Suma Juda-na a tin David amula avo Hebron
1 Bugol ahle ndazina, David mi djop Ma didina ala: An i kur azì ma ngol ma Juda ma ding tu zu?
Ma didina mi hulong dum ala: Ang iya!
David mi djobom ala: An i ni lara ge?
Ma didina mi hulong dum ala: Ang i Hebron.
2 David mi i kamiyôm suma mbàna, Ahinowam mba Jisreyel-la ki Abigayel atchad’a hi Nabal ma Karmel-lîd’a. 3 David mi i ki suma a nga ki sed’ema, nge nge pî mi i ki sum mama, a i kak kur azì ma ngol ma Hebron-na. 4 Suma Juda-na a mba Hebron, azi tin David amula yam suma Juda-na.
Suma a de mi David ala: Ni Jabes suma Galät-na ba, a tos Saulî aziya.
5 David mi tchuk suma gen Jabes suma Galät-na á dazi ala: Ma didina mi b’e vunam kagiya, kayam agi lagi sun nda djivid’a ki salagina Saul heî, agi tozomu. 6 Ki tchetchemba, ar Ma didin ma d’engzengâ mi lagi djivid’a; an mba ni lagi djivid’a mi, kayam agi lagi wa sun nda djivid’a. 7 Ar agi fagi ad’enga, agi kagagi nandjof suma gangrangâ. Kayam salagina Saul mi mit wa; ki tchetchemba, ni an ba, suma Juda-na a tinin amula kaziya.
A tin Isebäl amula yam Israel-lâ
8 Wani Apner Ner goroma, ni ma ngolâ hi azigarâ hi Saul-lîna, mi hle Isebäl Saul goroma, mi i ki sed’em avo Mahanayim. 9 Mi tinim amula yam suma Galät-na, yam suma Asur-râ, yam suma Jisreyel-lâ, yam suma Efraim-ma, yam suma Benjamin-na, nala, yam Israel-lâ pet. 10 Kid’a a tin Isebäl Saul goroma amula yam Israel-lîd’a, bizamî dok fid’i. Mi tamula bizad’a mbà, wani suma Juda-na a nga zlapa ki David. 11 David mi tamula yam suma Juda-na avo Hebron bizad’a kid’iziya ki tilâ karagaya.
Suma Juda-na ki Israel-lâ a dur taziya
12 Apner Ner goroma ki azigarâ hi Isebäl Saul goromina, a buzugï woi kur Mahanayim, a i irazi abo ma Gabawon-na. 13 Jowap Seruya gorotna ki azigarâ hi David-na a buzuk tita mi, a ngaf tazi avun apo d’a Gabawon-nda; suma dingâ a tchol abo ma ka hî na, suma dingâ a tchol sä abo hî mi.
14 Apner mi de mi Jowap ala: Ar azungeîna a tchol akulo, a to tazi avoreya.
Jowap mi hulong dum ala: Ar azi tchola!
15 Azi tchol akulo, a i ata yima to tad’a. Ablawazi nabo tazi tu; suma Benjamin suma hi Isebäl Saul goromina ni dogo yam mbà, azigarâ hi David-na ni dogo yam mbà mi. 16 Nge nge pî mi ve ndram ma djangûna yam kä, nge nge pî mi huk ndrama fefed’em ki mbigeu d’a fiyaka, a tchuk kä pet, a bo; kayam ndata, a yi yima Gabawon máma ala Helkat-Hasurim.
17 Kur bur máma tamba, a dur ayî ma tchona. Azigarâ hi David-na a kal yam Apner ki sum mama. 18 Ata yi máma Seruya grot suma hindina a nga kua, nala, Jowap, Abisai ki Asayel. Asayel mi ringî d’igi duka na. 19 Nga mi ar Apner bed’em ta d’i bei mi leng iram abo ma ndjuf foze abo ma gulana ba. 20 Apner mi mbut iram mi dum ala: Ni ang Asayel lä?
Asayel mi hulong dum ala: Ni anu!
21 Apner mi dum ala: Ang i irang abo ma ndjuf foze abo ma gulana, ang ve sa aduk azigar ndazina tu, ang fogom ahle mam suma ayîna. Wani Asayel mi min aram bed’em mbi.
22 Apner mi de mi Asayel kua ala: Ang aranu. Ni kayam me ba, an tchang gang kä woi andaga ge? Ni nana ba, an mba ni we wiyengâ Jowap iram ge?
23 Wani Asayel mi min aram bed’em mbi. Kayam ndata, Apner mi tchogom hurum kad’u asap mamba, gak asapa deîza woi huyogomu. Mi puk kä ata yi máma, mi mid’a. Suma pet suma a mba ata yima Asayel mi mit kuana, a tchola.
24 Jowap azi ki Abisai a dik ad’u Apner, a mbaza ata yima nding ma Ama ma avok Giyas d’ar ma avun lovota i hur ful ma Gabawon-nida; afata nigiziya.
25 Azigar suma Benjamin-na a tok tazi adesâ sop ad’u Apner, a tchol yam yima ndingâ tu. 26 Apner mi djop Jowap ala: Ei mba tchi tei hina gagak kang zu? Ang we nga d’ala zla ndata dabi mata ni zla d’a hohoud’a d’uo zu? Ni mindja ba, ang mba de mi sum mangâ ala a ar b’oziyozina bei dika ge?
27 Jowap mi hulong dum ala: Alona ni Ma bei matna! Ladjï ang dan hina d’uo ni, sum mana a mba ar b’oziyozina bei dika d’uo gak yina fö. 28 Jowap mi bu adifa; suma pet a tchola, a ar b’oziyozi suma Israel-lâ bei dika, a ar bei dur ayîna mi.
29 Apner azi ki sum mama a tit andjege kur Araba gak a djak alum ma Jurdê-na, a kal yam Bitron, a mba Mahanayim.
30 Kid’a Jowap mi dik sä Apner dika, mi hulongîya, mi tok suma pet. Aduk azigarâ hi David-na suma nga d’uo ni dogo yam zlengâ ki Asayel mi. 31 Wani suma hi David-na a tchi suma hi Benjamin suma hi Apner-râ kikis hindi yam dok karagaya. 32 A hleï Asayel, a tozom kur zula habumba avo Betelehem. Jowap azi ki sum mama a tit andjege gak a mba Hebron yina foziya.
© Azumeina Bible © Alliance Biblique du Tchad, 1999.
