Alona mi kak djangûna ki kud’or ra hawa yaka
1 Moise mi de kua ala: Le sama djok vuna d’oze ma vana nde tam mbei irama, mi tchol adigagi mi de yam vama taka, d’oze vama yoyouna, 2 le vama taka d’oze vama yoyou ma mi dagi kam máma mi ndaga, mi le ba, mi dagi ala agi i zlabagi kalo ma ding ma agi wum nga yagi tu d’uo na, agi kud’uromu ni, 3 agi humugi zlad’a hi ma djok vun máma d’oze zlad’a hi ma vana nde tam mbei iram máma d’i. Kayam ni Ma didina Alo magina ba, mi kugugi ni mam á we na ni agi nga lagi ni kam ki hur ma tuna ki tagi pet ko zu ge d’a. 4 Agi zlabagi darigïd’a ki Ma didina Alo magina, agi lum mandaramu, agi ngomogi vun ma he mama, agi gagi yagi kä ad’u zla mamba. Ni mam ba, agi kud’uromu, agi reyêgi tagi ki sed’em mi. 5 Ma djok vun máma d’oze ma vana nde tam mbei iram máma, agi tchum mbeyo, kayam mi de ni zla d’a kak djangûna ki Ma didina Alo magi ma buzugugï woi kur ambas sa Ezipte-d’a ma mi tchugugi akulo woi kur azì ma a lagi magomba kuana. Sa máma mi min d’ezegi ni woi kur lovot ta Ma didina Alo magina mi hagi vuna kat á tid’igi kuad’a. Hina wani, agi mba d’elegi tcho d’a led’a adigagiya.
6 Le wiyeng ma asungâ d’oze gorongâ d’oze goronga d’oze amang nga nga zlapa ki sed’enga d’oze banang ma ang le kam d’igi ang tanga na na, mi lobong gumun ala: Ar ei i kud’orei alo ma ding ma tetengâ, nala, alo ma ang kabuyong ngolo wum nga d’uo 7 ma aduk alona hi suma a nguyugi suma go ki sed’egi d’oze suma dei ki sed’egina tinï ad’ud’a avun dabid’a handagad’id’a abo hî dei gak nde woi abo hî ni, 8 ang tin humang yam zla mamba d’i, ang humum mbuo mi, ang wum hohowom mbi, ang zlubum yam tcho mamba kä d’uo mi. 9 Wani mbeî ang tchum mbeyo, ang tanga hlabong adjeu kikidji á tchum mbei ni angû, ablau d’a peta ti yo abot ni bugolo. 10 Ang dur sama tcho máma kahinad’a, ang tchum mbeyo, kayam mi halî lovota á walang ngei dei ki Ma didina Alo mang ma mi ndangî woi kur ambas sa Ezipte-d’a kur yima a lagi magomba kuana. 11 Hina wani, agi Israel-lâ pet, agi mba hum zla ndata, agi mba lagi mandarâ; sa mba mi le andjaf tcho d’a hina d’a adigagi d’uo d’a.
12 Le agi humugi zla d’a ded’a yam azì ma ngol ma aduk azì ma Ma didina Alo magina mi hagizi á kakina ala: 13 Suma zlazi nga d’uo na a tchol adigagi á lop suma a nga kaka kur azì ma ngolîna ala: Ar ei i kud’orei alo ma ding ma tetengâ, nala, ma agi wum nga yagi tu d’uo na ni, 14 ar agi djobogi ad’u zla ndata, agi halat ad’ud’u, agi feget ad’ut djiviya, zla ndata ni gagazi zu? Zla ndata ti le nga, sun nda ndjendje ndata ti le nga adigagi gagazi ni, 15 ata yi máma agi tchagi suma a nga kaka kur azì ma ngol mámina, agi b’lagam mbei kahle suma kuruma ki d’uwarâ pepet bei ar va tu ba. 16 Agi togogi ahle suma agi yogizina hurazina d’ad’ar, agi ngalagi azì máma kahle suma agi yozina pepet woi kakud’a avok Ma didina Alo magina. Azì máma mba mi arî azì ma b’laka ki iram fafat; ar sa mi minim akulo d’uo d’a. 17-18 Ar agi hlagi ahle suma agi b’lagazi woina abogi d’i, kayambala Ma didina hurum vat tei kur ayî mam ma bibiliuna d’a. Le agi gagi yagi kä ad’u zlad’a hi Ma didina Alo maginid’a, le agi ngomogi vun ma he mama pet ma an hagizi inina, le agi lagi sun nda d’ingêra avok Ma didina Alo magina ni, mam mba mi wagi hohowogiya, mba mi zulugi ablaud’a d’igi mam hle vunam mabuyogi ngolo na mi.
© Azumeina Bible © Alliance Biblique du Tchad, 1999.
