Siba mi d’ugol David ki tena
1 Kid’a David mi gahinad’a woi hina nde d’a, gol wani, Siba azongâ hi Mefibäl-lâ mi d’ugulom ki korona mbà kahlena djinda huyogomu, nala, avungôna kikis mbà, ades guguzlu d’a sod’a kis, vut agu ma vut awalina kis ki süm guguzlud’a agela tu. 2 Amulâ mi djop Siba ala: Ang mba kahle ndazina nana ge?
Siba mi hulong dum ala: An mba ki korona nala sum mangâ a nga kamu, avungôna ki vut aguna ni mi azigar mangâ á ted’a, süm guguzlud’a ná had’enga mi suma a mba kau abo tit ta abagei hur fulîd’a.
3 Amulâ mi dum ala: Salangâ goroma mi nga ni lara ge?
Siba mi hulong de mamulâ ala: Mi ar sä kaka Jerusalem, kayam mi dala ki tchetchemba Israel-lâ a hulongôm amula habum ngolo Saul-la.
4 Amulâ mi de mi Siba ala: Gola! Ahlena hi Mefibäl-lâ pet a arî mangâ.
Siba mi dala: An grif kä avorongû, salana, amul mana. Ar ang van atang ki djivid’a!
Simei mi ge David vuna
5 Amulâ David mi i gak mi mbaza Bahurim. Gol wani, sama ad’u adesâ hi Saul ma a yum ala Simei ma Gera goromina, mi ndeya, nga mi krak David ngula. 6 Mi dur David kazungeî mama kahinad’a, ata yima grang mama ki sum mama a nga tit yam bigam mba ndjufa ki d’a gulad’ina.
7 Simei nga mi krak David ngula ala: Ang huttcha woyo, ang huttcha woyo, angî ma tchi suma, angî ma hawa ya’â! 8 Ma didina mi hulong wa matna hi suma hi Saul ma ang vrak amula blangâma kangû. Ma didina mi he wa amula abo gorongâ Apsalom. Gola! Ang mbut hohoud’a nata yad’u, kayam angî sama tchi suma.
9 Ni kayam ndata ba, Abisai Seruya gorotna mi de mamulâ ala: Ni kayam me ba, adi ma matna vam baba ba, mi ngulung ang salana amul mana na ge? Ang aran an i ni kam yam mbeyo!
10 Amulâ mi hulong de mi Abisai ala: Agi Seruya grotna vama ndologi ki an ni me ge? Le mi ngulunu, le Ma didina mi dumî mam ala mi ngulunu ni, ni nge mba mi dum ala: Ni kayam me ba, ang le hina ge ge?
11 David mi de mi Abisai kazungeî mama pet ala: Gola! Goron ma kuruna tamba pî nga mi halan á tchid’a. Ma Benjamin máma zla mamba djivid’a kal luo zu? Agi aram mi ngula. Ma didina mi hum vuna ni mamu. 12 Dam Ma didina mba mi ngomon kur hohou manda, mba mi vrak djivid’a balum ge vun mam ma inina kanu.
13 David ki sum mama a nga i avogovok kur tit mazid’a, wani Simei nga mi tit abo ahinad’a go ki David, nga mi ngul David, nga mi durum kahinad’a, nga mi sir andagad’a akulo. 14 Amulâ ki suma ad’uma pet a mbaza avun alum ma Jurdê-na, a kau heî, a tuk tazi kua.
Apsalom mi kal avo Jerusalem
15 Apsalom azi ki Israel-lâ pet a kal avo Jerusalem. Ahitofel mi nga zlapa ki sed’emu. 16 Ata yima Husai ma Arak ma David banamina mi mbaza gen Apsalom-ma, mi dum ala: Amulâ, ar va mi lang ngi! Amulâ, ar va mi lang ngi!
17 Apsalom mi de mi Husai ala: Wana ni djivi d’a ang lat yam banangîd’a d’ang zu? Ni kayam me ba, ang i ki banangâ d’uo ge?
18 Husai mi hulong de mi Apsalom ala: Hawa yak! Sama Ma didina azi ki Israel-lâ pet a manama, ni mam ba, an mba ni kak ki sed’emu. 19 Mi dum kua ala: Ni nge ba, an mba ni lum sunda ge? Ni mi ang goroma d’uo zu? D’igi an lat mabung hina, an mba ni langzi hina mi.
20 Apsalom mi de mi Ahitofel ala: Agi dagi tagi d’alâ yam vama ei ndak á luma.
21 Ahitofel mi de mi Apsalom ala: Ang i ata arop suma gureina habung suma mi arazi á ngom azì ma amulina. Hina wani, Israel-lâ pet a mba wala ang mbut wa ndjendjed’a ir abungû. Hina wani, suma ki sed’engâ pet a mba i ad’ung bei gigrita ba. 22 A ve zlub’ud’a akulo yam gong nga amula mi Apsalom. Apsalom mi kal ad’u arop suma gureina habuma ir Israel-lâ pet.
23 D’al ma Ahitofel mi dum ata yi mámina mi kad’enga d’igi sana mi djop nAlona tamba na. D’alâ hi Ahitofel-lâ mi djivid’a ir David kid’a mi nga ki sed’emba, mi djivid’a ir Apsalom mi.
© Azumeina Bible © Alliance Biblique du Tchad, 1999.
