2 Samuel 11 - Azumeina Bible 1999 (MPG)

(b) DAVID MI LE TCHOD’A KI BATSEBA

David bur katchad’a hi Uri-d’a

1 Tcha damad’a, natchogoi d’a amuleina a i durâ abageid’a, David mi sun Jowap azi ki azigar mam suma nglona ki Israel-lâ pet á b’lak suma Amon-na, á hle Raba mi. Wani David mi ar kaka avo Jerusalem.

2 Ki fladeged’a David mi tchol akulo ata yam ma burâ, nga mi ngui tita akulo yam gong nga amula, mi watchad’a tu nga d’i mbuza; ti djif heî. 3 David mi ge sunda á djop zla atcha ndata. A dum ala: Ni Batseba Eliyam goromba, atchad’a hi Uri ma Het-nid’a. 4 David mi sun suma á yad’iya. Avok yid’a ti mbus wa tat tei yed’et. Ti mba gevemu, mi bur ki sed’ed’u. Bugola, ti hulong avo hatad’u.

5 Atcha ndata ti ve wirâ, ti ge sunda, ti de mi David ala: An nga ki heid’a.

6 Ata yi máma David mi ge sunda, mi de mi Jowap ala mi sunumï Uri ma Het-na avo. Jowap mi sunï Uri mi David. 7 Uri mi mba gen David. David mi djobom yam Jowap, yam suma, yam ayî ma durâ mi. 8 Bugola, David mi de mi Uri ala: Ang i avo hatangû, ang tuk tang ndjö.

Uri mi nde woi kur gong nga amula; amulâ sunumza he d’a hawad’a ad’umu. 9 Wani Uri mi ar burâ kä avun gong nga amula ki azigarâ hi salamina pet, mi kal nga avo hatam mbi. 10 A mba de mi David ala: Uri mi kal nga avo hatam mbi.

Ata yi máma David mi de mi Uri ala: Ang tcholï nabagei d’uo zu? Ni kayam me ba, ang kal avo hatang nguo ge?

11 Uri mi hulong de mi David ala: Zandu’â hAlonina ki Israel-lâ ki suma Juda-na a sä abagei ad’u zlub’ud’a, salana Jowap ki azigar mama a ve nga anguvora abagei hur fulâ d’ad’ar. Ni nana ba, an kal avo hatan á te á tche á bur kamanda mi ge? Gagazi, ang tang nga ki irangû, an ndak á le vama hina na d’i!

12 Amulâ David mi dum ala: Ang kak ka hî ini gak ndjivin tua ba, an arang lovota.

Uri mi ar kaka avo Jerusalem kur bur máma gak yina fö. 13 David mi yum á te tena mi tche ki sed’em mi. David mi gurud’um ki süma, wani ki fladeged’a Uri mi nde woi á i ata yam ma burâ ki azigarâ hi salamina bei mi i avo hatam ba.

14 Tcha ndjivinda David mi b’ir mbaktumba abo Uri mi Jowap. 15 Mi dum kur ala: Agi tinigi Uri ata yima ayîna zozogom kuana, agi yogi tagi woi blogomu, ar ayîna mi tchumu.

A tchi Uri Batseba ndjuvud’u

16 Jowap mi gol azì ma ngol ma azi nguyuma, mi tin Uri ata yima mam we azigar suma gangrang suma djangûna a nga kuana.

17 Suma kur azì ma ngolîna a buzugï durâ ata Jowap, a tchi suma dingâ ablaud’a aduk azigarâ hi David-na, a tchi Uri ma Het-na kur bur máma mi.

18 Jowap mi sun sana á väd’u ahle suma a le yima ayînina mi David. 19 Mi he vuna mi sama mi sunuma ala: Ata yima ang dap wa zla d’a ded’a hayînid’a mamulâ da na, 20 dam hurum mba mi zala, mi dang ala: Ni kayam me ba, agi hud’ugi go kazì ma ngolâ á durâ ge? Agi wagi nga ala suma a mba tcholï yam gulumuna á durugiya d’uo zu? 21 Sama tchi Abimelek Jerubäl goroma ni nge ge? Natchad’a ba, ti tchol yam gulumuna, ti gum kahina ma lutna ba, ti tchum sä Tebes wan nduo zu? Ni kayam me ba, agi ndjaragi go bugol gulumuna ge, ata yi máma ang dum ala: Azong mangâ Uri ma Het-na a tchum mi.

22 Sama sunda mi iya, mi mbaza, mi väd’u ahle suma Jowap mi sunum kazina mi David pet. 23 Sama sunda mi de mi David ala: Sum ndazina ad’engêzi kal kamiya, a mba durumi nabagei kele. Ami digizi gak mbazi sä avun azì ma ngolâ. 24 Suma yeûd’a a yed’ï azigar mangâ akulo yam gulumuna, a tchi suma ablaud’a aduk azigar mangâ, a tchi azong mangâ Uri ma Het-na mi.

25 David mi de mi sama a sunumïna ala: Ang i de mi Jowap ala mi hat hurum yam zla ndata d’i, kayam ayî ma durâ ni hina. Mi tchi suma hina mi na, mi tchi suma hina mi. Ar mi ve tam ad’enga á dur azì ma ngol máma, ar mi b’lagam mbeyo. Ang i hum ad’enga.

26 Kid’a atchad’a hi Uri-d’a ti hum ala a tchi wa ndjuvud’u d’a, ti tchimu. 27 Kid’a bur ma tchina mi kal da d’a, David mi sun á vad’ï avo hatamu. Ti mbut amamba, ti vud’um gorâ tu. Ahle suma David mi lazi ndazina a le nga Ma didina tam djivi d’i.