David mi nga hurum á hleï zandu’â Jerusalem
(Gol 1 Sun hAm 13.4-14)1 David mi hulong mi tok Israel suma a we durîna pet; ablawazi ni 30.000. 2 David azi ki suma a nga ki sed’ema a tchol avo Bäla d’a Juda-d’a á hleï zandu’â hAlonina. Ni ma nga yï ki simiyê Ma didin ma ad’engêm kal pet ma nga kaka aduk tcherebê suma yam zandu’îna. 3 Sum ndazina a hleï zandu’â hAlonina avo hi Abinadap yam yima ndingâ, a tinim kur pus ma awilina hamuzleinina. Uza azi ki Ahiyo Abinadap groma, a nga tit ki pus ma awili máma. 4 A hlumï avo hi Abinadap yam yima ndingâ. Uza nga mi tit abo pusâ abo tu, Ahiyo mi nga avok pusâ mi. 5 David ki Israel-lâ pet a nga lü avok Ma didina kandjaf ahle suma bud’a teteng suma a minizi kagu siprenina, ading ma nglona ki ma gureina, daliyâd’a, tchuguyod’a ki ndendeta mi.
6 Kid’a azi mbaza kur ambid’a’â hi Nakon-nid’a, Uza mi mat abom mi ve zandu’â kayam amuzleina a nga lengêm á ged’a kä. 7 Ma didina hurum zal ngola yam Uza, mi tumum ata yi máma, kayam tcho mamba. Uza mi mit ata yi máma gen zandu’â hAlonina.
8 David hurum zal yam tchi d’a Ma didina mi tchi Uza-d’a. A nga yi yi máma gak ini ala Peres-Uza. 9 Kur bur máma David mi le mandara Ma didina, mi dala: Ni nana ba, zandu’â hi Ma didinina mba mi kal avo hatan nge?
10 Mi min ala zandu’â hi Ma didinina mi kal abo hatam kur aziyam ma ngolâ d’i. Mi hlumza vunam mbei avo hi Obet-Edom ma Gat-na.
11 Zandu’â hi Ma didinina mi le tilâ hindi avo hi Obet-Edom ma Gat-na. Ma didina mi b’e vunam yam Obet-Edom ki sum mama pet.
David mi mba ki zandu’â hAlonina avo Jerusalem
(Gol 1 Sun hAm 15.25—16.3)12 A mba de mamulâ David ala: Ma didina mi b’e wa vunam yam Obet-Edom ki sum mama pet, kayam zandu’â hAlonina mi nga avo hatamu. Ata yi máma David mi i hleï zandu’â hAlonina avo hi Obet-Edom dei, mi mba ki sed’em kur azì mam ma ngolâ ki furîd’a gandjau. 13 Ata yima suma a zï zandu’â hi Ma didinina kelezina, a tit asezi tutud’a karagaya na, a vamuhl ma nguruna kamuhl ma gor ma d’orâ, a ngad’azi ahle suma ngat buzuna. 14 David nga mi lü avok Ma didina kad’engêm pet ki baru d’a efo d’a luluîd’a djinda furum mi. 15 David ki Israel-lâ pet a hleï zandu’â hi Ma didinina ki furîd’a kaduveina bud’a kazi wü.
16 Ata yima a kal zandu’â hi Ma didinina avo kur Azì ma ngolâ hi David-nina, Mikal Saul goromba ti gol ir fenetred’a, ti wamulâ nga mi gal akulo ki ndjongâ. Ata yi máma ti golom is kurut krovo.
17 Ata yima a tin zandu’â hi Ma didinina kur zlub’u d’a David mi minimzi kamba tin na, David mi he he d’a hawa d’a ngala mi Ma didina ki he d’a hawa d’a ngat buzu d’a zlap darigïd’a. 18 Kid’a David abom dap he d’a hawa d’a ngala ki he d’a hawa d’a ngat buzu d’a zlap darigïd’a dapa, mi b’e vunam yam suma ki simiyê Ma didin ad’engêm kal petna. 19 Bugola, David mi b’rau tena mablaud’a hi Israel-lâ pet; andjofâ karopma nge nge pî David mi hum avungô ma gureina ki hliu ma sora kades guguzlu d’a sod’a. Suma pet a b’rawa, nge nge pî mi i avo hatamu.
20 David mi hulong avo hatam á b’e vunam yam sum mama. Mikal Saul goromba, ti ndeï ti ngavamu, ti dum ala: Ni subur ra me ini kang ang amul ma Israel-lâ hina ba, ang nga lü avok yuguneina hazungeî mangâ barud’a fel lei atang d’igi sama hawana na ge!
21 David mi hulong dat ala: An lü avok Ma didin ma mi manan an kal abuk ki sum mama pet ma mi tinin amula yam mam suma Israel-lîna. 22 An mba ni ge yan kä kua, an mba ni gol tan ni va d’uo, wani a mba suburun avok yugunei suma ndak de kazi wana. 23 Mikal Saul goromba ti vut nga gor ri gak mat matna.
© Azumeina Bible © Alliance Biblique du Tchad, 1999.
