Ang we lovota á zi anek manga
1 Ang ge te mangâ kä aduk mbina, bur tu ang mba hulong fumu. 2 Ang b’rau te mangâ mi suma ad’u kid’iziya d’oze ad’u klavandi, kayam ang we nga ndaka nga d’i mba yam andagad’id’a d’i. 3 Le alo ma sed’a mi oî kur d’ugula ni, nga d’i sumî kä yam andagad’a. Le aguna mi nde ni iram abo ma sutna d’oze abo ma norâ ni, mi arî ged’a kä ata yima mi nde kuana. 4 Sama nga mi gol simetnina, nga mi zar ri; sama nga mi gol d’ugulina, nga mi dut tuo mi. 5 D’igi ang nga we yima simetna mi tcholï kuana d’oze ang nga we djeng nga gorâ nga mi djeng kur atcha d’a wirîd’a d’uo na, ang nga we sunda hAlo ma lahlena petnid’a d’uo mi. 6 Kayam ang we nga vama ang mba fuma d’i; le ni ma wana, d’oze ma hina, d’oze azi djak a mba le djivid’a, ang we nga d’i.
7 B’od’a ti djivid’a, ti djivid’a yam ira á gol afata. 8 Le sana mi le bizad’a ngola yam andagad’a ni, ar mi le furîd’a kur biza ndata pet. Ar mi djib’er yam bur ma ablau ma nduvun ma mam mba mi luma. Ahle suma a nga mba ndazina pet nahle suma hawa ya’â.
© Azumeina Bible © Alliance Biblique du Tchad, 1999.
