Gol wani, pus ma dur ayîna teteng ki suma djang akulumeina a ar go a tewemu. 7 Mi mbut iram mi wanu, mi yanu. An humum ala: An wana!
8 Mi dan ala: Angî ma lara ge?
An hulong dum ala: An ni ma Amale’â.
9 Mi dan ala: Ang hud’ï geven go, ang tchanu, kayam an le ná matna. 10 An hut gevemu, an tchumu, kayam an wala mi ndak á sut ti. An fogï avaval la kamba ki wulak ka del abomba, an mbazi mi ang salana wana.
11 David mi haû baru mam ma atama woyo. Suma ki sed’ema pet a haû baru ma atazina woi mi. 12 A tin Saul tchina, a tchimu, a d’el tazi bei te tena gak fladege yam Saul azi ki goroma Jonatan, yam suma hi Ma didina suma avo Israel suma a tchazi avun ayînina mi.
13 David mi de mi gor azong máma ala: Angî ma lara ge?
Mi hulong dum ala: An nangei ma Amale’â goroma.
14 David mi djobom ala: Ni kayam me ba, ang le nga mandarâ d’uo ba, ang tchi ma Ma didina mi manam mi tinim amulina ge?
15-16 David mi dum ala: Buzuwang ni kang angû, kayam vunang ba, mi le glangâsâ kangû, kayam ang dala ang tchi ma Ma didina mi manam mi tinim amulina.
David mi yi azong mama tu, mi dum ala: Ang mbeï tchumu! Azong máma mi tchi ma Amalek máma.
David mi tchi horâ yam Saul azi ki Jonatan
17 Wana ni sawal la David mi tchi ki horâ Saul azi ki goroma Jonatan-nda. 18 Mi he vuna ala a had’at mi suma Juda-na; ni sawal la a tchi ki hor suma a tchazi ki yeûd’ina. A b’irit nga zlat kur mbaktumba hi ma d’ingêrîd’a:
19 Israel-lâ, mang ma gangrang ma durâ,
mi puk kä yam yima ndingâ.
Ni nana ba, mang suma gangrangâ a puk kä ge?
20 Ar agi dagi zla ndata woi kur azì ma ngol ma Gat-na d’i,
ar agi tchat walat tei ir palum mba Askalon-nda,
tala arop suma Filistê-na a furîya d’a d’i,
d’oze arop suma hi suma bei ngat bayâd’ina a ayâd’a d’uo mi.
21 Agi ahuniyô suma Gilbowa-na,
ar mbad’ïd’a ti ge kagi
d’oze mbiyo alona mi se kagi
d’oze ar asine ma kagina mi wul awuna
á he he d’a hawad’a d’uo mi,
kayam ni kagi ba, mboriyona hi suma gangrangîna a tchuk kä,
mbareid’a hi Saul-la ti nde kä ki irat fafat.
22 Suma a duruzi mbuleinina, buzuwazi mi djang ngeyo,
suma gangrangâ mbuluzi mi puk keyo,
kayam yeûd’a hi Jonatan-nda nga d’i kal mblok ki,
kayam mbigeu d’a fiyaka hi Saul-la nga d’i ba hawa d’uo mi.
23 Kid’a Saul azi ki Jonatan a nga ki irazi tua d’a,
a le yam tazi heî,
kur mat mazina a wal nga woi d’uo mi.
Azi afefeta kal b’aruna,
azi ad’enga kal azlona.
24 Agi arop suma Israel-lâ, agi tchigi yam Saul
mam ma mi tchugugi baru d’a hleu d’a subura atagina,
ma mi tchugugi ahle suma lora ata baru maginina mi.
25 Ni nana ba, suma gangrangâ a puk kä avun ayîna ge?
Ni nana ba, Jonatan mi puk kä yam yi magi ma ndingâ ge?
26 Wiyena Jonatan, an nga ni hat hurun kangû;
angî banan ma kokodjona.
O mang nga kanda kal o d’a atchad’a ti lat yam sanid’a.
27 Ni nana ba, suma gangrang suma durâ a puk kä ge?
Ni nana ba, ahle mazi suma dur ayîna a vit tei ge?
© Azumeina Bible © Alliance Biblique du Tchad, 1999.
