David mi le djivid’a ki Mefibäl Jonatan goroma
1 Bur tu David mi dala: Sama ad’u andjafâ hi Saul ma nga ki irama nga zu? An min lum djivid’a yam Jonatan.
2 Wani azong ma avo hi Saul-lâ nga, a yum ala Siba. A mbamï mi David. Amulâ mi djobom ala: Ni ang Siba zu?
Mi hulong dum ala: Â, ni an azong mangâ.
3 Amulâ mi djobom ala: Na ni sama ad’u andjafâ hi Saul-lâ ar nga d’uo zu? An min lum djivid’a hAlonid’a.
Siba mi hulong dum ala: Jonatan goroma nga tu, mi ni gugutud’a.
4 Amulâ mi dum ala: Mi nga ni lara ge?
Siba mi hulong dum ala: Mi nga avo hi Makir Amiyel goroma sä Lodebar.
5 Amulâ David mi sun a halamï avo hi Makir Amiyel goroma sä Lodebar. 6 Mefibäl Jonatan gorom ma Saul gorom ngolonina, mi mba gen David, mi ge tam kä andaga, mi grif kä. David mi yum ala: Mefibäl!
Mi humum ala: An azong mangâ wana.
7 David mi dum ala: Ang le mandar ri. An min lang djivid’a yam abung Jonatan, an nga ni hulongông siliud’a habung ngolo Saul-la pet. Vama kalâ, ang mba te tena ki sed’en yam tabul mana burâ ki burâ.
8 Mefibäl mi grif kä, mi dum ala: Amulâ, ni kayam me ba, ang he tang ndaka yam an ma d’igi adi ma matna na na ge?
9 Ata yi máma David mi yï Siba azongâ hi Saul-lâ, mi dum ala: An nga ni hahlena hi salangâ Saul-lâ kahlena hi sum mamina pet mi gorom ngolona Mefibäl. 10 Ang ki grongâ kazungeî mangâ, agi zumum asinena, agi dud’um awuna, ang he tena mi Mefibäl salangâ Saul gorom ngolona. Mefibäl salangâ gorom ngolona mba mi te tena ki sed’en yam tabul mana teteu.
Wani Siba groma ni dogo yam vahl, azungeî mama ni dok mbà mi. 11 Siba mi de mamulâ ala: An azong mangâ mba ni lahlena pet d’igi ang salana amulâ han vuna na.
David mi de kua ala: Mefibäl mba mi te yam tabul mana d’igi amulâ goroma na.
12 Mefibäl goroma nga, mi ni gogora tua; a yum ala Mika. Suma pet suma a nga kaka avo hi Siba-na, azi nazungeîna hi Mefibäl-lâ mi. 13 Mefibäl mi ka’î avo Jerusalem, kayam mi te ni yam tabulâ hamulîna burâ ki burâ. Wani asem djak ni gugutud’a.
© Azumeina Bible © Alliance Biblique du Tchad, 1999.
