Husai mi pleî d’alâ hi Ahitofel-lâ woyo
1 Ahitofel mi de mi Apsalom ala: Ang aran an man suma 12.000, an tchol i ata David andjege hî. 2 An mba ni mbaza ni nde kam ata yima mam nga kur kaud’a ad’engêm nga d’uo na, an mba ni lad’am hobot. Suma ki sed’ema pet a mba wet ringâ; an mba ni tchamulâ vam tu. 3 Hina wani, an mba ni hulongôngî sum mama pet. Le an tchi wa ma ang halam á tchid’ina da ni, an mba ni hulongôngî sum mama pet. Hina wani, suma pet a mba kak ki halasa.
4 Zla ndata le Apsalom ki suma nglo suma Israel-lâ pet tazi djivid’a. 5 Ata yi máma Apsalom mi dala: Agi yagï Husai ma Ara’â kua; ei humï vama mam duma mi.
6 Husai mi mba gen Apsalom. Apsalom mi dum ala: Wana ni zla d’a Ahitofel mi data: Ami lat toze ami lat tuo zu? Ang tang de manga.
7 Husai mi hulong de mi Apsalom ala: D’al ma Ahitofel mi dum ini wana nga djivi d’i. 8 Ang wabung ki sum mama; azi ni suma gangrangâ. Azi nayîna d’igi ambur urs sa a yot grotna abageid’a na. Abungî sama dur ayîna; mba mi bur kä ki suma tu d’i. 9 Gola! Mi leza ngei kur zul kla, ata yima ding kla. Ata yima le sum mangâ a mbaza wa, a nde wa aboziya ni, zla ndata ma d’i fei atogo zak ala a tchi wa suma ablaud’a aduk azigar mangâ! 10 Ata yi máma sama ayîna d’igi azlona na na pî mba mi mbut mandarâ, kayam Israel-lâ pet a wala abungî grangâ, suma ki sed’ema ni suma gangrangâ mi.
11 D’al ma an dangzina ba wana: Ang tok Israel-lâ geveng pet, tinï ad’ud’a Dan dei gak mba Berseba. Ablawazi to’î d’igi les ma avun alum ma ngolîna na. Ang tanga i dur ayîna ki sed’eziya. 12 Ei mba mbeiza kam ata yima ei fum kuana, ei mba ndeï kam kä d’igi mbad’ïd’a ti tol kä yam andagad’a na. Mam mboze suma ki sed’ema, sa tu pî mba mi sut ti. 13 Le mi kal kur azì ma ngol ma ding tu ni, Israel-lâ pet a mba mba ki ziyona ata azì máma, ei mba tan azì máma gak komza kä woi kur toliyonda, gak abo gonga mba d’i ar akulo d’i.
14 Apsalom azi ki Israel-lâ pet a dala: D’alâ hi Husai ma Ara’â mi djivid’a kal ma hi Ahitofel-lâ. Na ni d’igi ni Ma didina ba, mi b’lak d’al ma djivina hi Ahitofel-lâ woi á mba ki ndaka yam Apsalom.
David mi djak alum ma Jurdê-na
15 Husai mi de mi suma ngat buzuna Sadok azi ki Abiyatar ala: Ahitofel mi de d’alâ mi Apsalom ki suma nglo suma Israel-lâ hina hina, wani an dazi d’al mana hina hina mi. 16 Ki tchetchemba, agi sunugi ata David atogo zak, agi dum ala ar mi bur kur fula ata yima suma a djak mbina kua máma andjege hî d’i, wani mi hut tei dei tala a tchum ki sum mama pet tuo d’a.
17 Jonatan azi ki Ahimas a nga ni kaka En-Rogel. Gor weid’a mba d’i dazi zlad’a ala ni azi ba, a i de zla ndata mamulâ David. Wani azi ndak á tak tazi woi kur azì ma ngolâ d’i, abo mandarâ. 18 Gor azongâ tu mi waziya, mi de zla ndata mi Apsalom. Wani azi djak a tchol atogo zak, a mbaza Bahurim avo hi sana tu; golonga nga hur aziyamu, a tchuk tazi kä kuru. 19 Atchad’azina ti hle haragad’a, ti gat avun golong ndata, ti war awu ma ti djogom mbeina kuru, kayam sa mi wala va nga kua d’uo d’a. 20 Azungeîna hi Apsalom-ma a kal avo kur azì matna, a djobot ala: Ahimas azi ki Jonatan a nga ni lara ge?
Atcha ndata ti hulong dazi ala: A djak wa mbina. A halaziya, a fazi nga d’i, a hulong avo Jerusalem.
21 Kid’a azungeîna hi Apsalom-ma a hulong da d’a, Ahimas azi ki Jonatan a djagï woi kur golonga, a i gen amulâ David, a dum ala: Agi tchologi atogo zak, agi djagagi mbina, kayam Ahitofel mi de d’al ma tchona hina hina kagiya.
22 David azi ki sum mama pet a tchol a djak alum ma Jurdê-na. Tcha yorogod’a, sama ar sä abo aluma abo hî bei djak keina nga d’i.
23 Ata yima Ahitofel mi we d’ala a ve nga d’al mama d’uo d’a, mi nga yam koro mama, mi i avo hatamu, mi de vunam mi sum mama, mi tchuk ziyona kelem mi tchi tamu. A tozom kur zula habumba.
David mi mba avo Mahanayim
24 David mi mba avo Mahanayim. Ata yi máma Apsalom mi djak alum ma Jurdê-na ki azigar suma Israel suma a nga ki sed’ema pet. 25 Apsalom mi tin Amasa ngola hi azigarîd’a balum Jowap. Amasa ni Jitra ma Israel-lâ goroma; ni ma ve Abigal Nahas goromba, ni d’a Seruya Jowap asum wiyetid’a.
26 Apsalom azi ki Israel-lâ a vanguvora yam ambas sa Galät-ta.
27 Kid’a David mi mba avo Mahanayim-mba, Sobi Nahas ma Raba d’a Amon-nda goroma, Makir Amiyel ma Lodebar-râ goroma ki Barzilai ma Galät ta Rogelim-mba, 28 a mba kazangâ, tazana ki duguyo suma lubuna, gemena, awu orsâ kafuta, awu ma haûd’a, alitna ki klara, 29 mbul ayuma, ambir tumiyôna ki te ma a lum ki mbul ambirina. A mbazi mi David ki sum mama ala a të, kayam a dala: Sum ndazina a fe ndaka abo meid’a, a seî abo vun ma sod’a abagei hur fulâ.
© Azumeina Bible © Alliance Biblique du Tchad, 1999.
