2 Samuel 7 - Azumeina Bible 1999 (MPG)

David mi nga hurum á min gong nga kud’ora hAlonid’a

1 Ma didina mi pat amulâ David tei abo mam suma djangû suma a nguyuma, mi hum tuk tad’a. David mi nga kaka kur aziyam ma amula. 2 Bur tu David mi de mi Natan ma djok vun Alona ala: Gola! An nga kaka kur azì ma a minim kagu sedrenina, wani zandu’â hAlonina mi nga tinda kur zlub’ud’a.

3 Natan mi de mamulâ ala: Ang iya, ang lahle suma ang nga hurung kazina pet, kayam Ma didina mi nga ki sed’engû.

4 Wani kur andjege ndata Ma didina mi de zlad’a mi Natan ala: 5 Ang i de mazong mana David ala: An Ma didina ni dala: Ni ang ba, mba minin gong nga an mba ni kak kuad’a zu? 6 Kid’a an yoï Israel-lâ woi kur ambas sa Ezipte-d’a deid’a, an nga bei kak kur gonga tua. An tid’ï ni kur zlub’u d’a baru d’a a vat kabo agunid’a. 7 Ata yima lara ma an nga ni tit ki Israel-lîna, an de zla tu mandjafâ hi Israel ma ding ma an hlum vunan ala mi polon man suma Israel-lâ na ala: Ni kayam me ba, agi minin-ngi gonga kagu sedrena d’uo ge zu?

8 Ki tchetchemba, ang i de mazong mana David ala: An Ma didin ma ad’engên kal petna ni dala: Ni an ba ni vangî ata yima pol tumiyôna á tining amula yam man suma Israel-lâ. 9 An nga ki sed’eng ata yima lara ma ang i kuana, an tchi mang suma djangûna woi avorong pet, an mbud’ung simiyêng ngola d’igi simiyê suma nglo suma a nga yam andagad’a ka hina na. 10 An b’rau yina mi man suma Israel-lâ, an hazi yima kaka, kayam azi giget ti, an ar suma tchona a hulong djobozi nga vunazi d’igi a djobozi vunazi adjeu na d’uo d’a. 11 Kur atchogoi d’a an tin suma nglo suma avok man suma Israel-lîd’a, an hazi tuk tad’a, an pad’azi woi abo mazi suma djangûna.

Ki tchetchemba, an Ma didina nga ni dangû: An mba ni hang andjafâ. 12 Fata burung ndak ang mba mit i kä azulei ad’u abuyonga, an mba ni tchol andjavang ma ndeï kurungâ blogongû, an mba ni hum ad’enga á tamula. 13 Ni mam ba, mba mi min gonga akulo ki simiyênu, an mba ni hum ad’enga á kak yam zlam mam mba amula gak didin. 14 An tanda mba ni ka’î abumu, mam tamba mba mi ka’î gorona. Le mi le tchod’a ni, an mba ni gad’am ki totogod’a hi sumid’a, an mba ni tom d’igi suma a to grozina na. 15 An mba ni ar bei lum djivid’a d’igi an ar Saul ba le djivid’a ni digim mbei ni vragang ang blangâm na d’i. 16 Sama ad’u andjavangâ mba mi tamula blagang gak didin; amul manga mba d’i giget ti gak didin.

17 Natan mi mba mi väd’u zla d’a Alona mi ndumzi woid’a mi David pet.

Tchenda hi David-ta

(Gol 1 Sun hAm 17.16-27)

18 Ata yi máma amulâ David mi i avok Ma didina, mi dum ala: Salad’a, Ma didina, an ki sum mana ni me ko ba, ang i gak dan yam ahle ndazina ge? 19 Salad’a Ma didina, ni zla d’a akid’eid’a irang tala ang nga de zlad’a yam andjafâ hi an azong mangâ vama sä avo’â, an mala ni sana na zu? 20 Ma didina, an dok ni dangî zla me d’ei ge? Salad’a, Ma didina, ang wan an azong mangâ. 21 Ni kayam zla manga ki nga hur mangâ ba, ang le sun nda ngol la atchapa á tagat tei mi an azong mangâ wana. 22 Ma didina, Alo mana, angî Ma ngol ma kal papana, kayam ma hle tam d’igi ang na na nga d’i. Alo ma ding ma gagazina nga d’i, d’igi ami nga humumi ini ki humami na. 23 Andjaf ma ding ma yam andagad’a ma d’igi Israel-lâ na na nga d’i. Ni mam ba, ang i pad’am mbei abo Ezipte suma a nga djobom vunam kalo mazina tetengâ, ang mbud’um andjaf mangâ. Ang suburum simiyêmu, ang lahle suma atchapma kahle suma mandarâ kam kur ambas manga mi. 24 Ang mbud’um andjaf mangâ, kayam mi ka’î mangâ gak didin. Ma didina, ang arî Alo mama mi.

25 Ki tchetchemba, Ma didina, Alo mana, ar ang ndak vun zla d’a ang dat mi an azong mangâ kandjavanda ti kak hina, ar ang le d’igi ang de na gak didin. 26 Ar suma a suburung simiyêng teteu, ar a dala: Ma didin ma ad’engêm kal petna nAlona hi Israel-lîna, ar andjafâ hi an azong mangâ David-na, mi ka’î sirad’a avorong hina didin mi. 27 Kayam ni ang tang Ma didin ma ad’engên kal petna, Alona hi Israel-lîna ba, ang nde zla ndata woi mi an azong mangâ ala: An mba ni hang andjafâ. Ni kayam ndata ba, an azong mangâ ni fad’enga á tcheneng wana. 28 Ki tchetchemba, Salad’a Ma didina, angî Alona, zla manga ni zla d’a gagazid’a; ang tak djivi manga woi mi an azong mangâ. 29 Ki tchetchemba, ang b’e vunang yam andjafâ hi an azong mangîna, kayam mi kak avorong teteu, kayam ni ang Salan Ma didina ba dala ang mba b’e vunang yam andjafâ hi an azong mangîna gak didin!